Tuanga 53
Te eeuanga tei orongaia mai na roto ia Iosepha Timeti te Peroveta, kia Algernon Sidney Gilbert, i Kirtland, Ohio, Tiunu 1831 (History of the Church, 1:179–180). I te uianga a Sidney Gilbert, kua ui atu te Peroveta ki te Atu no runga i ta Gilbert angaanga e te ikianga i roto i te Akonoanga.
1–3, To Sidney Gilbert kapikiangaia e te ikiangaia i roto i te Akonoanga, ko te akataongaangaia i te ereta; 4–7, Ka riro katoa aia ei mata mei te episekopo rai.
1 I na, te karanga atu nei au kia koe, e taku tavini e Sidney Gilbert, kua akarongo au i taau au pure; e kua pati mai koe kiaku kia akakiteia atu kia koe, e te Atu toou Atua, no runga oki i toou kapikiangaia e toou ikiangaia i roto i te akonoanga, taku oki, ta te Atu, i akatu mai i teia au rā openga nei.
2 I na, ko au ko te Atu, tei akasatauroia no te ara a to teianei ao, e te oronga atu nei au i tetai akaueanga kia patoi atu koe i te au mea o te ao nei.
3 E tuku ki rungaʼo ia koe i taku taongaanga, koia te ereta, kia tutu atu i te akarongo e te tataraara e te akakoreanga o te ara, kia tau ki taku tuatua, e te arikianga a te Vaerua Tapu na roto i te tukuanga rima;
4 E pera katoa kia riro katoa ei mata no teia akonoanga ki te ngai ta te episekopo ka akataka, kia tau ki te au akaueanga te ka orongaia atu a muri ake.
5 E pera katoa, tika tikai taku e karanga atu nei kia koe, ka aere koe ma taku nga tavini ko Iosepha Timeti, Tamaiti, e Sidney Rigdon.
6 I na, ko teia te au angaanga oroa mua taau ka ariki; e ka akakiteia mai rai te toenga kia koe a tetai taime ka aere mai, kia tau ki taau angaanga i roto i taku kainga vine.
7 E pera katoa, te inangaro nei au kia kite koe e, ka akaoraia aia ko tei rave maroiroi e tae uatu ki te openga. Koia ïa. Amene.