Kapitulo 50
Ang mga Jaredite Mibiya sa Babel
Si Jared ug ang iyang igsoon nga lalaki mga matarong nga mga tawo kinsa nagpuyo sa usa ka dakbayan nga ginganlan og Babel. Sila mipuyo og gatusan ka mga tuig sa wala pa ang mga Nephite.
Kadaghanan sa mga katawhan sa Babel mga dautan. Sila mitukod og usa ka tore aron sa pagsulay pag-adto sa langit. Ang Ginoo nasuko ug miusab sa ilang pinulongan.
Si Jared mihangyo sa iyang igsoon nga lalaki sa pag-ampo ug paghangyo sa Ginoo sa dili pag-usab sa pinulongan sa ilang mga banay ug mga higala.
Ang igsoon nga lalaki ni Jared miampo, ug ang Ginoo mitubag sa iyang pag-ampo. Si Jared ang iyang igsoon nga lalaki, ug ang ilang mga banay ug mga kahigalaan sa gihapon makasabot sa usag usa.
Ang Ginoo misulti sa igsoon nga lalaki ni Jared sa pagpundok sa iyang banay ug mga higala ug mobiya sa yuta. Sila midala sa ilang mga hayop ug sa tanang mga matang sa liso uban kanila.
Ang Ginoo miingon nga siya modala sa mga Jaredite ngadto sa usa ka gisaad nga yuta.
Ang mga Jaredite midakop og mga langgam ug mga isda aron dad-on nila.
Sila midala og mga panon sa mga putyokan.
Ang mga Jaredite mipanaw ngadto sa kamingawan. Ang Ginoo misulti kanila gikan sa panganud ug misulti kanila asa nga dalan moagi.
Ang Ginoo miingon nga ang mga katawhan kinsa mopuyo didto sa gisaad nga yuta kinahanglan gayud moalagad sa Dios o sila pagalaglagon.
Sa diha nga ang mga Jaredite miabot sa baybayon, ilang gipatindog ang ilang mga tolda. Sila nagpabilin sa daplin sa dagat sulod sa upat ka mga tuig.