1 Tika tikai, te tuatua maira te Atu kia kotou taku i inangaro, e ko taku oki e inangaro ra ko ratou rai ïa taku e akoako atu kia akakoreia mai ta ratou au ara, e na roto i te akoakoanga nei kua akateateamamao au i tetai mataara ei akaora mai ia ratou i te au mea katoa mei roto mai i te timataanga, e kua inangaro tikai oki au ia kotou.

2 No reira, e mea tau rai kotou kia akoia atu e kia karoia atu ki mua i toku aroaro;

3 Kua ara oki kotou kiaku nei i te ara kino tikai, e kare oki kotou i akara ki te akaueanga maata i roto i te au mea katoatoa, taku oki i oronga atu kia kotou no runga i te akatuanga i toku are;

4 Ko te akateateamamaoanga oki taku i manako no te akapapa i taku au aposetolo kia pakoti i te aua vine no te taime openga, kia akatupu oki au i taku angaanga tuke, e kia riringi atu oki au i toku Vaerua ki runga i te au kopapa katoatoa—

5 E i na, tika tikai taku e karanga atu kia kotou, e manganui oki tei akataongaia i rotopu ia kotou na, taku oki i kapiki, i na ra, e tokoiti ua ra tei ikiia.

6 Ko tei kore i ikiia ra e ara kino tikai ta ratou, e te aere ra ratou i te poiri noatu e e avatea pu.

7 E ko teia tumu nei i oronga atu ei au i tetai akaueanga kia kotou kia rauka oki ia kotou kia kapiki mai i to kotou au putuputuanga tapu, kia taea oki ta kotou au akakoreanga kai e ta kotou evaanga ki roto i te taringa o te Atu Sabaota, ko teia oki te akaurianga, ko tei anga i te rā mua, te momua e te akaopenga.

8 Ae, tika tikai taku e karanga atu kia kotou, kua oronga atu au i tetai akaueanga kia kotou, kia akatu kotou i te are, e i roto oki i teia are nei e manako ei au kia rave i te orongaanga tapu ki te aronga taku i iki ma te mana no runga mai;

9 Ko te taputou oki teia a te Metua kia kotou, e no reira te akaue atu nei au ia kotou kia noo, mei taku au aposetolo rai oki i Ierusalema.

10 Kareka ra, kua ara toku au tavini i tetai ara kino tikai; e kua tupu mai oki te au tauetonoanga i roto i te apii a te au peroveta; tei riro ei mea kino tikai kiaku, te tuatua maira to kotou Atu; no reira kua tuku atu au ia ratou kia akoia.

11 Tika tikai taku e karanga atu kia kotou, ko toku anoano teia kia akatu kotou i te are. Me akono kotou i taku au akaueanga ka rauka ia kotou te mana kia akatu i te reira.

12 Me kare ra kotou e akono i taku au akaueanga, kare te aroa o te Metua e vai ua mai rai kia kotou, e no reira ka aere ua kotou i te poiri.

13 E teianei, teia te pakari, e te manako o te Atu—kia akatuia te are, auraka ki te ravenga a to te ao nei, kare oki au i oronga atu e kia noo kotou mei ta to te ao nei;

14 No reira kia akatuia ra ki te tu taku ka akaari atu kia kotou toko toru, ta kotou oki ka iki e ka akataonga ki teia mana.

15 E ko te vaito oki e rima ngauru ma rima te atea, e e ono ngauru ma rima tapuae te roa i rotopu tikai.

16 E ko te tuanga i raro o te are kia akatapuia mai te reira kiaku no ta kotou au angaanga oroa, e na ta kotou akoanga, e ta kotou akakoreanga kai, e ta kotou pure katoa, e te orongaanga mai i to kotou au anoano tapu tikai kiaku, te tuatua maira to kotou Atu.

17 E ko te tuanga teitei o te are, kia akatapuia mai te reira kiaku no te apii a taku au aposetolo, te tuatua maira a Tamaiti ko Ahman; e me kore ra, ko Alphus, me kore ra, ko Omegus, koia a Iesu Mesia to kotou Atu. Amene.