Scriptures
Te Apiianga E Te Au Koreromotu 128


Tuanga 128

E episetole mei ko mai ia Iosepha Timeti te Peroveta ki Te Akonoanga a Iesu Mesia o te Aronga Tapu i te Au Rā i Muri Nei, no runga i te au akaaereanga o te bapetizoanga o tei mate, tataia i Nauvoo, Illinois, i te rā 6 o Tepetema, 1842 (History of the Church, 5:148–153).

1–5, Kia akapapu meitaki te au aronga tata o te au manga e to te akonoanga katoa kia tika te au bapetizoanga no te aronga i mate; 6–9, Kua akamouia ta ratou au tataanga e kua tataia ki runga i te enua e i te rangi; 10–14, E akaaiteanga te ngai bapetizoanga no te vaarua; 15–17, Na Elia te Peroveta i akaoki mai i te mana no runga i te bapetizoanga no tei mate; 18–21, Ko te au taviri katoatoa, te au mana, e te au tikaanga o te au tuatau i topa kua akaokiia mai te reira; 22–25, Kua akakiteia mai te au tuatua mataora e te manea no te aronga e ora nei e no ratou tei mate.

1 Mei taku i akakite atu kia kotou i roto i taku reta i mua ana ka akaruke ei au i toku ngai, e ka tata atu au kia kotou mei tera taime ki tera taime e ma te oronga atu kia kotou i te akamāramaanga no runga i te au tumu tuatua e manganui, te akamata akaou nei au i teianei i te tumu tuatua o te bapetizoanga o tei mate, no te mea kua vai te reira ki roto i toku manako, e kua teimaa a roto iaku, mei te aruangaia mai au e toku au enemi.

2 Kua tata au i tetai nga tuatua eeuanga kia kotou no runga i tetai tangata tata tuatua. E au manako akaou toku no runga i teia, taku e akapapu atu nei. Koia oki, kua akakiteia atu ana i roto i taku pepa mua e ka tu mai tetai tangata tata, ko te ka riro mai ei kite mata, e kia akarongo katoa ki tona nga taringa, e kia tata aia i te tika ki mua i te Atu.

3 E teianei, no runga i teia mea, e mea ngata tikai i tetai tangata tata okotai kia tae i te au taime ravarai, e kia rave i te au angaanga katoatoa. Ei akakore atu i teia manamanata nei, kia ikiia tetai tangata tata i roto i te au manga tatakitai o te oire, e te kite tikai i te tata miniti, e kia tau tikai aia e te tukatau katoa i te raveanga i teia angaanga nei, e ma te akapapuanga i roto i tana tataanga e kua kite tona mata, e kua rongo tona taringa, ma te akakite katoa mai i te rā, e te au ingoa, e pera atu, e te tua katoa o te angaanga katoatoa; e ma te akakite katoa mai e toko toru tangata tei tae ki reira, me e tangata pera tetai, te ka rauka kia kapikiia kia akapapu mai i taua au mea ra, e i roto oki i te vaa o nga kite tokorua me kore e tokotoru e akatinamouiaʼi te au tuatua katoatoa.

4 E kia rave katoa ia mai tetai tangata tata no te katoatoa, e kia orongaia atu teia au tataanga nei kiaia, e kia raveia ma tetai pepa akatikaanga ki rungaʼo i to ratou au ingoa, i te akatinamouanga e kua tika te tataanga tei raveia e ratou. I reira e raukaʼi i te tangata tata o te akonoanga kia tata atu i te reira ki roto i te puka maata o te akonoanga, ma te au pepa tikaanga e te au kite katoa tei tae, ma tana uaorai au tuatua e kua irinaki tikai aia i te au tuatua ma te au tataanga i runga nei e kua tika, na roto i tona uaorai kite no runga i te au tangata katoa tei ikiia e te akonoanga. E me oti teia i te raveia ki runga i te puka maata o te akonoanga; ka riro i reira te reira tataanga ei mea tika e te tapu, e ka pau atu oki ki te au angaanga oroa mei te tu rai e kua kite mata tikai aia e kua akarongo ma tona nga taringa, e kua tata katoa i reira ki runga i te puka maata a te akonoanga.

