Tuanga 59
Te eeuanga tei orongaia mai na roto ia Iosepha Timeti te Peroveta, i Ziona, i Jackson County, Missouri, i te rā 7 o Aukete, 1831 (History of the Church, 1:196–201). I mua uake i tana tataanga i teia eeuanga nei, kua tata atu te Peroveta no te enua ko Ziona, ko te ngai oki i putuputu mai ei te tangata. Kua akatapuia te enua, mei ta te Atu i akakite mai, e kua akatapuia te ngai no te iero te ka akatuia. Kua akataka te Atu i teia au akaueanga nei no te aronga tapu tikai i Ziona.
1–4, Ka akameitakiia te aronga tapu i Ziona me akono meitaki ratou; 5–8, Kia inangaro ratou e kia tavini atu i te Atu ma te akono i tana au akaueanga; 9–19, Me akatapuia te rā o te Atu, ka akameitakiia te aronga tapu i te pae kopapa e te pae vaerua; 20–24, Kua taputouia ki te aronga tuatua-tika e ka rauka ia ratou te au i teianei ao e te oraanga mutukore i te ao e aere mai nei.
1 I na, te tuatua maira te Atu, kia akameitakiia te aronga tei aere mai ki teia enua nei, ma te mata akara tinamou ki toku kakā, kia tau ki taku au akaueanga.
2 Ko te aronga te ora nei e riro ia ratou te enua, e ko te aronga te ka mate kua akangaroi ratou mei ta ratou au angaanga, e ka aru rai oki ta ratou angaanga ia ratou; e ka rauka oki ia ratou tetai korona i roto i te nooanga o taku Metua, taku oki i akapapa no ratou.
3 Ae, kia akameitakiia ratou ko tei tu to ratou vaevae ki runga i te enua ko Ziona, e ko tei akono i taku evangelia; ko to ratou tutaki, koia oki te au mea meitaki o te enua nei, e ka rauka mai oki i roto i tona maroiroi.
4 E, ka akakorona katoa ia oki ratou ki te au akameitakianga no runga mai, ae, ma tetai au akameitakianga katoa kare i te tokoiti ua, e ma te au eeuanga i roto i to ratou tuatau—ko tei tu akarongo ma te maroiroi i mua iaku nei.
5 No reira, te oronga atu nei au i tetai akaueanga kia ratou, i te na ko anga e: E anoano atu koe i to Atu ra i te Atua ma toou ngakau katoa, ma toou maroiroi katoa, toou manako, e te ririnui; e na roto i te ingoa o Iesu Mesia ra e tavini ei koe iaia.
6 E aroa atu kotou i to kotou tangata tupu mei tei aroa ia kotou uaorai. Auraka rava kotou e keia; auraka katoa oki e akaturi, auraka katoa oki e tā ua, e tetai uatu mea mei te reira ra.
7 Kia akameitaki kotou i te Atua no te au mea katoatoa.
8 Kia oronga atu kotou i ta kotou atinga ki te Atu to kotou Atua ma te tika tikai, koia oki ma te ati ngakau e te vaerua akaaka.
9 E kia akono tikai oki kotou ia kotou kia titoutou kore mei te ao nei, kia aere atu kotou ki te are pure e kia rave i ta kotou oroa i toku rā tapu;
10 E tika tikai, e rā teia tei akatakaia no kotou kia akangaroi mei ta kotou angaanga, e kia akameitaki atu i Tei Teitei Roa;
11 Kareka ra, kia raveia ta kotou au tia ma te tika i te au rā ravarai, e i te au taime ravarai;
12 I na ra, kia akamaara e i teia rā nei, te rā o te Atu, kia oronga atu kotou i ta kotou au akameitakianga e ta kotou oroa katoa ki Tei Teitei Roa, ma te aaki atu i ta kotou au ara ki to kotou au taeake, e ki mua katoa i te Atu.
13 E i teia rā nei, auraka rava kotou e rave i tetai atu mea, mari ua kia akapapa i ta kotou kai ma te okotai o te ngakau kia apakore oki ta kotou akakoreanga kai, me kore ra kia kī kotou i te rekareka.
14 Tika tikai, e akakoreanga kai tikai teia e te pure, me kore ra e mataora e te pure.
15 E me rave kotou i teia au mea nei ma te akameitakianga, ma te ngakau e te mata mataora e te tu katakata, kare e akatietie maata, no te mea e ara te reira, mari ua ra ma te ngakau rekareka e te tu katakata—
16 Tika tikai taku e karanga atu, me rave kotou i teia, no kotou te kīanga o te enua nei, te au manu vaevae ā o te kainga e te au manu o te reva, e tei kake na runga i te au pu rakau, e tei aaere na runga i te enua nei;
17 E ko te au rau rakau, e te au mea meitaki tei rauka mai no roto i te enua, noatu e ei kai, me kore ra ei kakau, me kore ra no te are, me kore ra no te aua, me kore no te aua kai, e me kore ra no te ngai tanutanuanga, e me kore ra no te aua vine;
18 Ae, ko te au mea katoatoa tei rauka mai no roto i te enua i tona tuatau tikai, kua angaia te reira ei meitaki no te tangata nei, ei akarekareka i te mata e te ngakau katoa;
19 Ae, no te kai e te kakau katoa, no te tongi e no te ongi katoa, ei akamatutu i te kopapa e te akaoraora katoa i te vaerua.
20 Kua mareka oki te Atua no tei oronga mai aia i teia au mea katoatoa ki te tangata nei; no reira oki ratou i maaniiaʼi, kia taangaangaia, ma te pakari e te tau, e auraka e kaimoumou, eiaa e takingakino atu.
21 E kare atu e mea e mareka kore ei te Atua i te tangata nei, e kare katoa oki aia e riri i tetai, mari ua ra ko te kore e aaki mai no te au mea katoatoa ta tona rima i rave, e tei kore katoa i akono i tana au akaueanga.
22 I na, kua tau teia ki te ture e ta te au peroveta; e no reira, auraka e tamanamanata akaou mai iaku no runga i teia.
23 I na ra, kia kite kotou e, ko tei rave i te angaanga ma te tuatua-tika, e tutaki meitaki tona, koia oki te au i roto i teianei ao, e te oraanga mutukore i te ao a muri ake.
24 Naku, na te Atu, i tuatua atu, e na te Vaerua e akatika mai. Amene.