Tuanga 100
Te eeuanga tei orongaia mai kia Iosepha Timeti te Peroveta e Sidney Rigdon, i Perrysburg, New York, i te rā 12 o Okotopa, 1833 (History of the Church, 1:416, 419–421). Ko teia nga taeake tokorua, kua atea mai mei to raua ngutuare tangata no te au rā e manganui, e kua tupu to raua manamanata no ratou.
1–4, Na Iosepha e Sidney e ako atu i te evangelia no te akaoraanga o te au vaerua; 5–8, Ka orongaia atu kia raua ta raua ka tuatua i te ora tikai ka tuatuaʼi raua; 9–12, Ko Sidney te vaa tuatua e ko Iosepha te eeu tuatua e te ririnui i roto i te kite papu; 13–17, Ka akatu te Atu i tetai iti tangata tiamā, e ka akaoraia te aronga kauraro.
1 Tika tikai, te tuatua maira te Atu kia korua, e taku nga taeake e Sidney e Iosepha, te meitaki ua ra to korua kopu tangata; tei roto ratou i toku nei rima, e ka rave au ia ratou kia tau ki taku ka manako: tei aku oki te au mana katoatoa.
2 No reira, e aru mai iaku, e ariki mai i te au tuatua taku ka oronga atu kia korua.
3 I na, e i na ra, e maata taku au tangata i roto i teia ngai, e te au tuanga e pini uake, e kia akatueraia tetai ngutupa ki roto i te au tuanga e pini uake ra i roto i teia enua i te itinga o te rā.
4 No reira oki au, ko te Atu, i inangaro ei ia korua kia aere mai ki teia ngai; kua tau oki iaku no te akaoraanga o te au tangata.
5 No reira, tika tikai taku e karanga atu kia korua, ka akateitei ua i to korua reo ki teianei au tangata; e akakite atu i te au manako taku e tuku atu ki roto i to korua ngakau, e kare rava korua e rauka kia taakamaia i mua i te aroaro o te tangata;
6 E ka orongaia atu te reira kia korua i te ora, ae, i te atianga tikai, i ta korua ka tuatua.
7 I na ra e akaueanga taku e oronga atu kia korua, kia tuatua korua e noatu e eaa ta korua ka tuatua na roto i toku nei ingoa, ma te ngakau meitaki, i roto i te vaerua maru, i te au mea katoatoa.
8 E te oronga atu nei au i teia taputou kia korua, e me ka rave korua i teia ka riringiia mai te Vaerua Tapu kia korua i te akapapuanga i te au mea ravarai ta korua ka tuatua.
9 E kua tau tikai iaku e ko koe, e taku tavini e Sidney te vaa tuatua ki teianei au tangata; ae, tika tikai, ka akataonga au ia koe no teia kapikianga, e ei vaa tuatua koe no taku tavini ko Iosepha.
10 E oronga oki au i te mana kiaia kia ririnui i roto i te kite papu.
11 E oronga atu oki au i te mana kia koe kia ririnui koe i te akoanga i te au irava tapu katoatoa, e ko koe rai tona vaa tuatua, e koia te tangata eeu kia koe, kia kite koe i te tu papu o te mea katoatoa no runga i te au mea o toku nei basileia i te enua nei.
12 No reira, ka aere uatu rai i to korua tere ma te ngakau mataora; i na e i na ra, ei vaitata ua rai au ia korua e tae uatu ki te openga.
13 E teianei te oronga atu nei au kia korua i te tuatua no runga ia Ziona. Ka akaoraia a Ziona, noatu ra ka akautungaia ra aia no tetai tuatau poto ua.
14 Ko toou au taeake, taku nga tavini ko Orson Hyde e John Gould, tei roto ïa i toku rima, e me akono raua i taku au akaueanga e ora ïa raua.
15 No reira, kia pumaana to korua ngakau; ka angaanga kapiti oki te au mea katoatoa no te meitaki no ratou te ka aere ma te tiratiratū, e no te akatapuanga i te akonoanga.
16 E akatu oki au i tetai au tangata tiamā noku, te ka kauraro iaku ma te tuatua-tika;
17 E ko te aronga katoa tei kapiki ki te ingoa o te Atu, e kua akono i tana au akaueanga, ka ora ia. Koia ïa. Amene.