Tuanga 11
Te eeuanga tei orongaia mai na roto ia Iosepha Timeti te Peroveta, ki tona tuakana ko Hyrum Smith, i Harmony, Pennsylvania, Me 1829 (History of the Church, 1:39–46). Kua rauka mai teia eeuanga na roto i te Urima e te Tumima ei pau atu ki te pure e te uianga a Iosepha. Kua taiku mai te puka “History of the Church” e kua rauka mai teia eeuanga i muri ake i te akaokianga mai o te Kautaunga o Aarona.
1–6, Te rave angaanga i roto i te kainga vine ka rauka ia ratou te akaoraanga; 7–14, Kimi i te pakari, akakite kia tataraara, irinaki i te vaerua; 15–22, Akono i te au akaueanga e uapou i te tuatua a te Atu; 23–27, Auraka e patoi i te vaerua o te eeuanga e to te totou; 28–30, Ko ratou tei ariki i te Mesia, ka riro mai ei au tamaroa na te Atua.
1 E angaanga maata e te umere te ka tae mai ki rotopu i te tamariki a te tangata nei.
2 I na, ko au te Atua; e akarongo mai ki taku tuatua, e mea ora oki ïa e te ririnui, e kokoi maata oki to te reira i to te koke matarua, i te vai ia anga i rotopu i te au paupauanga e te au roro o te ivi katoa; no reira e akarongo mai ki taku au tuatua.
3 I na, kua teatea te kainga e kua mou; no reira, ko tei anoano i te kokoti kia vero aia ki tana matipi ma tona maroiroi, e kokoti koi vai ake te rā, e raukaʼi iaia kia akaputuputu no tona vaerua i te akaoraanga mutukore i roto i te basileia o te Atua.
4 Ae, ko te ka vero ki tana matipi e ka kokoti, na te Atua aia e kapiki.
5 No reira, me ka pati mai koe kiaku ka rauka ïa ia koe; me ka topapa mai koe, ka tueraia mai kia koe.
6 I teianei, mei taau i pati, i na, te karanga atu nei au kia koe, e akono i taku au akaueanga, ma te kimi kia rauka mai e kia akatumu i te akakoroanga o Ziona.
7 Auraka e kimi i te au mea e apinga nui ei, mari ra ko te pakari, e i na, ka eeuia mai te au mea muna a te Atua kia koe, ei reira koe e apinga nui ei. I na, ko tei rauka iaia te ora mutukore, kua apinganui aia i reira.
8 Tika, tika tikai taku e karanga atu kia koe, mei taau oki e anoano iaku ra, ka pera rai kia koe; e, me te anoano ra koe, naau i reira e rave i te au mea memeitaki i rotopu i teia uki nei.
9 Auraka e tuatua atu i tetai mea ke ki teia uki, mari ra ko te tataraara; E akono i taku au akaueanga, e ma te tauturu atu i te akatupuanga i taku angaanga kia tau ki taku au akaueanga, e ka akameitakiia mai koe.
10 I na, e orongaanga taau, e me kore ra ka rauka ia koe tetai orongaanga, me ka anoano koe iaku na roto i te akarongo, ma te ngakau tika, ma te irinaki ki te mana o Iesu Mesia, koia oki, ki toku mana e tuatua atu nei kia koe;
11 E, i na, ko au teia e tuatua atu nei; i na, ko au te mārama tei kakā atu ana ki te poiri, e na roto i toku mana e oronga atu ei au i teia tuatua kia koe.
12 E teianei, tika, tika tikai taku e karanga atu kia koe, e tuku i toou irinakianga ki roto i taua Vaerua ra te ka arataki ia koe kia rave i te meitaki—ae, kia rave ma te tika tikai, kia aere ma te akaaka, kia akava ma te tika tikai; e ko teia toku Vaerua.
13 Tika, tika tikai taku e karanga atu kia koe, ka oronga atu au i toku Vaerua kia koe, ko te ka riro ei akamārama i toou manako, ko te ka akakī i toou vaerua ki te rekareka;
14 I reira koe e kite ei, e me kore ra na teia e kite ei koe e, ko te au mea pouroa taau i anoano iaku, tei tau ki te au mea tika, ma te akarongo e te irinakianga mai toou kiaku e ka rauka ia koe te reira.
15 I na, te akaue atu nei au ia koe e auraka e manako e kua kapikiia koe kia tutu, mari ra, kia kapikiia koe.
16 E tiaki no tetai tuatau poto ua, kia rauka ia koe taku tuatua, taku papa, taku akonoanga, e taku evangelia, kia kite papu tikai oki koe i taku apiianga.
17 E i na, kia tau oki ki toou anoano, ae, e kia tau katoa ki toou akarongo ei reira e tae atu ei kia koe.
18 E akono i taku au akaueanga; kia muteki ua koe; e kimi i te tauturu no ko mai i toku Vaerua.
19 Ae, e mou piri mai kiaku ma toou ngakau katoa, kia rauka oki ia koe i te tauturu i te akaari atea anga i te au mea tei tuatuaia ake nei—koia te akaurianga o taku angaanga; kia akakoromaki e oti ua atu ia koe te reira.
20 I na, ko teia oki taau angaanga, kia akono i taku au akaueanga, ae, ma toou maroiroi katoa, te manako e te ririnui katoa.
21 Auraka e akakite i taku tuatua, mari ra, kia na mua i te kimi e kia rauka mai taku tuatua, ei reira toou arero e mataraʼi; ei reira, me ka anoano koe, ka rauka ia koe toku Vaerua e taku tuatua, ae, ko te mana o te Atua i te akaariuanga mai i te tangata nei.
22 I na ra, i teianei kia muteki ua koe; e apii i taku tuatua tei apaina atu ki rotopu i te tamariki a te tangata nei, e apii katoa i taku tuatua ko te ka tae mai ki rotopu i te tamariki a te tangata nei, me kore ra ko teia e akauriia nei, e tae rava atu ki te tuatau e rauka mai ei ia koe te au mea katoatoa taku ka oronga atu ki te tamariki a te tangata nei i roto i teia uki nei, ei reira te au mea katoatoa e orongaia atu ei.
23 I na ko Hyrum koe, ko taku tamaiti; e kimi i te basileia o te Atua, e ka orongaia mai te au mea katoatoa kia tau ki tei tika.
24 E patu ki runga i taku nei papa, koia taku nei evangelia;
25 Auraka e patoi i te vaerua o te eeuanga, e te vaerua o te totoʼu, e aue oki aia ko tei patoi i teia au mea nei;
26 No reira, e akaputuputu ki roto i toou ngakau, e tae roatu ki te tuatau taku i manako e aere ei koe.
27 I na, te tuatua atu nei au kia ratou katoatoa tei kī i te au anoano meitaki, e tei vero ki ta ratou matipi kia kokoti.
28 I na, ko Iesu Mesia au, te Tamaiti a te Atua. Ko au te ora e te mārama o te ao nei.
29 Ko au rai teia tei aere mai ana ki oku tikai, kare ra toku tikai i ariki mai iaku.
30 I na ra, tika, tika tikai taku e karanga atu kia koe, ko ratou ravarai te ka ariki mai iaku, ka oronga au i te mana kia ratou kia riro mai ei au tamaroa na te Atua, ki te aronga tei irinaki mai ki toku nei ingoa. Amene.