Kapitulo 22
Ang Misyon ni Alma ngadto sa Ammonihah
Si Alma mitudlo sa ebanghelyo sa tanang bahin sa yuta. Sa diha nga siya misulay sa pagsangyaw didto sa Ammonihah, ang mga katawhan dili maminaw. Sila misbog kaniya pagawas sa dakbayan.
Si Alma nasubo nga ang mga katawhan sa Ammonihah hilabihan kadautan. Siya mibiya aron pag-adto sa laing dakbayan.
Usa ka anghel mipakita ug mihupay kang Alma. Ang anghel misulti kaniya sa pag-adto og balik sa Ammonihah ug mosangyaw pag-usab. si Alma midali pagbalik.
Si Alma gigutom. Sa iyang pagsulod sa dakbayan, siya nangayo sa usa ka tawo og pagkaon. Usa ka anghel misulti sa tawo nga si Alma moabut ug nga si Alma usa ka propeta sa Dios.
Kini nga tawo, si Amulek, midala kang Alma ngadto sa iyang pinuy-anan ug mipakaon kaniya. Si Alma mipuyo uban ni Amulek ug sa iyang banay sulod sa daghang mga adlaw. Siya mipasalamat sa Dios alang sa banay ni Amulek ug mipanalangin kanila.
Si Alma misulti kang Amulek mahitungod sa iyang balaan nga tawag sa pagtudlo sa mga katawhan sa Ammonihah. Si Amulek milakaw uban ni Alma aron sa pagtudlo sa mga katawhan. Ang Espiritu Santo mitabang kanila.
Si Alma misulti sa mga katawhan sa paghinulsol o ang Dios molaglag kanila. Siya miingon nga si Jesukristo moabut ug moluwas niadtong kinsa adunay hugot nga pagtuo diha kaniya ug maghinulsol.
Ang mga katawhan sa Ammonihah nangsuko. Sila misulay sa pagbalhog ni Alma sulod sa bilanggoan, apan ang Ginoo mipanalipod kaniya.
Unya si Amulek misugod sa pagtudlo. Daghan sa mga katawhan ang nakaila kang Amulek; siya dili usa ka langyaw sama kang Alma. Siya misulti kanila mahitungod sa Anghel nga iyang nakita.
Si Amulek miingon nga si Alma usa ka propeta sa Dios ug nagsulti sa kamatuoran. Ang mga katawhan natingala sa pagkadungog sa pagpamatuod ni Amulek.
Pipila sa mga katawhan nasuko, ilabi na sa usa ka dautang tawo nga gingaanlan og Zeezrom. Sila misulay sa paglingla ni Amulek pinaagi sa mga pangutana, apan siya misulti kanila nga siya nasayud mahitungod sa ilang laraw.
Si Zeezrom buot nga molaglag sa tanang butang nga maayo. Siya maghimo og mga suliran, ug unya ang mga katawhan mobayad kaniya ug salapi aron sa pagsulbad sa mga suliran nga iyang gibuhat.
Si Zeezrom dili makalinga ni Amulek, busa siya mitanyag kaniya og salapi aron mosulti nga walay Dios. Si Amulek nasayud nga ang Dios buhi ug miingon nga si Zeezrom nasayud usab niini apan nahigugma sa salapi labaw pa sa Dios.
Unya si Amulek mitudlo kang Zeezrom mahitungod ni Jesus ug mahitungod sa pagkabanhaw ug sa kinabuhi nga dayon. Ang mga katawhan nahibulong. Si Zeezrom misugod sa pagkurog uban sa kahadlok.
Si Zeezrom nasayud nga si Alma ug si Amulek adunay gahum sa Dios tungod kay sila nahibalo sa iyang mga hunahuna. si Zeezrom nangutana og mga pangutana ug naminaw samtang si Alma mitudlo kaniya sa ebanghelyo.
Pipila sa mga katawhan mituo kang Alma ug Amulek ug misugod sa paghinulsol ug pagtuon sa mga kasulatan.
