Kapitulo 39
Si Nephi Nakadawat og Dako nga Gahum
Si Nephi milakaw paingon sa iyang panimalay, naghunahuna kalabut sa gipakita sa Ginoo kaniya ug kalabut sa pagkadautan sa mga Nephite. Siya nagsubo tungod sa ilang pagkadautan.
Ang Ginoo misulti ngadto ni Nephi ug midayeg kaniya tungod sa iyang pagkamasulondon ug sa pagpaninguha og maayo aron pagtudlo sa ebanghelyo.
Si Nephi gihatagan og gahum aron pagbuhat sa bisan unsa. Ang Ginoo nakahibalo nga siya mogamit niini nga gahum sa matarung nga paagi.
Ang Ginoo misulti ni Nephi sa pagpasidaan sa mga Nephite nga kon sila dili maghinulsol, sila pagalumpagon. Si Nephi miadto dayon aron sa pagpasidaan sa mga tawo.
Ang mga Nephite wala motuo ni Nephi. Sila misulay sa pagbalhog kaniya sa bilanggoan, apan ang gahum sa Dios nanalipod kaniya.
Si Nephi mipahayag sa pulong sa Dios ngadto sa tanang mga Nephite.
Apan ang mga katawhan nahimo nga labaw pang dautan ug misugod sa pag-away sa usag usa.
Si Nephi nag-ampo alang sa usa ka kagutom, naglaom nga ang kakulang sa pagkaon makapainubsanon sa mga Nephite ug motabang kanila sa paghinulsol.
Ang kagutom miabot. Walay ulan, busa ang yuta nauga ug ang mga tanom dili makatubo. Ang mga katawhan mihunong sa pag-away.
Ang mga Nephite gipanggutom, ug daghan kanila ang nangamatay. Kinsa kadtong nabuhi misugod paghinumdom sa Ginoo ug sa gitudlo ni Nephi kanila.
Ang mga katawhan naghinulsol sa ilang mga sala ug unya mipakiluoy sa ilang mga maghuhukom sa paghangyo kang Nephi sa pagpaundang sa kagutom. Ang mga maghuhukom miadto kang Nephi.
Sa diha nga si Nephi nakakita nga ang mga katawhan nahimong mapainubsanon ug paghinulsol, siya mihangyo sa Ginoo sa pagpaundang sa kagutom.
Ang Ginoo mitubag sa pag-ampo ni Nephi, ug kini misugod sa pag-ulan sa pag-ulan. Sa wala madugay ang mga tanum mitubo pag-usab. Ang mga katawhan mihimaya sa Dios ug nasayud nga si Nephi usa ka bantugan nga propeta.
Kadaghanan sa mga Nephite mipasakop sa Simbahan. Sila nahimong adunahan, ug ang ilang mga dakbayan mitubo. Dihay kalinaw sa yuta.
Unya pipila ka mga Nephite kinsa sa sayo pa mipasakop sa mga Lamanite misulong sa mga Nephite.
Ang mga Nephite misulay sa pagbuntog sa ilang mga kaaway, kinsa nahimong mga tulisan ni Gadianton, apan wala makahimo tungod kay sila sa ilang mga kaugalingon nahimong mga dautan pag-usab.
Sa diha nga ang mga Nephite nagmatarong, ang Ginoo mipanalangin kanila. Sa diha nga sila mapasigarbohon ug nalimot sa Ginoo, siya mihatag kanila og mga suliran aron sa pagtabang kanila sa paghinumdom kaniya.