5 Ka manako paa kotou i teia mea ei akanooanga marie rai; i na ra, kia akakite atu au kia kotou e, ko te pauanga oki teia i te anoano o te Atua, na roto i te aruanga i te angaanga oroa e te akateateamamaoanga ta te Atu i akataonga e i akapapa i mua ake i te akamouangaia te tango o te ao nei, no te akaoraanga o tei mate te ka mate ma te kore rava e kite o te evangelia.

6 E ka inangaro katoa au ia kotou kia akamaara e ko te Tangata Eeu, ko Ioane, kua tuatua ana oki aia no runga i teia tumu tuatua no te aronga i mate, i tona akakiteanga e, ka kitea oki e kotou te reira ki roto i te Apokalupo 20:12E kite atura oki au i tei mate ra, ko te tangata rikiriki e te aronga mamaata, i te tuanga ki mua i te Atua; e eeuia iora nga puka ra, e eeuia iora oki tetai puka ke, koia te puka ora ra, e akavaia iora taua aronga i mate ra i te au tuatua i tataia ra ki roto i taua nga puka ra, i ta ratou au angaanga.

7 Ka kite oki kotou i roto i teia potonga tuatua nei e kua eeuia te nga puka; e kua eeu katoa ia mai tetai puka ke, koia te puka o te ora; i na ra, kua akavaia oki tei mate mei roto mai i te au mea tei tataia ki roto i te nga puka, kia tau oki ki ta ratou au angaanga; Ko te tikaanga tikai, ko teia puka e tuatuaia nei, ko te puka te reira tei tataia ta ratou au angaanga ki roto, e koia oki te au tataanga tei akamouia i te enua nei. E ko teia puka koia te puka o te ora ko te tataanga teia i te rangi; e ko te tikaanga tei akatikaia ki te au apiianga tei akaueia kia kotou i roto i te eeuanga i roto i te reta taku i tata atu kia kotou i mua ake ka akaruke ei au i toku ngai—i roto i ta kotou au tataanga katoatoa, te tata katoa ia ra ïa i te rangi.

8 E teianei, ko te tu o teia angaanga oroa, kua na roto ïa i te mana o te kautaunga, na roto i te eeuanga a Iesu Mesia, e kua akatikaia i reira e ko taau ka akamou i te enua nei, ka akamouia ïa i te rangi, e ko taau e tuku i raro nei e tuku katoa ia ïa i te rangi. E me kore ra, i tetai aiteanga o te akaurianga, ko taau e tata i te enua nei, e tata katoa ia ïa i runga i te rangi, e ko taau e kore e tata i te enua nei, kare katoa ïa e tataia i te rangi; e ka akavaia oki ta kotou aronga tei mate ra mei roto mai i te nga puka ra, kia tau ki ta ratou uaorai au angaanga, me na ratou tikai i rave i te angaanga oroa i propria persona, me kore ra na roto i to ratou uaorai tangata mata, kia tau ki te angaanga oroa ta te Atua i akapapa no to ratou akaoraanga i mua ake i te tango o te ao nei, kia tau oki ki te au tataanga ta ratou i rave no to ratou aronga i mate.

9 Ka riro paa teia ei apiianga pakari ki tetai pae ta tatou oki e tuatua nei—e mana te ka rauka i te tata me kore ra i te topiri i te enua nei e i te rangi katoa. Kareka ra, i roto i te au tuatau o te ao nei, me oronga mai te Atu i tetai tuatau no te kautaunga ki tetai tangata na roto i te eeuanga, me kore ra ki tetai pupu tangata, e oronga ua ia mai ana rai teia mana. No reira, noatu e eaa ta te reira au tangata ka rave na roto i te mana, e na roto i te ingoa o te Atu, e ma te rave tikai e te akarongo katoa, e ma te rave meitaki i te tataanga ma te akarongo mou i te reira, ka riro mai ïa ei ture ki te enua nei e i te rangi katoa, e kare rava ïa e akakoreia kia tau oki ki te au akaue a Iehova ko tei maata. E tuatua akarongo tikai oki teia. Koai te ka akarongo mai i te reira?

