Tuanga 12
Te eeuanga tei orongaia mai na roto ia Iosepha Timeti te Peroveta, kia Joseph Knight, Metua, i Harmony, Pennsylvania, Me 1829 (History of the Church, 1:47–48). Kua irinaki oki a Joseph Knight i te akamāramaanga a Iosepha Timeti no runga i te raukaanga mai o te au papa o te Puka a Momoni, e te angaanga o te akaurianga tei raveia ra i taua taime ra, e kua oronga mai ana i tetai au mea ei tauturu ia Iosepha Timeti e tona tata tuatua, tei riro ei tauturu ia raua kia akauri uatu rai. Na roto i te patianga a Joseph Knight, kua ui atu te Peroveta ki te Atu e kua rauka mai te eeuanga.
1–6, Te rave angaanga i roto i te kainga vine ka rauka ia ratou te akaoraanga; 7–9, Te aronga katoatoa tei anoano e kua tukatau, kia tauturu ratou i te angaanga a te Atu.
1 E angaanga maata e te umere te ka tae mai ki rotopu i te tamariki a te tangata nei.
2 I na, ko au te Atua; e akarongo mai ki taku tuatua, e mea ora oki ïa e te ririnui, e kokoi maata oki to te reira i to te koke matarua, i te vai ia anga i rotopu i te au paupauanga e te au roro o te ivi katoa; no reira e akarongo mai ki taku au tuatua.
3 I na, kua teatea te kainga e kua mou; no reira, ko tei anoano i te kokoti, kia vero aia ki tana matipi ma tona maroiroi, e kokoti koi vai ake te rā, e raukaʼi iaia kia akaputuputu no tona vaerua i te akaoraanga mutukore i roto i te basileia o te Atua.
4 Ae, ko te ka vero ki tana matipi e ka kokoti, na te Atua aia e kapiki.
5 No reira, me ka pati mai koe kiaku, ka rauka ïa ia koe; me ka topapa mai koe, ka tuera ïa mai kia koe.
6 E teianei, mei taau i pati, i na, te karanga atu nei au kia koe, e akono i taku au akaueanga, ma te kimi kia rauka mai e kia akatumu i te akakoroanga o Ziona.
7 I na, te tuatua atu nei au kia koe, e ki te katoatoa rava tei anoano kia akatupu e kia akatinamou i teia angaanga nei;
8 E kare rava e tangata e tauturu mai i teia angaanga, mari ua ra kia akaaka aia ma te kī i te aroa, e tei rauka te akarongo, te manakonako, e te aroa ua, ko tei tauia i roto i te au mea katoatoa, noatu e eaa tei orongaia kiaia kia rave.
9 I na, ko au te mārama e te ora o te ao nei, ko tei tuatua atu i teia au tuatua, e no reira e akarongo mai ma toou ririnui katoa, ei reira koe e kapikiiaʼi. Amene.