Kapitulo 20
Si Alma ug si Nehor
Sa wala pa mamatay si Haring Mosiah, ang mga Nephite mipili og mga maghuhukom aron mangulo kanila. Si Alma nga Batan-on nahimo nga unang labaw nga maghuhukom. Siya usab ang pangulo sa Simbahan.
Usa ka dako, kusgan nga tawo nga ginganlan og Nehor misugod sa pagpanudlo og mga bakak. Siya miingon nga ang matag usa maluwas bisan sila maayo o dautan. Daghang mga katawhan ang mituo kang Nehor.
Si Nehor misangyaw batok sa Simbahan sa Dios, apan usa ka matarung nga tawo ginganlan og Gideon mipanalipod niini. Si Nehor nakiglalis ni Gideon, apan si Gideon misulti uban sa mga pulong sa Dios.
Si Nehor nasuko ug mihulbot sa iyang espada ug mipatay ni Gideon.
Si Nehor gidala ngadto ni Alma aron pagahukman. Si Nehor sa maisugon nga paagi nanalipod sa iyang kaugalingon.
Apan si Alma miingon nga si Nehor maoy sad-an tungod kay siya nagtudlo sa mga katawhan aron mahimo nga dautan ug nakapatay ni Gideon.
Si Alma miingon nga si Nehor gikinahanglan nga silotan tungod sa pagpatay ni Gideon. Sumala sa mga balaod, si Nehor kinahanglan gayud nga mamatay.
Si Nehor gidala sa usa ka duol nga bungtod ug gipatay. sa wala pa siya mamatay siya miingon nga ang tanang butang nga iyang gitudlo maoy sayop. Apan daghang mga katawhan sa gihapon ang mituo sa dautan nga mga pagtulon-an ni Nehor.
Kini nga mga katawhan mahigugmaon sa katigayunan ug dili mosunod sa mga kasugoan sa Dios. Sila mihimo nga kataw-anan sa mga sakop sa Simbahan ug nakiglalis ug nakig-away kanila.
Ang matarong nga mga tawo mipadayon sa pagsunod sa mga kasugoan ug wala magbagulbol bisan kon ang mga sumusunod ni Nehor mipasakit kanila.
Ang mga sakop sa Simbahan nakigbahin sa tanang butang nga anaa kanila uban sa mga kabus, ug sila miatiman sa masakiton. Sila misunod sa mga kasugoan ug ang Dios mipanalangin kanila.