10 E pera katoa, ei akaraanga, Mataio 16: 18, 19: E karanga katoa atu au kia koe na, Ko Petero koe; e ki runga i teianei papa e patu ei au i taku ekalesia; e kare rava ïa e rauka i te ngutupa o ade. E oronga atu oki au i te au taviri o te basileia o te ao kia koe: e taau e akamou i raro nei, e akamou katoa ia ïa ki runga i te ao; e taau e tuku i raro nei, e tuku katoa ia ïa i te ao.

11 E teianei, ko te muna maata rava atu o teia au mea katoatoa, e te summum bonum e vai nei i mua ia tatou, no te arikianga mai i te au mana o te Kautaunga Tapu. E kiaia ko tei orongaia atu teia au taviri nei, kare rava e mea e ngata no te raukaanga mai o te kite ma te au tumu no runga i te pirianga atu ki te akaoraanga o te tamariki a te tangata nei, no tei mate e no te ora katoa nei.

12 Teia oki te kakā e te ngateitei, e te kopapa mate kore e te ora mutukore—Te angaanga oroa o te bapetizoanga ki te vai, kia tarukuia ki roto ei akaraanga ki te tu o tei mate, kia taaiteite tetai ki tetai; kia tarukuia ki roto i te vai, e kia kake mai ki runga mei raro mai i te vai koia mei te tutu rai o te tuakaouanga o tei mate i te akatuanga mai mei raro mai i to ratou au vaarua; e kua raveia teia angaanga oroa nei, ei akamou i te pirianga ki te angaanga oroa o te bapetizoanga no tei mate, ei tutu oki no te aronga i mate.

13 No reira, kua akatauia oki te ngai bapetizoanga ki te vaarua te tu, e kua akaueia ki tetai ngai i raro i te ngai i matauia kia uipa te aronga e ora ana, e kia akaari katoa mai i te aronga e ora nei e tei mate, e kia rauka i te au mea katoatoa to ratou uaorai tutu, e kia aiteite tetai ki tetai—te au mea o te kopapa nei ki to te rangi katoa, mei ta Paulo oki i akakite mai, 1 Korinetia 15: 46, 47, e te 48:

14 Kare ra i na mua te kopapa vaerua ra, ko te kopapa tangata ra; e muri akera ko te kopapa vaerua ïa. E one te tangata momua no te enua: kareka te rua o te tangata, ko te Atua ïa no te rangi mai. Ko to te one nei, mei to te one katoa ra ratou; ko to te rangi ra, mei to te rangi katoa ratou. Koia katoa oki te tataanga o te enua nei i te pirianga atu ki to kotou aronga i mate, ko tei angaia tikai, e koia katoa oki te au tataanga i te rangi ra. Ko teia i reira te mana topirianga e te akamouanga, e i tetai aiteanga o te tuatua, te au taviri o te basileia, ko tei roto i te taviri o te kite.

15 E teianei, e aku au taeake akaperepere ma te au tuaine, kia akapapu atu au kia kotou e ko teia au tikaanga nei e pirianga to ratou ki tei mate e te aronga e ora katoa nei e auraka tatou e apai mama ua, no runga i to tatou akaoraanga. Ko to ratou akaoraanga e puapinga ïa no to tatou akaoraanga, mei ta Paulo oki i tuatua no runga i te au metua tane—Naringa oki e kare tatou, kare e rauka ia ratou te tu apakore—e koia katoa oki tatou naringa kare to tatou aronga i mate, kare e rauka ia tatou te tu apakore.

16 E teianei, no runga i te bapetizoanga o tei mate, ka oronga akaou atu au i tetai tuatua a Paulo, 1 Korinetia 15: 29: Kare ra, eaa iora tetai aronga i bapetizoiaʼi ei tuā i te aronga i mate ra, kia kore takiri te aronga i mate ra e tu akaou? Eaa iora ratou i bapetizoiaʼi ei tuā i tei mate ra?

