Tuanga 97
Te eeuanga tei orongaia mai na roto ia Iosepha Timeti te Peroveta, i Kirtland, Ohio, i te rā 2 o Aukete, 1833 (History of the Church, 1:400–402). Ko teia eeuanga no runga tikai i te oraanga o te aronga tapu i Ziona, i Jackson County, Missouri, e pauanga ki te uianga a te Peroveta ki te Atu no tetai akamāramaanga. Tei roto oki te au mema o te Akonoanga i Missouri i taua tuatau ra i te takingakino maata, e i roto ia Tiurai i te rā 23, 1833, kua maroia atu kia taina i tetai pepa akatikaanga kia akaruke ia Jackson County.
1–2, E maata tikai te aronga tapu i Ziona (i Jackson County, Missouri) tei akameitakiia no to ratou akarongo tikai; 3–5, Kua akapaapaaia atu a Parley P. Pratt no tana au angaanga i roto i te apii i Ziona; 6–9, Ko ratou tei akono i to ratou au koreromotu kua arikiia mai e te Atu; 10–17, Kia akatuia tetai are i Ziona i reira tei tiamā te ngakau e kite ei i te Atua; 18–21, Ko Ziona oki tei tiamā te ngakau; 22–28, Ka ora mai a Ziona mei roto mai i te akautungaanga a te Atu me e akarongo tona.
1 Tika tikai taku e karanga atu kia kotou e taku au taeake, te tuatua atu nei au kia kotou ma toku reo, koia te reo o taku Vaerua, kia rauka oki iaku kia akaari atu kia kotou i toku anoano no runga i to kotou ai taeake i te enua ko Ziona, e manganui oki ratou tei akaaka tikai e te kimi maroiroi nei kia rauka te pakari e kia kitea katoa te tuatua-mou.
2 Tika, tika tikai taku e karanga atu kia kotou, kia akameitakiia ratou, ka rauka oki te reira; ka akaari atu oki au, ko te Atu, i te aroa ua ki tei maru, ki tetai uatu taku i anoano, kia rauka oki iaku kia akatikaia me tae ki te tuatau e apai mai ei au ia ratou ki te akavaanga.
3 I na, te karanga atu nei au kia kotou, no runga oki i te apii i Ziona, kua mareka tikai oki au, ko te Atu, no te mea e apii tetai i Ziona, e pera katoa ki taku tavini ko Parley P. Pratt, te noo nei oki aia kiaku nei.
4 E me ka noo tamou uatu rai aia kiaku ka akaaere ua rai i te apii i te enua ko Ziona e tae uatu ki te tuatau e oronga akaou atu ei au i tetai au akaueanga kiaia.
5 Ka akameitaki au iaia ki te au akameitakianga e manganui, na roto i te akakiteanga i te au irava tapu e te au mea muna ei akameitaki i te apii, e te akonoanga katoa i Ziona.
6 E ki te toenga o te apii, te anoano nei au, ko te Atu, kia akaari atu i te aroa ua; kareka ra, te vai ra te aronga te ka anoanoia kia akoia, e ka akakiteia mai rai ta ratou au angaanga.
7 Te vai ra te toki i te pu rakau; e ko te au pu rakau kare e ua mai i te meitaki, ka tipuia ki raro e ka tiriaia ki roto i te aʼi. Naku oki, na te Atu, i tuatua atu i te reira.
8 Tika tikai taku e karanga atu kia kotou, ko ratou pouroa tei kite e te tiratiratū ra to ratou au ngakau, e kua atingakau, ma te vaerua akaaka, e te anoano ra kia akono i ta ratou au koreromotu na roto i te akaatingaanga—ae, ko te au akaatingaanga taku, ta te Atu, ka akaue atu—ka ariki au i te reira.
9 Naku, na te Atu, e aka ua ia ratou mei te pu rakau uua tikai tei tanumiaia ki runga i tetai enua meitaki tikai, i te pae i tetai pekavai mā tikai, te ka ua mai i te au ua memeitaki.
