Scriptures
Te Apiianga E Te Au Koreromotu 15


Tuanga 15

Te eeuanga tei orongaia mai na roto ia Iosepha Timeti te Peroveta, kia John Whitmer, i Fayette, New York, Tiunu 1829 (History of the Church, 1:50). (Akara ki te upoko o te Tuanga 14.) E tuatua puapinga maata e te manea teia nona, e kua akakite mai oki te Atu i tetai mea ta John Whitmer anake i kite ana. Kua riro mai a John Whitmer i muri mai e ko tetai o te au Kite Toko Varu ki te Puka a Momoni.

1–2, Tei rungaʼo te rima o te Atu i te au enua katoatoa; 3–6, Ko te mea puapinga rava atu ko te tutuanga o te evangelia e te akaoraanga i te au tangata e manganui.

1 E akarongo mai, e taku tavini e John, e akarongo mai ki te tuatua a Iesu Mesia, toou Atu e toou Akaora.

2 E i na, te tuatua atu nei au ma te pakari e te mana kia koe, i na, tei rungaʼo i te enua katoa nei oki toku rima.

3 E ka akakite atu au i tetai mea kare rava tetai tangata e kite, mari ua ra ko koe e au anake—

4 Kua anoano ana oki koe i te au taime e manganui kia kite e ko teea te mea puapinga rava atu kia koe.

5 I na, kia akameitakiia koe no teia mea nei, e no te tuatuaanga i taku au tuatua taku i oronga atu kia koe kia tau ki taku au akaueanga.

6 E teianei, i na, te karanga atu nei au kia koe, e ko te mea te ka puapinga rava atu kia koe, koia oki, kia akakite atu koe ki teia iti tangata kia tataraara, kia rauka ia koe i te arataki mai i te au vaerua kiaku, e kia noo oki koe ma ratou katoa i roto i te basileia o taku Metua. Amene.