Tuanga 83
Te eeuanga tei orongaia mai na roto ia Iosepha Timeti te Peroveta, i Independence, Missouri, i te rā 30 o Aperira, 1832 (History of the Church, 1:269–270). Kua arikiia mai teia eeuanga nei i te tuatau te uipaanga ra te Peroveta e tona au taeake.
1–4, E tikaanga to te au vaine e ta ratou au tamariki ki ta ratou au tane e to ratou au metua tane no to ratou tauturu; 5–6, E tikaanga to te au vaine takaua e te au tamariki otare ki te Akonoanga no to ratou tauturu.
1 Tika tikai te tuatua maira te Atu, i runga atu i te au ture o te akonoanga no runga i te au vaine ma te au tamariki, ko tei piri mai ki te akonoanga e kua mate ta ratou au tane, me kore ra to ratou au metua tane:
2 E tikaanga to te au vaine ki ta ratou au tane no to ratou oraanga, e tae uatu ki te tuatau e apainaiaʼi ta ratou au tane; e me kare a ratou aati ture i rave ka akonoia mai ratou ki roto i te akonoanga.
3 E me kare ra ratou e tu akarongo ana, kare ratou e akonoia mai ki te akonoanga; i na ra, ka noo rai ratou ki runga i to ratou ipukarea kia tau ki te au ture o te enua.
4 E tikaanga to te au tamariki katoatoa ki to ratou au metua no to ratou oraanga e tae uatu to ratou au mataiti no te kimi i to ratou puapinga.
5 E i muri ake i te reira, e tikaanga to ratou ki te Akonoanga, koia oki, ki te are vairanga kai o te Atu, mei te mea e kare o to ratou au metua mea ei oronga atu i tetai ipukarea no ratou.
6 E ka vai oki te are vairanga na roto i te au akatapuanga a te akonoanga; e ka tauturuia oki te au vaine takaua, e te au matiroeroe, e pera katoa tei putaua. Amene.