Tuanga 43
Te eeuanga tei orongaia mai na roto ia Iosepha Timeti te Peroveta, i Kirtland, Ohio, i roto ia Peperuare 1831 (History of the Church, 1:154–156). I teia taime nei kua ekoko tetai au mema o te Akonoanga, no tei tuatua pikikaa tetai au tangata tei akariro ia ratou ei au peroveta. Kua ui atu te Peroveta ki te Atu e kua rauka mai teia tuatuaanga kia akakiteia ki te au ereta o te Akonoanga. Ko te tuanga mua, kua akakite te reira e ka akapeea i te raveanga i tetai au angaanga a te Akonoanga; e ko te tuanga openga, tei roto i reira tetai tuatua akamatakite ta te au ereta ka akakite atu ki te au iti tangata o te enua nei.
1–7, Ko te au eeuanga e te au akaueanga, ka tae mai te reira na roto ua mai iaia tei ikiia; 8–14, Ka akatapuia te aronga tapu na roto i to ratou raveanga i te au mea tapu pouroa ki mua i te Atua; 15–22, Te tonoia atu nei te au ereta kia aere kia tutu i te tataraara e kia akateateamamao i te tangata no te rā maata o te Atu; 23–28, Ka kapiki mai te Atu i te au tangata na roto i tona uaorai reo e na roto katoa i te au mana natura; 29–35, Ka tae mai te Aunuingangare e te tapekaangaia o Satani.
1 E akarongo mai, e te au ereta o taku akonoanga, e ariu mai i to kotou taringa ki te au tuatua taku ka tuatua atu kia kotou.
2 E i na, tika, tika tikai, taku e tuatua atu nei kia kotou, kua rauka mai ia kotou tetai akaueanga ei ture ki taku akonoanga, na roto iaia taku i iki no kotou kia ariki mai i te au akaueanga ma te au eeuanga mei toku rima.
3 E ko teia ka kite papu kotou—kare atu oki e tangata ke atu tei ikiia i rotopu ia kotou na kia ariki mai i te au akaueanga e te au eeuanga, e tae uatu ki te tuatau e apainaiaʼi aia, me ka noo ua rai aia ki roto iaku.
4 I na ra, tika, tika tikai taku e karanga atu kia kotou, kare atu e tangata ke atu e ikiia ki teia orongaanga nei, mari ua ra na roto iaia; e me apaina ke ia mei iaia kare ona mana i reira, mari ra kia iki i tetai ei mono iaia.
5 E ka riro teia ei ture kia kotou, kia kore kotou e ariki atu i te au apiianga a tetai te ka aere mai ki mua ia kotou ei eeuanga, e me kore ra ei akaueanga;
6 E te oronga atu nei au i teia kia kotou kia kore oki kotou e vare, kia kite oki kotou e kare ratou e noku.
7 E tika tikai taku e karanga atu kia kotou, koia ko tei akataongaia e au, ka aere mai aia na te ngutupa, e ka akataongaia mei taku i akakite atu i mua ana, kia apii atu i taua au eeuanga ra tei rauka e te ka rauka ia kotou na roto iaia taku i iki.
8 I teianei, i na, te oronga atu nei au i tetai akaueanga kia kotou, me akaputuputu kotou ki te ngai okotai, ka apii e ka akamārama kotou ma te tauturu tetai ki tetai, kia kite oki kotou e ka akapeea me angaanga e me akaaere i taku akonoanga, ka akapeea me rave i te au tikaanga o taku ture e te au akaueanga, taku i oronga atu.
9 E ka pera kotou i te akamāramaia ki te ture o taku akonoanga, e ka akatapuia na roto i tei rauka ia kotou, e ka tapeka kotou ia kotou uaorai ki te angaanga ma te tapu tikai ki mua iaku—
10 E me rave kotou i teia, e kakā te ka orongaia atu ki te basileia tei rauka ia kotou. E me kare ra kotou e rave, ka rave ke ia, koia oki tei rauka ia kotou.
11 E akaruke ke atu kotou i te kino i roto ia kotou na; e akatapuia kotou ki mua iaku;
12 E me kua anoano kotou i te kakā o te basileia, e iki mai kotou i taku tavini ia Iosepha Timeti, Tamaiti, ma te turuturu mai iaia ki mua iaku na roto i te pure akarongo.
13 E te karanga akaou atu nei au kia kotou, me kua anoano kotou i te au mea muna o toku basileia, e oronga atu i tetai kai nana e te kakau katoa, e te au apinga uatu tana e anoano kia akaoti i te angaanga taku i akaue atu kiaia;
14 E me kare kotou e rave i te reira, ka noo ua rai aia ki o ratou tei ariki mai iaia, kia akono au noku i tetai iti tangata tiamā ki mua iaku.
15 Te karanga akaou atu nei au, e akarongo mai e te au ereta o taku akonoanga, taku oki i iki: Kare kotou i tukuia atu kia apiiia, kia apii atu ra kotou i te au tamariki a te tangata nei ki te au mea taku i tuku atu ki roto i to kotou rima na roto i te mana o toku Vaerua;
16 E ka apiiia mai kotou mei runga mai. E akatapu ia kotou uaorai, i reira e akakīia mai ei kotou e te mana, kia oronga atu oki kotou mei taku tikai i tuatua atu.