Apan kadaghan sa mga katawhan buot mopatay ni Alma ug ni Amulek. Sila migapos sa duha ka mga tawo ug midala kanila ngadto sa labaw nga maghuhukom.
Si Zeezrom nasubo nga siya nahimong dautan ug nagtudlo sa mga katawhan og mga bakak. Siya nagpakilooy sa mga katawhan nga buhian si Alma ug Amulek.
Si Zeezrom ug ang uban nga mga tawo kinsa mituo sa mga pagtulon-an ni Alma ug Amulek giabog pagawas sa dakbayan. Ang dautan nga mga tawo milabay og mga bato kanila.
Unya ang dautan nga mga katawhan mipundok sa mga babaye ug mga bata kinsa mituo ug milabay kanila, uban sa ilang mga kasulatan, ngadto sa kalayo.
Si Alma ug si Amulek gipugos sa pagpatan-aw sa mga babaye ug mga bata nga mamatay diha sa kalayo. Si Amulek buot mogamit sa gahum sa Dios aron sa pagluwas kanila.
Apan si Alma misulti kang Amulek nga siya dili mosanta sa pagpamatay tungod kay ang himatyon nga tawo sa dili madugay nag-uban sa Dios ug ang dautan nga mga tawo pagasilotan.
Ang labaw nga maghuhukom misagpa kang Alma ug ni Amulek sa makadaghan nga higayon ug mibugalbugal kanila tungod kay wala sila makaluwas sa nasunog nga mga babaye ug mga bata. Unya siya mibalhog kanila sa bilanggoan.
Ang uban nga dautang mga tawo miadto sa bilanggoan ug mitampalas ni Alma ug Amulek sa daghan nga mga paagi, lakip na sa pagpagutom kanila ug pagluwa kanila.
Ang labaw nga maghuhukom miingon nga kon si Alma ug Amulek mogamit sa gahum sa Dios aron sa pagluwas sa ilang mga kaugalingon, siya motuo. Siya misagpa kanila pag-usab.
Si Alma ug si Amulek mibarog. Si Alma nag-ampo ug nangayo sa Dios aron sa paghimo kanila nga lig-on tungod sa ilang hugot nga pagtuo diha ni Kristo.
Ang gahum sa Dios mipuno ni Alma ug Amulek, ug sila miputol sa mga pisi nga naghawid kanila. Ang dautan nga mga tawo nangahadlok ug misulay sa pagdagan apan nangatumba.
Ang yuta miuyog, ug ang mga bongbong sa bilanggoan nangatumpag diha sa dautang mga tawo. Ang Ginoo mipanalipod kang Alma ug ni Amulek, ug sila wala madapati.
Ang mga katawhan sa Ammonihah miabot aron sa pagtan-aw kon unsa ang nahitabo. Sa diha nga sila nakakita kang Alma ug ni Amulek nga nanglakaw pagawas sa natumpag nga bilanggoan, sila nangahadlok ug nanagan palayo.
Ang Ginoo misulti ni Alma ug Amulek sa pag-adto sa Sidom. Didto ilang nakit-an ang mga matarong nga mga katawhan. Si Zeezrom didto usab ug hilabihan ka masakiton.
Si Zeezrom nalipay pagpakita kang Alma ug ni Amulek. Siya nabalaka nga sila gipatay tungod sa iyang nabuhat. Siya mihangyo kanila sa pag-ayo kaniya.
Si Zeezrom mituo ni Jesukristo ug naghinulsol sa iyang mga kasal-anan. Sa diha nga si Alma nag-ampo alang kaniya, si Zeezrom sa dihadiha naayo.
Si Zeezrom nabunyagan ug misugod sa pagsangyaw sa ebanghelyo. Daghan pa nga mga kauban ang nabunyagan usab.
Ang dautan nga mga katawhan sa Ammonihah gihurot pagpatay sa mga sundalo sa mga Lamanite, ingon sa gipanagna ni Alma.