Scriptures
Akakiteanga Tuatua A Te Aronga Mana 2


Akakiteanga Tuatua A Te Aronga Mana—2

Kia Ratou te ka Mareka Mai:

I roto i te marama ia Tepetema i te rā 30, 1978, i roto i te 148 o te Uipaanga Maata a Te Akonoanga a Iesu Mesia o te Aronga Tapu i te Au Rā i Muri Nei, kua oronga mai te Peresideni ko N. Eldon Tanner, te Konitara Mua i roto i te Ruru Peresideni Mua o te Akonoanga, i teia:

I te akamataanga o te marama ko Tiunu i teia mataiti, kua akakite te Ruru Peresideni Mua e kua rauka mai tetai eeuanga i te Peresideni Spencer W. Kimball e kia akatikaia te au akameitakianga o te kautaunga e to te iero ki te au mema tane turanga meitaki i roto i te Akonoanga. Kua pati mai a Peresideni Kimball e kia akamārama au ki te uipaanga maata, e i muri ake i tona arikianga i teia eeuanga, tei tae mai kiaia na roto i te akamanakonako e te pureanga roa i roto i te au pia tapu o te iero tapu, kua oronga atu aia i te reira ki tona nga konitara, e kua ariki raua e kua turu i te reira. E i reira kua tukuia atu ki te Pupu Tino Ngauru Ma Rua Aposetolo, e kua turuia e ratou pouroa, e mei ia ratou kua tukuia atu ki te Aronga Mana, e kua turuia te reira e ratou pouroa.

Kua pati mai te Peresideni Kimball kia tatau atu au i teia reta i teianei:

Te rā 8 no Tiunu, 1978

Ki te au kautaunga akaaere teitei e te akaaka o Te Akonoanga a Iesu Mesia o te Aronga Tapu i te Au Rā i Muri Nei i roto i to te ao katoatoa:

Taku Au Taeake:

Te kite nei matou i te pararauare o te angaanga a te Atu i te au enua, kua mareka tikai matou i te au tangata o te au pa enua e manganui tei ariki mai i te karere o te evangelia tei akaokiia mai, e kua tomo ki roto i te Akonoanga na roto i tetai tupuanga maata rava. Na te reira i akauru mai ia matou ki te inangaro kia tuku atu ki te au mema tukatau o te Akonoanga i te tikaanga e te au akameitakianga ta te evangelia ka rauka.

Kua kite matou i te au taputouanga tei papauia e te au peroveta e te au peresideni o te Akonoanga tei na muake ia matou, i roto i te ravenga mutukore a te Atua, pouroa to tatou au taeake tei tukatau ka rauka ia ratou te kautaunga, e te kiteanga i te tu akarongo tikai o ratou ko tei kore i orongaia te kautaunga, e kua roa to matou pati akaakaanga no teia aronga, to tatou au taeake akarongo, i te roa te au ora i te Pia Teitei o te Iero i te pati akaakaanga ki te Atu i tetai aratakianga tapu.

Kua akarongo aia i ta matou au pure, e na roto i te eeuanga kua akatinamou mai e kua tae te rā, tei taputouia i te tuatau taito, e ka rauka i te au tane tukatau e te akarongo i roto i te Akonoanga te kautaunga tapu, ma te mana kia akaaere i tona tikaanga tapu, e kia ariki kapiti ma tona au akaperepere i te au akameitakianga mei reira mai, e kapiti atu te au akameitakianga o te iero. No reira ko te au mema tane tukatau katoatoa o te Akonoanga ka akataongaia ki te kautaunga ma te kore e akara ki to tetai iti tangata, e te kara o te pakiri. Kua akaueia te au arataki o te Kautaunga kia aru meitaki i te akaaereanga o te uiuianga i te au tangata katoatoa no te akataongaanga ki to Aarona, me kore ra ki te Kautaunga o Melekizedeka ei akapapu e kua tukatau meitaki ratou no te reira.

Te akakite atu nei matou ma te tapu tikai e kua akakite mai te Atu i teianei i tona anoano no te akameitakianga i tana au tamariki katoatoa i roto i te ao nei te ka akarongo i te reo o tona au tavini ikiia, ma te akateateamamao ia ratou uaorai no te arikianga i te au akameitakianga tatakitai o te evangelia.

Kia apa kore kotou,

Spencer W. Kimball

N. Eldon Tanner

Marion G. Romney

Te Ruru Peresideni Mua

No te mea kua ariki matou ia Spencer W. Kimball koia te peroveta, te akara, e te tangata eeu, e te peresideni o Te Akonoanga a Iesu Mesia o te Aronga Tapu i te Au Rā i Muri Nei, te patiia atu nei ta tatou akatikaanga, te aronga tei akaputuputu mai ki konei, kia ariki i teia eeuanga e e reo e te inangaro o te Atu. Ko te katoatoa tei akatika, taki i te rima katau ki runga. Tei patoi mei te reira rai te akairo.

Ko te voutianga no te turu i tei taikuia i runga nei, kua akatinamouia e te katoatoa rava.

Salt Lake City, Utah, i te rā 30 o Tepetema, 1978.