Kapitulo 16
Si Haring Limhi ug ang Iyang mga Katawhan Milayas
Ang mga Lamanite mibihag sa daghang mga Nephite kinsa wala makalayas uban kang Haring Noah. Ang mga Lamanite midala kanila sa layo ug mihatag kanila og yuta apan gipahimo sila pagpabayad og bug-at nga mga buhis.
Ang mga Nephite mihimo kang Limhi nga ilang bag-o nga hari. Si Limhi mao ang anak nga lalaki ni Haring Noah, apan siya dili dautan sama sa iyang amahan. Siya maayong tawo.
Si Haring Limhi misulay sa pagpakigsabot sa kalinaw uban sa mga Lamanite, apan sila mipadayon pagbantay sa mga Nephite ug magmabangis ngadto kanila.
Usa ka adlaw si Haring Limhi nakakita ug pipila ka mga langyaw gawas sa dakbayan. Iya silang gibalhug sa bilanggoan. Ang mga langyaw mga Nephite gikan sa Zarahemla.
Ang ilang pangulo mao si Ammon. Si Haring Limhi nalipay sa pagpakita kaniya. Siya nasayud nga si Ammon makatabang sa iyang mga katawhan sa paglayas gikan sa mga Lamanite.
Si Haring Limhi mitawag sa iyang mga katawhan pagpundok. Siya mipahinumdom kanila nga ang ilang kadautan maoy katarungan nga sila gipugngan sa mga Lamanite.
Siya misulti sa iyang mga katawhan sa paghinulsol, sa pagsalig sa Dios, ug sa pagsunod sa mga kasugoan. Unya ang Dios motabang kanila sa pagalingkawas.
Ang mga Nephite nakahibalo nga ang mga Lamanite kinsa nagbantay sa dakbayan sa kasagaran mahubog sa gabii.
Nianang gabhiona si Haring Limhi mipadala og dugang bino ngadto sa mga magbalantay isip usa ka gasa.
Si Haring Limhi ug ang iyang mga katawhan nakahimo sa paglakaw labang sa hubog nga mga magbalantay ug miikyas.
Si Ammon migiya ni Haring Limhi ug sa iyang mga katawhan lahus sa kamingawan ngadto sa Zarahemla, diin sila gidawat.