Kapitulo 5
Pagpanaw didto sa Kamingawan
Ang Ginoo buot nga ang anak nga mga lalaki ni Lehi makabaton og mga asawa kinsa motudlo sa ilang mga anak sa ebanghelyo. Siya misulti kang Lehi sa pagpadala sa iyang mga anak nga mga lalaki balik sa Jerusalem aron kuhaon ang banay ni Ismael.
Si Nephi ug ang iyang igsoon nga mga lalaki mibalik sa Jerusalem. Sila misulti ni Ismael kon unsa ang buot ipabuhat sa Ginoo kaniya. Si Ismael mituo kanila, ug siya ug ang iyang banay mikuyog sa mga anak nga mga lalaki ni Lehi.
Samtang sila nagpanaw sa kamingawan, si Laman ug Lemuel ug pipila sa banay ni Ismael nangasuko. Sila buot nga mobalik sa Jerusalem.
Si Nephi mipahinumdom kang Laman ug Lemuel sa tanan nga mabuhat sa Ginoo alang kanila. Siya misulti kanila sa pagbaton og labaw nga hugot nga pagtuo. Sila nasuko ngadto kang Nephi apan wala mobalik sa Jerusalem.
Si Nephi, iyang igsoon nga mga lalaki, ug si Zoram sa wala madugay naminyo sa mga anak nga babaye ni Ismael.
Ang Ginoo misulti ngadto ni Lehi sa pagpadayon sa ilang panaw. Sa sunod nga buntag si Lehi nakakita og usa ka tumbaga nga bola nga gitawag og Liahona sa gawas sa iyang tulda. Kini mitudlo sa dalan nga paingon sa kamingawan.
Ang banay ni Lehi nagtapok og pagkaon ug mga liso ug nanghipos sa ilang mga tulda. Sila mipanaw lahus sa kamingawan sa daghan nga mga adlaw, nagsunod sa mga paggiya sa Liahona.
Si Nephi ug iyang ingsoon nga mga lalaki migamit og mga pana ug mga udyong aron sa pagpangayam alang sa pagkaon samtang sila nagpanaw.
Ang puthaw nga pana ni Nephi nabuak, ug ang mga pana sa iyang mga igsoon nga mga lalaki nawad-an sa ilang kusog. Ang managsoon nga mga lalaki wala makapatay sa bisan unsa nga mga mananap, busa ang matag usa gigutom. Si Laman ug si Lemuel nangasuko.
Si Nephi mihimo og pana nga kahoy ug nangutana sa iyang amahan kon asa mangayam. Si Lehi nakadawat og mga paggiya diha sa Liahona. Si Nephi misunod sa mga paggiya ug nakakita og pipila ka mga mananap.
Ang Liahona molihok lamang kon ang banay ni Lehi matinud-anon, makugihon, ug masinugtanon.
Si Nephi mipauli uban sa mga mananap nga iyang nakitan. Matag usa nalipay sa pagkuha og pagkaon. sila nangasubo nga sila nasuko, ug sila nagpasalamat sa Dios nga sila ginapanalanginan.
Ang pagpanaw dili sayon. Sa kasagaran ang banay ni Lehi gikapoy, gigutom, ug giuhaw. Si Ismael namatay ug ang iyang mga anak nga babaye naguol. Sila mibagulbol batok ni Lehi.
Si Laman ug si Lemuel mibagulbol usab. Sila wala motuo nga ang Ginoo nakigsulti kang Nephi. Sila buot nga mopatay kang Lehi ug Nephi ug mopauli ngadto sa Jerusalem.
Ang tingog sa Ginoo nakigsulti ngadto kang Laman ug Lemuel. Kini misulti kanila nga dili masuko kang Lehi ug Nephi. Si Laman ug si Lemuel naghinulsol.
Ang banay ni Lehi mipadayon sa ilang malisud nga panaw. Ang Dios mitabang kanila ug milig-on kanila. Ang mga bata natawo. Si Lehi ug si Sariah aduna pay dugang nga duha ka anak nga mga lalaki, ginganlan og Jacob ug Joseph.
Human sa pagpanaw diha sa kamingawan sa walo ka mga tuig, ang banay ni Lehi miabot sa baybayon. Didto sila nakakita og prutas ug dugos. Ilang gitawag ang dapit og Bountiful.