Tuanga 31
Te eeuanga tei orongaia mai na roto ia Iosepha Timeti te Peroveta, kia Thomas B. Marsh, Tepetema 1830 (History of the Church, 1:115–117). Ko te raveangaia o teia i muri uake i te uipaanga maata o te Akonoanga (akara i te upoko o te Tuanga 30). Kua bapetizoia a Thomas B. Marsh i te mua o te marama, e kua akataongaia ei ereta ki roto i te Akonoanga i mua ake ka orongaia mai ei teia eeuanga.
1–6, Kua kapikiia a Thomas B. Marsh kia tutu i te evangelia e kua akakiteia atu kiaia e kua akono meitaki ia tona ngutuare tangata; 7–13, Kua akakiteia aia kia akakoromaki, kia pure tamou ua rai, e kia aru i te Akapumaana.
1 E Thomas, e taku tamaiti, kia akameitakiia koe no toou akarongo i roto i taku angaanga.
2 E i na, e manganui toou au manamanata no toou kopu tangata; kareka ra, ka akameitaki au ia koe e toou kopu tangata, ae, taau au tamariki; e te vai nei te rā, ka irinaki mai ratou e ka kite katoa i te tuatua-mou e ka taokotai atu oki kia koe i roto i taku akonoanga.
3 E akateitei i toou ngakau ma te rekareka, no te mea kua tae mai te ora o taau angaanga; e ka mataratara ua toou arero, e ka akakite koe i te karere mataora e te rekareka maata ki teia uki nei.
4 Ka akakite oki koe i te au mea tei eeuia mai ki taku tavini ko Iosepha Timeti, Tamaiti. Ka akamata koe i te ako atu mei teia taime e aere uatu, ae, kia kokoti i te mou i roto i te kainga, tei teatea no te tau ki te aʼi.
5 No reira, ka vero ki taau matipi ma toou vaerua katoa, e ka akakoreia mai taau au ara, e ka tukunaia tetai ruru sitona ki rungaʼo i toou mokotua, no te mea kua tau oki te rave angaanga ki tana tutaki. No reira, ka ora toou kopu tangata.
6 I na, tika tikai taku e karanga atu kia koe, e aere ua ake koe no tetai tuatau poto mei ko atu ia ratou, ma te akakite i taku tuatua, e naku e akateateamamao i tetai ngai no ratou.
7 Ae, e ka akatuera au i te au ngakau o te au tangata, e ka ariki mai ratou ia koe. E ka akatumu au i tetai akonoanga na roto i toou rima;
8 E naau e akamaroiroi atu ia ratou ma te akateateamamao atu ia ratou no te tuatau e akaputuputuiaʼi ratou.
9 Kia akakoromaki koe i roto i te au manamanata, auraka e patoi atu i tei patoi mai. E akaaere i toou ngutuare ma te tu maru e te tango ketaketa.
10 I na, te karanga atu nei au kia koe e kia riro koe ei taote no te akonoanga, auraka ra no te ao nei, no te mea kare ratou e ariki mai ia koe.
11 E aere i toou aerenga i te au ngai i anoanoia e au, e ka orongaia atu kia koe e te Akapumaana i taau ka rave e taau ngai ka aere.
12 E pure putuputu uatu rai kia kore koe e topa ki roto i te timataanga, e ngaro ke atu toou tutaki.
13 Kia vai akarongo ua atu rai koe e tae uatu ki te openga, e i vaitata ua rai au ia koe. Kare teia au tuatua e na te tangata ua nei, mari ra naku, koia a Iesu Mesia, toou Akaora, na roto i te anoano o te Metua. Amene.