Reirei ao Berita aika Tabu

1 Ongora, O ngkami kaain au ekaretia, e taku bwanaan are ngaia are e maeka i eta, ao matana are i aoia aomata nako; eng, e koaua ae I taku: Ongora ngkami aomata man taabo aika raroa; ao ngkami ake i aon aban taari, kakauongo ni kabane.

2 Bwa ngaia ae bwanaan te Uea e bon nakoia aomata ni kabane, ao a na bon akea ae a na birinako; ao bon akea te mata ae e na aki nooria, ke te taninga ae aki kona n ongo, ke te nano ae e aki kona n rootaki.

3 Ao taan kakaitara a na bon rootaki ma te rawawata ae e bati; ibukin ae aia bure e na taekinaki i aon taubukin auti, ao aia mwakuri aika raba a na bon kaotaki.

4 Ao te bwanaa ni kauring bon nakoia aomata ni kabane, man wiia au taan reirei, are I a tia n rineia ni boong aika kaitira aikai.

5 Ao a na bon waaki nako ao akea ae e na tuukiia, bwa Ngai te Uea I a tia ni tuangiia.

6 Nooria, aio bon au kariaia, ao te kariaia ibukiia au taan mwakuri, ao au kabwarabwara nakon bokin au tua, are I a tia n anganiia bwa a na boretiia nakoimi, O ngkami kaain te aonaba.

7 Mangaia, kam na maaku ao kam na ruru, O ngkami aomata, bwa tera ake I a tia n atong i nanoia Ngai te Uea a na bon koro bukiia.

8 Ao e koaua ae I a tuangkami, bwa naake a waaki nako, uouoti taian rongorongo nakoia kaain te aonaba, ao nakoia anganaki te mwaaka ni kabaeiia taan aki kakoaua ao taan kakaitara i aonaba ao i karawa;

9 Eng, e koaua, ni kabaeiia nakon te bong are e na bwaro iai unin nanon te Atua ae akea baireana nako aoia ake a buakaka—

10 Nakon te bong are e na roko te Uea ni kabooia aomata nako n ai aron aia mwakuri, ao ni babaire nakoia aomata nako ni kaineti ma te baire are a tia ni babaire iai nakoia raoia.

11 Mangaia ae bwanaan te Uea e bon nako tabotabon aonaba, bwa naake a kan ongo a na bon ongo:

12 Katauraoingkami, katauraoingkami nakon te bwai ae e nang roko, bwa e a kaan roko te Uea;

13 Ao e kauraki unin te Uea, ao e tebokaki ana kabaang i karawa, ao e na bon bwaka i aoia kaain te aonaba.

14 Ao e na bon kaotaki bain te Uea; ao e na roko te bong bwa naake aki kan ongo bwanaan te Uea, ke bwanaan ana tia mwakuri te Uea, ke n aki kakauongo raoi nakon aia taeka burabeti ao abotoro, a na bon kamaunaaki mai buakoia aomata;

15 Bwa a taonnako man au otenanti, ao n urua au berita ae tabu ae akea tokina;

16 Aki ukoukora te Uea ni kamatoa raoiroina, bwa aomata nako a bon nakonako n oin kawaia, ao ni katotonga oin atuaia, are katotongana ai aron te aonaba, ao are rabwatana bon rabwatan te bouananti, are e na mane ao ni mate i Bwaburon, n ai aron Bwaburon are kakannato, are e na bon bwaka.

17 Mangaia ae, Ngai te Uea, atakin te kaangaanga are e na roko i aoia kaain te aonaba, I wetea au tia mwakuri Iotebwa Timiti te Ataei, ao n taetae nakoina mai karawa, ao n anganna tua;

18 Ao n anga naba tua nakoia tabeman, bwa a na katanoatai bwai aikai nakon te aonaba; ao I a tia ni karaoi bwai aikai bwa a na bon koro bukiia, are a koreaki irouia burabeti—

19 Mamaaran nako te aonaba a na bon waki nako ao n urui ma ni kabwakaia ake a aintoa ao ni korakora, bwa e aonga te aomata n aki reireina raona, ke n onimakina te iriko—

20 Bwa aonga aomata nako n taetae n aran te Atua ae te Uea, are te Tia Kamaiua te aonaba;

21 Bwa e aonga naba te onimaki ni manga rikirake n te aonaba;

22 Bwa e aonga au berita ae tabu ae akea tokina ni manga kamatoaaki;

23 Bwa e aonga bwaninin au euangkerio ni katanoataaki irouia naake a mamaara ao aki reirei nako tabotabon aonaba, ao i mataia ueea ao taan tautaeka.

