Kapitulo 42
Ang mga Timailhan sa Paglansang sa Krus ni Kristo
Katlo-an ug tulo ka mga tuig ang milabay sukad ang mga katawhan nakakita sa mga timailhan sa pagkatawo ni Jesukristo.
Sila karon nagbantay alang sa timailhan sa iyang kamatayon: tulo ka mga adlaw sa kangitngit. 3 Nephi 8:3
Pipila ang wala motuo nga ang timailhan moabut. Sila nakiglalis niadtong kinsa mituo.
Usa ka adlaw usa ka mabangis nga unos ang miabot. Dinhay makalilisang nga hangin.
Ang kilat mikidlap, ug ang dalugdog miuyog sa tibuok kalibutan.
Ang dakbayan sa Zarahemla nasunog. Ang dakbayan sa Moroni na-unlod sa dagat. Ang dakbayan sa Moronihah nalubong.
Usa ka linog miuyog sa tibuok kayutaan. Ang mga dagkong dalan nangabuak, ug ang mga gambalay nangatumpag. Daghang dakbayan ang nangalaglag, ug daghang mga tawo ang nangamatay.
Ang unos ug ang linog milungtad og tulo ka mga takna.
Sa diha nga ang unos ug linog mihunong, baga nga kangitngit mitabon sa yuta. Walay kahayag bisan asa. Ang mga katawhan makabati gani sa kangitngit.
Ang kangitngit milungtad solud sa tulo ka mga adlaw. Ang mga kandila dili mosiga, ug ang mga katawhan dili makakita sa adlaw, bulan, o mga bitoon.
Ang mga katawhan nanghilak tungod sa kangitngit, kalaglagan, ug kamatayon. Sila nangasubo nga sila wala maghinulsol sa ilang mga sala.
Unya ang mga katawhan nakadungog sa tingog ni Jesukristo.
Si Jesus misulti kanila mahiutngod sa makalilisang nga kalaglagan diha sa yuta. Siya miingon nga ang hilabihan kadautan nga mga tawo nangamatay.
Siya miingon nga si kinsa kadtong wala mamatay gikinahanglan nga maghinulsol. Kon sila mohimo niini ug moduol ngadto kaniya siya manalangin kanila.
Ang mga katawhan nahibulong kaayo human makadungog sa tingog nga sila nanghunong sa paghilak. Tanang butang hilum sulod sa daghang mga takna.
Unya si Jesus misulti pag-usab, miingon nga siya kanunay nga misulay sa pagtabang sa mga katawhan. Kon sila maghinulsol karon, sila sa gihapon makabalik ngadto kaniya.
Human sa tulo ka mga adlaw ang kangitngit mibiya. Ang mga katawhan nagmaya ug sa kalipay nagpasalamat sa Ginoo.