17 E pera katoa, ei kapiti atu ki teia tuatua nei, ka oronga atu au i tetai tuatua na tetai o te au peroveta, ko tei tinamou tona manako e te manakonakoanga ki te akaokianga mai o te kautaunga, e te au kakā te ka eeuia i te au rā openga, e tikai ki teia tumu tuatua kaka roatu no te evangelia mutukore, koia oki, ko te bapetizoanga no tei mate; kua karanga mai oki a Malaki i roto i te pene openga, irava 5 e te 6 e: I na, e tono ana au i te peroveta ra ia Elia kia kotou na, ka tae atu ei ki taua rā maata e te mataku o Iehova ra: E nana e akaariu i te ngakau o te au metua ki te au tamariki, e te ngakau o te au tamariki ki to ratou au metua ra, ko te aere mai aea au e ko te taia aea e au te enua nei ki te taumaa.

18 Ka oronga tikai atu paa au i tetai akaurianga tei māramarama atu, i teia, i na ra, kua rava tikai te mārama ki toku akakoroanga no teia nei. Kua rava ua oki kia kite i reira e ka tae mai te taumaa ki te enua nei, mari ua ra kia vai tetai tu tapekaanga i rotopu i te metua e te tamariki, ki runga i tetai tumu—e i na, eaa taua tumu ra? Ko te bapetizoanga oki o tei mate. Me kare oki ratou, kare e rauka ia tatou te tu apakore; e koia katoa oki ratou e kare e rauka te tu apakore me kare ake tatou. Koia katoa oki ratou e tatou, kare e rauka ia tatou te tu apakore me kare taua aronga ra tei mate ki roto i te evangelia; e mea tau oki i roto i te akamataanga o te tuatau o te kīanga o te au tuatau, e te akamata nei oki taua tuatau i te tupu mai, e kia tupu kapiti meitaki te taokotaianga o te au tuatau ki te ngai okotai, te au taviri, e te au mana, e te au kakā te ka tupu mai, e ka eeuia mai mei te au rā mai o Adamu e tae rava mai ki teia tuatau nei. E kare oki e ko teia ua, pera katoa oki ki te au mea tei kore rava i eeuia mai ana mei te akamouangaia mai te tango o te ao nei, i na ra kua uunaia mei te aronga pakari e te karape, e ka eeuia mai ki te au pēpe kai ū i roto i te tuatau o te kīanga o te au tuatau.

19 E teianei, eaa ta tatou e akarongo nei i roto i te evangelia ta tatou i ariki? E reo mataora! E reo aroa no te rangi mai; e te reo o te tuatua-mou no raro mai i te enua; e karere mataora no te aronga i mate; e reo mataora no te aronga e ora nei e tei mate katoa; e karere mataora e te rekareka maata. Kare e aiteia te manea i te vaevae o tei tu ki runga i te maunga ko tei apai mai i te karere o te au mea memeitaki, e tei karanga atu kia Ziona e: I na, te tutara ra to Atua! Mei te au o Karamela te tu, mei te reira katoa oki te kite o te Atua te ka tae mai ki rungaʼo ia ratou!

20 E pera katoa, eaa ta tatou e akarongo nei? E karere mataora mei Kumora mai! Ko Moronai, e angela no te rangi mai, i te akakiteanga mai i te akakīkīanga o te au peroveta i tuatua na e ka tupu—ka eeuia mai te puka. E reo no te Atu i roto i te medebara o Fayette, Seneca County, i te akakiteanga i te au kite tokotoru te ka akakite mai i te puka! Te reo o Mikaela i te pae i te kauvai ko Susquehanna, i te kiteanga i te diabolo i te mamaanga mai mei te angela o te mārama! Te reo o Petero, Iakobo, e Ioane i roto i te medebara i rotopu ia Harmony, Susquehanna County, e Coleville, Broom County, i runga i te kauvai ko Susquehanna, i te akakiteanga mai e tei a ratou te au taviri o te basileia, e to te tuatau o te kīanga o te au tuatau!

