Tuanga 55
Te eeuanga tei orongaia mai na roto ia Iosepha Timeti te Peroveta, kia William W. Phelps, i Kirtland, Ohio, Tiunu 1831 (History of the Church, 1:184–186). Kua tae ua maira a William W. Phelps, e tangata patupatu peapa aia e tona ngutuare tangata, ki Kirtland; e kua kimi atu te peroveta i te akamāramaanga ki te Atu no runga iaia.
1–3, Kua kapikiia a W. W. Phelps e kua ikiia kia bapetizoia, kia akataongaia ei ereta e kia tutu i te evangelia; 4, E kia tata katoa aia i te au puka na te tamariki i roto i te apii a te Akonoanga; 5–6, E kia aere atu aia ki Missouri, ko tana ngai teia ka angaanga.
1 I na, te tuatua maira te Atu kia koe, e taku tavini e William, ae, te Atu o te ao katoa nei, kua kapikiia koe ma te iki katoa ia; e me oti ake koe i te bapetizoangaia ki te vai, e me rave koe ma te akara tinamou ki toku kakā, ka akakoreia taau au ara, e ka orongaia atu kia koe te Vaerua Tapu na roto i te tukuanga rima;
2 E ka akataongaia koe i reira i raro ake i te rima o taku tavini ko Iosepha Timeti, Tamaiti, kia riro mai koe ei ereta ki teia akonoanga, kia ako atu i te tataraara e te akakoreanga o te ara na roto i te bapetizoanga na roto i te ingoa o Iesu Mesia, te Tamaiti a te Atua ora.
3 E noatu e koai taau ka tuku i toou rima ki runga, me kua akaaka tikai ratou ki mua iaku, ka rauka ia koe te mana kia oronga atu i te Vaerua Tapu.
4 E pera katoa, ka akataongaia koe ei tauturu i taku tavini ia Oliver Cowdery kia rave i te angaanga neneianga, e te iki katoa anga ma te tata i te au puka no te apii i roto i teia akonoanga nei, kia rauka oki i te au tamariki meariki kia apiiia ki mua iaku, e mea mareka oki ïa naku.
5 E pera katoa, tika tikai taku e karanga atu nei kia koe, no teia akakoroanga nei, ka aere koe ma taku nga tavini ko Iosepha Timeti, Tamaiti, e Sidney Rigdon, kia noo mou oki koe ki roto i te enua o toou ipukarea no te rave i te angaanga.
6 E pera katoa, kia aere katoa oki taku tavini ko Joseph Coe ia ratou. Ka akakiteia atu rai te toenga a muri ake, mei taku i anoano. Amene.