Scriptures
Te Apiianga E Te Au Koreromotu 75


Tuanga 75

Te eeuanga tei orongaia mai na roto ia Iosepha Timeti te Peroveta, i Amherst, Ohio, i te rā 25 o Tianuare, 1832 (History of the Church, 1:242–245). Ko te akakoroanga, ko tetai uipaanga tei akatakaia i mua ake. I teia uipaanga kua turuia e kua akataongaia a Iotepa Timeti ei Peresideni no te Kautaunga Teitei. Ko tetai au ereta, tei na roto i tetai au mea rauka ngata i te apaianga mai i tetai au tangata kia mārama i ta ratou tuatua, e kua anoano atu oki kia akamaata i to ratou kite no ta ratou au angaanga. Kua aru mai teia eeuanga.

1–5, Ko te au ereta tei akarongo tikai e tei tutu i te evangelia kua rauka te ora mutukore; 6–12, E pure kia tae mai te Akapumaana, koia te ka apii i te au mea katoatoa; 13–22, Ka noo te au ereta ei akava i tei patoi i ta ratou karere; 23–36, Ko te kopu tangata o te au ereta ka rauka mai te tauturu no ko mai i te Akonoanga.

1 Tika, tika tikai taku e karanga atu kia kotou, ko au e tuatua atu nei na roto i te reo o toku Vaerua, koia te Alepha e te Omega, to kotou Atu e to kotou Atua—

2 E akarongo mai kotou ko tei akakite mai i to kotou au ingoa no te aere atu i te akakite aere i taku evangelia, e te topetope i taku kainga vine.

3 I na, te karanga atu nei au kia kotou e ko toku anoano teia kia aere atu kotou e auraka e noo, e auraka katoa e kope ua, kia angaanga ra ma to kotou ririnui katoa—

4 I te akateiteianga i to kotou reo mei te tangi o te pu, i te akakiteanga i te tuatua-mou kia tau ki te au eeuanga e te au akaueanga taku i oronga atu kia kotou.

5 E me tu akarongo tikai kotou, ka tukuia tetai au ruru sitona ki rungaʼo ia kotou, e ka akakoronaia kotou ki te ngateitei, e te kakā, e te kopapa mate kore, e te ora mutukore.

6 No reira, tika tikai taku e karanga atu ki taku tavini e William E. McLellin, te akakore nei au i te akatikaanga taku i oronga atu kiaia kia aere atu ki te au enua i te pae itinga;

7 E te oronga atu nei au i tetai akatikaanga ou e tetai akaueanga ou katoa, e ako atu nei oki au, ko te Atu, iaia no te au koumuumu o tona ngakau;

8 E kua ara aia; kareka ra, kua akakore ra au i tana ara ma te karanga akaou atu kiaia e, e aere ki te au pa enua i apatonga.

9 E kia aru katoa taku tavini a Luke Johnson iaia, e ma te akakite atu i te au mea taku i akakite atu kia raua—

10 E ma te kapiki atu i te ingoa o te Atu no te Akapumaana, ko te ka apii atu ia raua ki te au mea katoatoa tei tau no raua—

11 E ma te pure putuputu uatu rai kia kore oki raua e matapoiriia; e me rave oki raua i teia, ka noo tika au kia raua e tae uatu ki te openga.

12 I na, ko te anoano teia o te Atu to kotou Atua no runga ia korua. Koia ïa. Amene.

13 E pera katoa, tika tikai te tuatua maira te Atu, kia aere atu taku tavini a Orson Hyde e taku tavini katoa ko Samuel H. Smith ki to raua tere ki te pae enua i te itinga, e ma te akakite atu i te au mea taku i akaue atu kia raua; e me tu akarongo raua, i na, ei vaitata ua rai au ia raua e tae uatu ki te openga.

14 E pera katoa, tika tikai taku e karanga atu ki taku tavini ko Lyman Johnson, e ki taku tavini katoa ko Orson Pratt, ka aere katoa atu oki raua ki to raua tere ki te au enua i te itinga; e i na, ei vaitata katoa oki au ia raua, e tae uatu ki te openga.

15 E pera katoa, te karanga akaou atu nei au ki taku tavini ko Asa Dodds, e ki taku tavini katoa ko Calves Wilson, kia aere katoa atu raua ki te au enua i te opunga, e ma te akakite atu i taku evangelia, mei taku rai oki i akaue atu ia raua.

