Kapitulo 15
Si Alma Nagtudlo ug Nagbunyag
Si Alma nakaikyas gikan sa mga suluguon ni Haring Noah ug mitago sulod sa daghang mga adlaw. Samtang siya nagtago, iyang gisulat, kon unsa ang gitudlo ni propeta Abinadi.
Si Alma naghinulsol sa iyang mga sala ug miadto sa mga Nephite sa tago, nagtudlo kanila sa mensahe ni Abinadi. Si Alma misulti sa mga katawhan sa pagbaton ug hugot nga pagtuo diha kang Jesukristo ug maghinulsol.
Sa panahon sa adlaw si Alma motago diha sa usa ka mapig-ot nga pundok sa mga kakahoyan duol sa usa ka lim-aw nga gitawag og mga Tubig ni Mormon.
Kadtong kinsa mituo sa mga pagtulon-an ni Alma miadto sa mga Tubig ni Mormon ug gibunyagan. Si Alma mibunyag og 204 ka mga tawo ngadto sa Simbahan ni Kristo.
Si Alma miorden og mga pari aron sa pagtudlo sa mga katawhan. Siya misulti sa mga pari sa pagtudlo sa paghinulsol ug hugot nga pagtuo diha kang Jesukristo. Siya usab miingon nga sila dili gayud maglalis apan maghiusa.
Ang mga katawhan ni Alma naghigugma ug nag-alagad sa usag usa. Sila nakigbahin sa tanang butang nga anaa kanila ug mapasalamaton nga nakakat-on mahitungod kang Jesukristo, ilang Manluluwas.
Ang mga suluguon ni Haring Noah nakakita kang Alma nga nagtudlo sa mga katawhan. Ang hari miingon nga si Alma miagni sa mga Nephite sa pagbatok kaniya, busa siya mipadala og mga sundalo aron sa pagpatay kanila.
Ang Dios mipahimangno kang Alma nga ang mga sundalo ni Haring Noah nagsingabot. Ang mga katawhan sa ilang mga banay, mga mananap, ug ubang mga kabtangan ug milayas ngadto sa kamingawan.
Ang Dios milig-on sa mga katawhan ni Alma aron sila maka-ikyas gikan sa mga sundalo ni Haring Noah. Ang mga sundalo misiksik apan wala gayud makakita kanila.
Human sa pagpanaw diha sa kamingawan sulod sa walo ka mga adlaw, and mga katawhan ni Alma miabot sa usa ka maanindot nga dapit nga adunay tin-aw nga tubig nga nag-agos. Dinhi sila mitanum og mga lagutmon ug nagtukod og mga gambalay.
Ang mga katawhan buot nga si Alma ang mahimo nilang hari, apan si Alma miingon nga ang Dios dili buot nga sila adunay hari. Ang Dios buot nga sila mahimong gawasnon.