Tuanga 47
Te eeuanga tei orongaia mai na roto ia Iosepha Timeti te Peroveta, i Kirtland, Ohio, i te rā 8 o Mati, 1831 (History of the Church, 1:166). I mua ake i teia taime nei, kua rave ana a Oliver Cowdery i te angaanga ei tata akapapaanga no te Akonoanga. Kare oki a John Whitmer i kimi ana i te ikianga ei tangata tata akapapaanga, i na ra, no tei patiia kia rave i teia angaanga, kua tuatua e ka akono aia i te anoano o te Atu. Kua tauturu takere ana aia i te Peroveta i te tataanga e te akapapaanga i tetai au eeuanga e manganui tei rauka mai i vaitata i Fayette, New York.
1–4, Kua ikiia a John Whitmer kia akono i te akapapaanga o te Akonoanga, e kia tata no te Peroveta.
1 I na, kua tau rava iaku kia tata taku tavini ko John ma te akono i te tataanga i te tua, e ma te tauturu ia koe, e taku tavini e Iosepha, i roto i te tataanga i te au mea te ka orongaia atu kia koe, e tae uatu ki te tuatau e kapikiiaʼi aia ki tetai au angaanga ke.
2 E tika tikai taku e karanga atu kia koe, ka rauka katoa iaia kia akateitei i tona reo i roto i te au uipaanga, me ka tikaia ake.
3 E pera katoa, te karanga atu nei au kia koe e ka orongaia rai kiaia kia akono uatu rai i te au tua e te akapapaanga o te akonoanga; e ko Oliver Cowdery kua iki atu au iaia ki tetai taonga ke.
4 No reira, ka orongaia atu kiaia, mei te mea e e akarongo tikai tona, na roto i te Akapumaana, kia tata i teia au mea. Koia ïa. Amene.