Tuanga 9
Te eeuanga tei orongaia mai na roto ia Iosepha Timeti te Peroveta, kia Oliver Cowdery i Harmony, Pennsylvania, Aperira 1829 (History of the Church, 1:37–38). Te akoia nei a Oliver kia akakoromaki, e te patiia nei kia tata, no teia taime ua nei, i te tuatuaanga o te tangata uri reo, kare ra oki e tamata tikai kia akauri.
1–6, Te vai katoa ra tetai au akapapaanga taito te ka akauriia; 7–14, Kua akauriia te Puka a Momoni na roto i te uapouanga i te apii e te akapapuanga a te vaerua.
1 I na, te karanga atu nei au kia koe, e taku tamaiti, i te mea oki e kare koe i akauri mei taau tikai i anoano iaku, e kua akamata akaou i te tata no taku tavini, Iosepha Timeti, Tamaiti, e no reira te manako nei au e kia rave uatu rai koe e oti uatu ia koe teia papaanga tuatua taku i oronga atu kiaia.
2 E i na, e au papaanga tuatua ke atu rai taku, ka oronga atu au kia koe i te mana e raukaʼi ia koe i te tauturu i te akaurianga.
3 Kia akakoromaki, e taku tamaiti, e pakari oki ïa to roto iaku, e kare oki e tau kia akauri koe i teia taime nei.
4 I na, ko te angaanga i kapikiiaʼi koe kia rave, koia oki kia tata no taku tavini ko Iosepha.
5 E, i na, no te mea kare koe i rave uatu rai i taau i akamata, i toou akamataanga kia akauri, i rave ke ei au i teia tikaanga mei ia koe.
6 Auraka e koumuumu, e taku tamaiti, no te mea e pakari oki ïa to roto iaku i akaperaʼi au kia koe i teia tu.
7 I na, kare oki koe i mārama; kua manako oki koe e ka oronga atu au kia koe, i te mea oki e kare koe i tamanako, mari ua ra, kia ui mai koe kiaku.
8 I na ra, te karanga atu nei au kia koe, kia kimi matatio tikai koe i roto i toou manako; e oti e ui mai koe kiaku e me kua tika rai, e mei te mea e kua tika ka akatupu oki au i te maana i roto i toou ngakau; ka kite koe i reira e kua tika.
9 I na ra me kare i tika kare rai aau mea e kite, i na ra, ka noo manako kore ua koe e na te reira e akangaropoina i te mea tarevakē; no reira, kare e rauka ia koe i te tata i te au mea tapu, mari ra, kia orongaia atu e au.
10 I teianei, naringa koe i kite takere i teia, kua akauri takere koe; kareka ra, kare oki e tau kia akauri koe i teianei.
11 I na, e mea tau oki ïa i toou akamataanga; kua mataku ra koe, no reira kua topa te reira taime ki muri, kare e ravea akaou ia i teianei;
12 E, kare ainei koe e kite e kua oronga atu au ki taku tavini kia Iosepha i tetai maroiroi maata rava, kia rave i te reira? E kare oki au i akaapa i tetai o korua.
13 E rave koe i teia mea taku i akaue atu, e ka puapingaia koe. E tu akarongo, e auraka e ariu atu ki te au timataanga.
14 Kia maroiroi koe i roto i te angaanga taku i kapiki ia koe, e kare rava e ngaro tetai io rauru o toou upoko, e ka akateiteiia mai koe a te rā openga. Amene.