16 E ko tei vai akarongo tikai ka autu aia i te au mea katoatoa, e ka akateiteiia mai oki ki runga i te rā openga.

17 E pera katoa, te karanga akaou atu nei au ki taku tavini ko Major N. Ashley, e ki taku tavini katoa ko Burr Riggs, kia aere katoa atu oki raua ki te au enua i te tonga.

18 Ae, kia aere pouroa oki ratou i to ratou tere, kia tau ki taku i akaue atu ia ratou, kia aere mei tetai are e ki tetai are, e mei tetai tapere ki tetai tapere, e mei tetai oire ki tetai oire.

19 E noatu e eaa te are ta kotou ka tomo, e ariki ia mai kotou, e akaruke atu i ta kotou akameitakianga ki taua ngutuare ra.

20 E noatu e eaa te are ta kotou ka tomo, e kare ratou e ariki mai ia kotou, e aere viviki atu mei taua are ra, e ma te ruru atu i te repo i to kotou vaevae ei kite no ratou i tei patoi mai ia kotou.

21 E ka kī oki kotou i te rekareka e te mataora; e kia kite oki kotou e, me tae ki te rā akavaanga ko kotou te au akava no taua ngutuare ra, e na kotou e akaapa katoa atu ia ratou;

22 E ngari ake to te au etene kia tae ki te rā akavaanga, i to te aronga o taua ngutuare ra; no reira, e tatua i to kotou taukupu ma te tu akarongo, e ka rauka i reira ia kotou kia autu i te au mea katoatoa, e ka akateiteiia mai i te rā openga. Koia ïa. Amene.

23 E pera katoa, te tuatua mai nei te Atu kia kotou, e kotou e te au ereta o taku akonoanga, ko tei oronga mai i to kotou au ingoa kia kite oki kotou i tona anoano no runga ia kotou—

24 I na, te karanga atu nei au kia kotou, ko te angaanga ïa a te akonoanga kia tauturu atu i te au kopu tangata, e kia tauturu katoa atu i te au kopu tangata o te aronga tei kapikiia e te ka tonoia atu kia akakite i te tuatua o te evangelia ki to te ao nei.

25 No reira, te oronga atu nei au, ko te Atu, i teia akaueanga kia kotou, kia rauka mai ia kotou tetai au ngai no to kotou au kopu tangata, mei te mea e ka akatuera mai to kotou au taeake i to ratou ngakau.

26 E ki te aronga katoatoa te ka rauka mai tetai ngai no to ratou au kopu tangata, e pera katoa te tauturu a te akonoanga no ratou, auraka ratou kia kope i te aere atu ki to te ao nei, noatu e ki te itinga me ki te opunga, ki te tokerau me ki te tonga.

27 E pati ratou, e ka rauka ia ratou, e topapa, e ka akatueraia mai kia ratou, e ka akakiteia mai oki no runga mai, e te Akapumaana, e ka aere ratou kiea.

28 E pera katoa, tika tikai taku e karanga atu nei kia kotou, ko te au tangata katoatoa te ka inangaroia kia tauturu i tona uaorai kopu tangata, e rave aia, e kare aia i reira e ngere i tona korona; e kia angaanga oki aia i roto i te akonoanga.

29 Kia maroiroi te au tangata tatakitai i roto i te au mea katoatoa. E ko tei noonoo ua, kare ona ngai i roto i te akonoanga, mari ra kia tataraara aia ma te akatano i tona uaorai ravenga.

30 No reira, kia kapitiia taku tavini a Simeon Carter e taku tavini ko Emer Harris ki roto i te angaanga;

31 E pera katoa taku tavini ko Ezra Thayre e taku tavini a Thomas B. Marsh;

32 E pera katoa taku tavini a Hyrum Smith e taku tavini ko Reynolds Cahoon;

33 E pera katoa taku tavini ko Daniel Stanton, e taku tavini ko Seymour Brunson;

34 E pera katoa taku tavini ko Sylvester Smith, e taku tavini ko Gideon Carter;

35 E pera katoa taku tavini ko Ruggles Eames, e taku tavini ko Stephen Burnett;

36 E pera katoa taku tavini ko Micah B. Welton e taku tavini katoa ko Eden Smith. Koia ïa. Amene.