Tuanga 17
Te eeuanga tei orongaia mai na roto ia Iosepha Timeti te Peroveta, kia Oliver Cowdery, David Whitmer, e Martin Harris i Fayette, New York, Tiunu 1829, i mua ua ake i to ratou akaraanga ki te au papa tei kotikotiia no roto oki i te akapapaanga o te Puka a Momoni (History of the Church, 1:52–57). Kua kite a Iosepha e tona tata tuatua ko Oliver Cowdery, na roto i te akaurianga o te Puka a Momoni e e toko toru oki au kite takake te ka ikiia (akara ki te Etera 5:2–4; 2 Niphai 11:3, e te 27:12). Kua akakeuia a Oliver Cowdery, David Whitmer, e Martin Harris na roto i tetai manako akauruia kia riro mai e ko ratou te au kite takake. Kua ui te peroveta ki te Atu, e kua pauia mai na teia eeuanga na roto i te Urima e te Tumima.
1–4, Na roto i te akarongo e kite ei te Kite Toko Toru i te au papa e tetai atu au mea tapu; 5–9, Kua akakite mai te Mesia i tona kite papu no te tu tapu o te Puka a Momoni.
1 I na, te karanga atu nei au kia kotou kia irinaki kotou ki taku tuatua e tikaʼi, e me rave kotou ma te ngakau tae tikai, ka kite oki kotou i te au papa, e pera katoa i te tapoki umauma, te koke a Labana, te Urima e te Tumima, tei orongaia ki te taeake o Iareda i runga i te maunga, i tona tuatuaanga ki te Atu te mata e te mata, e te kaveinga umere tei orongaia kia Lihai, iaia i roto i te medebara i te kotinga o te Tai Muramura.
2 E ka na roto oki i to kotou akarongo e kite ei kotou i te reira, ko taua akarongo rai tei rauka ana i te au peroveta i taito.
3 E i muri ake i te raukaanga ia kotou te akarongo, e kua kite mata tikai oki kotou, ka akakite papu kotou i te reira, na roto i te mana o te Atua;
4 E ko teia oki ta kotou ka rave kia kore taku tavini ko Iosepha Timeti, Tamaiti, e takoreia, e kia akatupu oki au i taku au akakoroanga tika ki te tamariki a te tangata nei na roto i teia angaanga.
5 E ka akapapu oki kotou e kua kite ana kotou i te reira, mei taku tavini rai ko Iosepha Timeti, Tamaiti, i kite i te reira; na roto oki i toku mana i kite ei aia i te reira, no te mea e akarongo tona.
6 E kua akauri oki aia i te puka, i te tuanga tikai taku i akaue atu iaia, e i te mea e te ora nei to kotou Atu e to kotou Atua, kua tika rava te reira.
7 No reira, kua rauka ia kotou taua mana nei, e taua akarongo nei, e taua orongaanga rai mei tei rauka iaia;
8 E me rave kotou i teia au akaueanga openga aku nei, taku i oronga atu kia kotou, kare i reira te au ngutupa o ade e autu ki rungaʼo ia kotou; no te mea kua rava oki toku aroa no kotou, e ka akateiteiia kotou i te rā openga.
9 E kua tuatua atu oki au kia kotou, ko au ko Iesu Mesia, to kotou Atu, e to kotou Atua, kia rauka oki iaku kia akatupu i taku au akakoroanga tika ki te tamariki a te tangata nei. Amene.