Scriptures
Te Apiianga E Te Au Koreromotu 62


Tuanga 62

Te eeuanga tei orongaia mai na roto ia Iosepha Timeti te Peroveta, i runga i te nia kauvai ko Missouri, i te rā 13 o Aukete, 1831 (History of the Church, 1:205–206). I teia rā tikai ko te Peroveta e tona pupu, i to ratou aereanga atu mei Independence ki Kirtland, kua aravei atu i te au ereta e aere ra ki te enua ko Ziona, e i muri ake i to ratou araveianga mataora i rauka mai ei teia eeuanga.

1–3, Ko te kite papu, kua tataia te reira i runga i te rangi; 4–9, Ka aere te au ereta ma te tutu aere atu kia tau ki te akavaanga e mei tei akaaereia e te Vaerua.

1 I na, e akarongo mai, e te au ereta o taku akonoanga, te tuatua maira te Atu to kotou Atua, koia oki a Iesu Mesia, to kotou vaa tuatua, tei kite oki i te tu paruparu o te tangata nei, e ka akapeea oki i te akameitakianga mai ia ratou tei timataia.

2 E tika rava, tei runga oki toku mata i te aronga tei kore i aere ake ki te enua ko Ziona; e no reira, kare ta kotou angaanga i akaoti ake.

3 Kareka ra, kua akameitakiia kotou no te kite ta kotou i akakite, kua tataia te reira ki runga i te rangi ra e na te au angela e akara mai i te reira; e kua rekareka mai ratou ia kotou, e kua akakoreia mai ta kotou au ara.

4 E teianei, e aere uatu i to kotou tere. E akaputuputu ia kotou ki rungaʼo i te enua ko Ziona; e ma te rave i tetai uipaanga, e kia mataora kapiti kotou, ma te oronga atu i tetai oroa ki Tei Teitei Roa.

5 Ei reira kotou ka oki mai ei akakite mai i te tuatua, ae, me ko te katoatoa, e me kore ra tatakirua, mei tei tau ua ia kotou, kare au e manamanata i te reira, mari ua kia vai akaronga ra, e kia maroiroi i te akakiteanga i te karere mataora ki te au iti tangata o te enua nei, me kore ra ki rotopu i te au putuputuanga o te aronga kino ra.

6 I na, kua apai mai au, ko te Atu, ia kotou ki te ngai okotai kia tupu oki tei totouia, koia oki, kia akaoraia tei vai akarongo tikai i rotopu ia kotou e kia mataora kapiti kotou i roto i te enua ko Missouri. Te taputou nei au, ko te Atu, ki tei vai akarongo tikai e kare e rauka iaku kia pikikaa.

7 Te akatika nei au, ko te Atu, mei te mea e ka inangaro tetai i rotopu ia kotou i te akaoro na runga i te oroenua, e me kore ra na runga i te atini, e me kore ra na roto i te kariota, ka rauka iaia teia akameitakianga, mei te mea e ka ariki mai aia mei ko mai i te rima o te Atu, ma te ngakau akameitaki maata i roto i te au mea katoatoa.

8 Ka vai teia au mea nei kia kotou kia raveia mei tei tau ki te akavaanga e te au akaaereanga a te Vaerua.

9 I na, no kotou oki te basileia. E i na, tei vaitata ua rai au ki te aronga akarongo i te au taime ravarai. Koia ïa. Amene.