21 E pera katoa, te reo o te Atua i roto i te pia o te Metua Tane ruaine ko Whitmer, i Fayette, Seneca County, e i roto i tetai au atianga e i tetai au ngai na roto i te au aerenga e te au tumatetenga o teia Te Akonoanga a Iesu Mesia o te Aronga Tapu i te Au Rā i Muri Nei! E te reo katoa o Mikaela, te angela maata; te reo o Kabiriela, e to Raphaela, e te au angela tukeke, mei ia Mikaela me kore ra ko Adamu e tae rava mai ki teia tuatau nei, i te akakiteanga mai ratou pouroa i to ratou au tuatau, to ratou au tikaanga, ta ratou au taviri, to ratou tu ngateitei, to ratou tu ariki e te kakā, e te mana o to ratou kautaunga; e te orongaanga mai na rungaʼo te ture i te ture, na rungaʼo te akaueanga i te akaueanga; ki konei tetai vai iti, ki ko atu tetai vai iti; e te orongaanga mai i te akapumaana kia tatou na roto i te akamaaraanga mai i te ka tupu, e te akatinamouanga i to tatou manakonakoanga!

22 E te au taeake, kare ainei tatou e rave uatu rai i teia akakoroanga maata nei? E aere ki mua e auraka e oki ki muri. Akamaroiroi e te au taeake; e tae uatu ki te re! Kia rekareka to kotou au ngakau, e kia rere ua i te rekareka. Kia imene pu ua to te enua nei. E kia tuatua mai tei mate na roto i te imene akameitakianga mutukore ki te Ariki Imanuela, ko tei akataongaia, i mua ake i te anga ia anga o te ao nei, i rauka oki ia tatou kia akaora ia ratou mei roto mai i to ratou ngai tapekaanga; kia matara mai oki te au mouauri.

23 Kia kapiki pu mai te au maunga ma te rekareka, e kotou te au ō katoa i te avaanga mai; e pera katoa kotou te au moana e te au enua maro kia akakite mai i te au angaanga umere a to kotou Ariki Mutukore! E ko kotou oki e te au kauvai, te au pekavai, te au arā vai, kia tae ua kotou ma te rekareka. Kia akameitaki oki te au rakau, e te au pu rakau katoatoa o te aua i te Atu; e ko kotou e te au toka ketaketa, kia aue kotou i te rekareka! E kia imene kapiti oki te rā, te marama, e te au etu popongi, e kia maeva pouroa te au tamaroa a te Atua i te rekareka! E kia akakite mai oki te au angaanga mutukore i tona ra ingoa e tuatau e tuatau uatu! E te karanga akaou atu nei au, kare i aiteia te kakā i te reo ta matou i rongo mei te rangi mai, i te akakiteanga mai ki roto i to matou au taringa, i te kakā, e te akaoraanga, e te ngateitei, e te kopapa mate kore, e te ora mutukore, te au basileia, te ui ariki, e te au mana!

24 I na, te vaitata mai nei oki te rā maata o te Atu; e koai te ka tae ki taua rā e aere mai ei aia, e koai te ka tu me mama mai aia? Kua aite oki aia mei tetai aʼi tamā tikai, e mei te pua a te tangata pua kakau; e ka noo oki aia mei tetai tangata tamā i te tamā i te ario, e ka akatiamā aia i te au tamaroa a Levi, e ka tamā i to ratou au kino mei te auro e te ario te tu, kia rauka oki ia ratou kia oronga atu ki te Atu i tetai atinga ma te tika tikai. No reira, kia rauka ia tatou ei akonoanga, e ei iti tangata, e ei Aronga Tapu i te Au Rā i Muri Nei, kia oronga atu ki te Atu i tetai orongaanga ma te tika tikai; e kia oronga oki tatou i te reira ki roto i tona ra iero tapu, me oti ake, koia te puka no te au tataanga o to tatou aronga i mate, ei mea tau tikai no te arikianga mou ravarai.

25 E te au taeake, e maata taku au mea ka tuatua atu kia kotou no runga i teia tumu tuatua nei; i na ra, ka akamotu au no teia taime, e ka akapou atu i teia tumu tuatua a tetai taime. Ko au teia, ko to kotou tavini akaaka e te taeake taruri kore e tuatau uatu,

Iosepha Timeti.