10 Tika tikai taku e karanga atu kia kotou, ko toku anoano ïa kia akatuia tetai are noku ki te enua ko Ziona, e kia aite ki te akaraanga taku i oronga atu kia kotou.
11 Ae, kia akatu viviki ia, na roto i te tuanga ngauru a toku iti tangata.
12 I na, ko teia oki te tuanga ngauru e te akaatinga taku ta te Atu i anoano mei to ratou au rima, kia akatuia oki tetai are kiaku no te akaoraanga o Ziona—
13 Ei ngai akameitakianga no te aronga tapu katoatoa, ei ngai akamāramaanga katoa no te aronga katoatoa tei kapikiia ki te angaanga tutu evangelia i roto i to ratou au kapikianga e to ratou au taonga katoa;
14 Kia rauka oki ia ratou te māramaanga apakore o ta ratou angaanga, i roto i te au akamanakoanga, te au ture, e i roto i te apiianga, e i roto i te au mea katoatoa no runga i te basileia o te Atua i te enua nei, e ko te au taviri no taua basileia ra tei orongaia atu kia koe.
15 E me akatu toku iti tangata i tetai are kiaku na roto i te ingoa o te Atu, e ma te kore e akatika i tetai mea viivii kia tomo mai ki roto, e kia kore oki e akaviiviiia, ka noo toku kakā ki runga i reira;
16 Ae, e tei reira oki toku tu, ka aere mai oki au ki roto i reira, e te katoatoa tei mā te ngakau te ka aere mai ki roto i reira ka kite ïa i te Atua.
17 I na ra, me taviiviiia kare au e aere atu ki roto, e kare toku kakā e noo ki reira; kare oki au e aere atu ki roto i te au iero tapu kore.
18 E teianei, i na, me ka rave a Ziona i teia au mea nei ka puapinga ïa aia, e ka totoa oki aia e ka riro mai ei mea kakā tikai, ei mea maata rava, e te rikarika.
19 E ka akangateitei te au iti tangata o te enua nei iaia, e ka karanga e: Tika rava ko Ziona rai te oire o to tatou Atua, e kua papu rava e kare a Ziona e inga, e kare katoa oki e akaateaia mei tona ra ngai, tei reira oki te Atua, e tei reira katoa oki te rima o te Atu;
20 E kua taputou oki aia na roto i te mana o tona ririnui kia riro ei akaora nona, e ei punanga teitei nona.
21 No reira, tika tikai, te tuatua maira te Atu, kia rekareka e Ziona, no te mea ko teia tikai oki a Ziona—te ngakau tiamā; e no reira, kia rekareka e Ziona, e kia mii te aronga kino.
22 E i na, ka tae viviki mai oki te tutaki akaoko ki rungaʼo i te aronga kino mei te matangi puaioio te tu; e koai te ka ora mai?
23 Ka na te pae ua oki te uepu a te Atu ia ratou i te po e te ao, e ka tae oki te akakiteanga ki te au tangata ravarai; ae, e kare oki e akangaroi e tae ua mai te Atu;
24 Kua tae rava oki te riri o te Atu no ta ratou ara e ta ratou au angaanga kikino.
25 Kareka ra, ka ora a Ziona mei te mea e ka akono aia i te au mea ravarai taku i akaue atu kiaia.
26 I na ra, me kore aia e rave i te au mea taku i akaue atu kiaia, ka tae atu au ka atoro iaia kia tau ki tana au angaanga, ma te maki mamae, ma te maki mate, ma te mate maata, ma te koke, ma te tutakitaki, e te aʼi mura kakai.
27 Kareka ra, e tatau i teia ki tona taringa, kua ariki oki au, ko te Atu, i tana orongaanga; e me kare oki aia e ara akaou, kare tetai o teia au mea nei e tae kiaia;
28 E ka akameitaki au iaia ki te au akameitakianga, e ka akamaata au e kia manganui uatu te au akameitakianga ki rungaʼo iaia, e ki rungaʼo i tona uki e tuatau e tuatau uatu, te tuatua maira te Atu toou Atua. Amene.