17 E akarongo mai kotou, e, i na, te vaitata mai nei te rā maata o te Atu.
18 Ka tae mai te rā e tuatua mai ei te reo o te Atu mei te rangi mai; ka ngaueue te au rangi e ka ruketekete te enua nei, e ka tangi te pu a te Atua ma te roa e te tangi maata katoa, e ka tuatua atu ki te iti tangata tei moe: E te aronga tapu, e tu ki runga kia ora; e te aronga rave ara, e noo e moe kia kapiki akaou mai au.
19 No reira, e tatua i to kotou taukupu, ko te kitea aea kotou ki rotopu i te aronga kino.
20 E akateitei i to kotou reo ma te mataku kore. E kapiki atu ki te au iti tangata kia tataraara, te aronga pakari e te mapu katoa, tei tuikaa e tei tuikaa kore, i te na ko anga e: E akateateamamao ia kotou no te rā maata o te Atu;
21 E me ko au, e tangata oki au, ka akateitei ei au i toku reo e ma te kapiki atu kia kotou kia tataraara, e makitakita akera kotou iaku, eaa ta kotou ka tuatua atu kia tae mai taua rā ra, kia aruru mai te reo o te au mangungu mei nga ope mai o te enua, i te tuatuaanga mai ki te au taringa o te katoatoa e ora nei, i te na ko anga e—E tataraara, e akateateamamao no te rā maata o te Atu?
22 E, me korapa mai te uira mei te itinga ki te opunga, ma te aruruanga mai to ratou reo ki te au tangata katoatoa e ora nei, e ka poturi te taringa o te au tangata katoatoa te ka akarongo, i te tuatuaangaia mai teia au tuatua—E tataraara kotou, te vaitata mai nei te rā maata o te Atu?
23 E ka tuatua akaou mai rai te reo o te Atu mei te rangi mai, i te na ko anga e: E ariu mai, e te au iti tangata o te enua nei, e akarongo mai i te reo o te Atua tei anga ia kotou.
24 Aue, kotou e te au iti tangata o te enua nei, e manganui toku inangaroanga i te akaputuputu ia kotou mei te moa e akakoukou i tana anauanga i raro ake i tona peau, i na ra, kare i tika ia kotou!
25 E manganui toku kapikianga ia kotou na roto i te vaa o taku au tavini, e na roto i te matuapuruanga a te au angela, e na roto i toku nei reo, e na roto i te reo o te au mangungu, e na roto i te reo o te au uira, e na roto i te reo o te au ngaru, e na roto i te reo o te au ngaruerue enua, e te au uriia ua toka maata, e na roto i te reo o te au onge e te au tu makimate ravarai, e na roto i te reo tangi maata o te pu, e na roto i te reo o te akavaanga, e na roto i te reo o te aroa ua kia pou roa te rā, e na roto i te reo o te kakā e te ngateitei e te au apinganui o te ora mutukore, e ka akaora ia kotou ki te akaoraanga mutukore, i na ra, kare ra i tika ia kotou!
26 I na, kua tae mai taua rā ra, e kī ei te kapu o toku riri otooto.
27 I na, tika tikai taku e karanga atu kia kotou, ko teia oki te au tuatua a to kotou Atu to kotou Atua.
28 No reira, e angaanga kotou, e angaanga kotou ki roto i taku kainga vine no te taime openga—e no te taime openga ra, e kapiki atu ki te au tangata e noo i te enua nei.
29 I toku uaorai tuatau e oki atu ei au ki te enua nei no te akavaanga, e ka akaoraia toku au iti tangata, e ka tutara oki matou katoa ki te enua nei.
30 Ka tae mai oki te Aunuingangare maata, taku i tuatua atu ana na roto i te vaa o taku au tavini.
31 E ka tapekaia oki a Satani, e kia tatara akaou ia ake aia, e manga tuatau poto ua tona tutaraanga e ka tae i reira ki te openga o te enua nei.
32 E ko te ka noo ma te tuatuatika tikai, ka tauiia aia mei te kamoanga mata rai te viviki, e ka kore ke atu te enua nei mei te mea e kua pou i te aʼi ra.
33 E ka aere ke atu te aronga kino ki roto i te aʼi mate kore, e ko to ratou openga, kare rava e tangata i te enua nei e kite, e kare rai e kitea, kia tae rava ra ki te tuatau e aere mai ei ratou ki mua iaku no te akavaanga.
34 E akarongo mai kotou ki teia au tuatua. I na, ko au teia ko Iesu Mesia, te Akaora o to te ao nei. E akaputu i teia au mea nei ki roto i to kotou au ngakau, e kia noo mai te au o te tuatau mutukore ki rungaʼo i to kotou au manako.
35 Kia akono meitaki. E kauraro i taku au akaueanga. Koia ïa. Amene.