Tuanga 34
Te eeuanga tei orongaia mai na roto ia Iosepha Timeti te Peroveta, kia Orson Pratt, i Fayette, New York, i te rā 4 o Noema, 1830 (History of the Church, 1:127–128). E tai ngauru ma iva o Orson Pratt mataiti i te reira taime. Kua ariu mai aia e kua bapetizoia i tona rongo mua anga i te evangelia akaokiia tei akoia mai e tona tuakana ko Parley P. Pratt, e ono epetoma i mua ake. Kua rauka mai teia eeuanga i roto i te ngutuare o Peter Whitmer, Metua.
1–4, Ka riro mai te aronga akarongo ei tamariki na te Atua na roto i te tarangaara; 5–9, Ko te tutuangaia o te evangelia, e teateamamaoanga ïa no te mataara no te Oki Rua Anga Mai; 10–12, Ka tae mai te au totou na roto i te mana o te Vaerua Tapu.
1 E taku tamaiti e Orson, e akarongo mai ma te akara i taku, ta te Atu ta te Atua, ka tuatua atu kia koe, koia a Iesu Mesia toou Akaora;
2 Te mārama e te ora o te ao nei, e mārama tei kakā mai ana i te poiri, e kare ra te poiri i ariki atu;
3 Ko tei aroa atu i to te ao nei, e kua tae rava ki te orongaanga mai i tona uaorai ora, e ko ratou ravarai te ka irinaki ra ka riro mai ratou ei au tamariki tamaroa na te Atua. No reira e tama tamaroa koe naku;
4 E kua akameitakiia koe, no te mea kua irinaki koe;
5 E kua maata atu toou akameitakianga no te mea naku koe i kapiki kia tutu i taku evangelia—
6 Kia akateitei i toou reo mei te tangi o te pu, i te roa e te maata, e kia kapiki atu ki teia uki tangata piko e te maro kia tataraara, e kia akateateamamao i te arataa o te Atu no tona oki rua anga mai.
7 E i na, tika, tika tikai taku e karanga atu kia koe, te vaitata mai nei te tuatau e aere mai ei au na roto i te tiao rangi ma te mana e te kakā maata.
8 E ka riro oki ïa ei rā maata i te taime e aere mai ei au, e ka ruketekete oki te au iti tangata katoatoa.
9 I na ra, i mua ake ka tae mai ei taua rā maata ra, ka akapoiriia te rā, e ka riro te marama mei te toto rai; e kare oki te au etu e akatika mai i to ratou mārama, e ka pururu mai tetai pae, e te tiaki nei te akakoreanga maata i te aronga kino.
10 No reira, e akateitei i toou reo e auraka e tuku ua, no te mea kua tuatuaia maira e te Atu, ko te Atua; e no reira e totou, e ka orongaia mai te reira e te mana o te Vaerua Tapu.
11 E me e akarongo tikai toou, i na, ei vaitata ua rai au ia koe e tae uatu ki te tuatau e aere mai ei au—
12 E tika, tika tikai taku e karanga atu kia koe, ka aere vave mai au. Ko au toou Atu, e toou Akaora. Koia ïa. Amene.