Tuanga 25
Te eeuanga tei orongaia mai na roto ia Iosepha Timeti te Peroveta, i Harmony, Pennsylvania, Tiurai 1830 (History of the Church, 1:103–104). (Akara Katoa Ki te upoko o te Tuanga 24.) Kua akaari mai teia eeuanga i te inangaro o te Atu no Emma Smith, koia te vaine a te Peroveta.
1–6, Ko Emma Smith, e vaine ikiia aia, tei kapikiia ei tauturu e ei akapumaana i tana tane; 7–11, Kua kapiki katoa ia aia kia tata, e kia akamārama i te irava tapu, e kia iki i tetai au imene; 12–14, Ko te imene a te aronga tuatua-tika, e pure ïa ki te Atua; 15–16, Ko te au apiianga o te kauraro i roto i teia eeuanga, ka puapinga te reira ki te katoatoa rava.
1 E akarongo mai ki te reo o te Atu toou Atua, iaku e tuatua atu nei kia koe, e Emma Smith, taku tamaine; tika tikai oki taku e karanga atu kia koe, ko te au tangata katoatoa tei ariki i taku evangelia, e au tamaroa e e au tamaine ratou i roto i toku basileia.
2 Te oronga atu nei au i teia eeuanga kia koe no taku i anoano; e me vai akarongo ua rai koe ma te aere mai i te tu tiamā ki mua iaku, ka paruru au i toou oraanga, e ka rauka ia koe tetai ipukarea i Ziona.
3 I na, kua akakoreia taau au ara, e e vaine ikiia oki koe, e naku oki koe i kapiki.
4 Auraka e koumuumu i te au mea taau i kore i kite ana, no te mea kua tapūia atu te reira mei ia koe e to te ao katoa nei, e ko te ravenga pakari teia i roto iaku nei no te tuatau ki mua.
5 E ko te taonga i kapikiiaʼi koe, koia oki kia akapumaana i taku tavini ia Iosepha Timeti, Tamaiti, taau tane, i roto i tona au manamanata, na roto i te tuatua akapumaana, ma te vaerua maru tikai.
6 E ka aru koe iaia i te tuatau e aere ei, e ka noo koe kiaia ei tangata tata nona, me kare atu e tangata ke ei tata nona, e ka tono oki au i taku tavini ia Oliver Cowdery ki te ngai taku ka tono.
7 E ka akataongaia koe i raro ake i tona rima kia akamārama i te au irava tapu, e kia akamaroiroi katoa i te akonoanga, kia tau ki ta taku Vaerua ka oronga mai.
8 E ka tuku oki aia i tona nga rima ki rungaʼo ia koe, e ka ariki koe i te Vaerua Tapu, e ka orongaia atu toou taime no te tataanga, e te apiianga kia maata uatu.
9 E auraka oki koe e mataku, no te mea na taau tane koe e tauturu i roto i te akonoanga; no ratou oki tona kapikianga, e eeuia mai ei te au mea katoatoa kia ratou taku ka anoano, kia tau ki to ratou akarongo.
10 E tika tikai taku e karanga atu kia koe, kia tuku ke atu koe i te au mea o te ao nei, e kia kimi i te au mea o tei meitaki atu.
11 E ka oronga katoa ia mai kia koe, kia rave koe i tetai akaputuputuanga o te au imene tapu, me te ka orongaia atu kia koe, ei marekaanga kiaku, kia raveia oki ki roto i taku akonoanga.
12 Kua rekareka oki toku vaerua i te imene no roto mai i te ngakau; e ko te imene a te aronga tuatua-tika, e pure ïa kiaku, e ka pauia mai na roto i te akameitakianga ki runga i to ratou upoko.
13 No reira, e akateitei i toou ngakau ma te rekareka, e ma te mou piri atu ki te au koreromotu taau i papau.
14 E aere uatu rai na roto i te vaerua maru, e kia matakite i te ngakau parau. Kia mataora toou vaerua i taau tane, e te kakā te ka tae mai ki rungaʼo iaia.
15 E akono uatu rai i taku au akaueanga, e ka rauka ia koe te korona o te tuatua-tika. E me kare koe e rave i teia, kare koe e tae mai ki te ngai taku e noo nei.
16 E tika, tika tikai taku e karanga atu kia koe, ko toku reo teia ki te katoatoa rava. Amene.