24 Nooria, Ngai te Atua ao I a tia n taekini; tuua aikai bon mai irou, ao a tia n anganaki au taan mwakuri n akean konabwaia, ni kaineti ma aia taetae, bwa aonga ni bon oota raoi.

25 Ao ngkana a teimatoa ni kaairua ao e na bon kaotaki;

26 Ao ngkana a teimatoa n ukoukora te wanawana ao a na bon reireiaki;

27 Ao ngkana a teimatoa ni bure ao a na bon katuaeaki, bwa aonga n rairi nanoia;

28 Ao ngkana a teimatoa n nanorinano ao a na bon kakorakoraaki, ao ni kakabwaiaaki mai eta, ao ni karekei rabakau man te tai teuana nakon te tai teuana.

29 Ao i mwin karekean rongorongoia taian Nibwaite, eng, bwa e aonga au tia mwakuri Iotebwa Timiti te Ataei, ni karekea te mwaaka n raira Ana Boki Moomon rinanon ana nanoanga te Atua, ao man mwaakan te Atua.

30 Ao bwa aonga naba naake angaanaki taian tua, ni karekea te mwaaka ni kawenea aan te ekaretia aio, ao ni kaotinakoa mai nanon te roo ma te rootongitong, are tii te ekaretia ae koaua ae maiu i aon te aonaba ni kabuta, are Ngai, te Uea, I kukurei iai, ngkana I taetae nakon te ekaretia ae e bwanin ao tiaki ni kaka temanna—

31 Bwa Ngai te Uea I aki kona n tara te bure ma ni kariaia karaoana naba teutana;

32 E ngae n anne, ane e raira nanona ao ni karaoi ana tua te Uea e na bon kabwaraaki ana bure;

33 Ao ane e aki raira nanona, e na bon anaaki te oota mai irouna are e a tia ni karekea; bwa Tamneiu e aki kona n reitinako ni maeka ma te aomata, e taku aia Uea Taanga ni Buaka.

34 Ao e koaua ae I a manga tuangkami, O ngkami kaain te aonaba: Ngai te Uea I rang tauraoi ni kaotii bwaai aikai nakoia aomata ni kabane;

35 Bwa Ngai akea te inanonano irou nakoia aomata, ao I tangiriia aomata nako bwa a na ataia bwa e waekoa n roko te bong; te tai e tuai roko, ma e a kaan, ike e na anaaki te rau man te aonaba, ao te riaboro e na karekea te mwaaka n tautaekana oin ana tautaeka.

36 Ao te Uea e na mwaaka i aoia ana aomata aika a itiaki naba, ao n tautaeka ibukoia, ao n roko n motikitaeka i Itumia, ke te aonaba.

37 Ukoukori tua aikai, bwa a bon koaua ao man onimakinaki, ao taian taeka ni burabeti ao berita ake iai a na bon bane ni koro bukiia.

38 Tera are I a tia n taekini Ngai te Uea, I a tia n taekini, ao I aki kabwara au bure; ao e ngae n ae e na mauna karawa ma aonaba, au taeka e na bon aki mauna, ma a na bon bane ni koro bukiia, e ngae man bon oin bwanaau ke bwanaia au tia mwakuri, bon titebo.

39 Bwa nooria, ao taraia, te Uea bon te Atua, ao te Tamnei e kaota koauana, ao te koaua are kaotaki iroun te Tamnei e bon koaua, ao e reitinako te koaua n aki tootoki. Amen.