Kapitulo 41
Ang mga Timailhan sa Pagkatawo ni Kristo
Ang mga Nephite nakakita og mahinungdanon nga mga timailhan ug mga milagro nga ang mga propeta nagingon nga mahitabo sa dili pa matawo si Jesukristo.
Apan pipila sa mga Nephite miingon nga ang panahon sa pagkatawo ni Jesus nakalabay na. Sila mibiaybiay niadtong kinsa sa gihapon mituo sa mga panagna ni Samuel ang Lamanite.
Ang mga tawo kinsa mituo ni Jesukristo ug sa mga propeta nangasubo sa paghunahuna nga dunay butang nga makapugong sa mga panagna nga matuman.
Ang mga katawhan matinud-anon nga nagbantay sa usa ka gabii nga dili mongitngit, nga mao ang timailhan nga si Jesukristo matawo.
Kinsa kadtong wala motuo ni Jesukristo mipili og usa ka adlaw sa pagpatay sa mga mituo kon ang timailhan dili mahitabo.
Si Nephi nasubo tungod sa kadautan niadtong kinsa wala motuo sa Manluluwas.
Si Nephi nag-ampo sa tibuok adlaw alang niadtong mga katawhan kinsa pagapatyon.
Ang Ginoo mihupay kang Nephi ug misulti kaniya nga dili mongitngit kana nga gabhiona. Si Jesus matawo sa sunod nga adlaw didto sa Bethlehem.
Niana nga pagkagabii ang adlaw misalop, apan wala mongitngit. Ang timailhan sa pagkatawo ni Jesukristo miabot. Ang mga katawhan nahibulong.
Kinsa kadtong naglaraw sa pagpatay sa mga mituo natumba ug nakita nga mora og patay.
Sila nahadlok tungod kay sila mga dautan. Karon sila nasayud nga ang Manluluwas matawo ug nga ang mga propeta husto.
Nagpabilin ang kahayag sa tibuok gabii. Sa diha nga ang adlaw misubang sa sunod buntag, ang mga katawhan nasayud nga si Jesukristo matawo nianang adlawa. Ang mga panagna natuman na.
Usa ka bag-o nga bitoon mitunga didto sa langit, susama sa ginaingon sa mga propeta nga mahitabo.
Si Satanas sa gihapon misulay sa pagdani sa mga katawhan sa dili pagtuo sa mga timailhan nga ilang nakita, apan ang kadaghanan mituo.
Si Nephi ug ang uban nga mga pangulo sa Simbahan mibunyag sa tanan kinsa mituo ug naghinulsol.
Dihay mga malipayon nga balita diha sa yuta tungod kay ang mga pulong sa mga propeta natuman na. Si Jesukristo natawo.