Kapitulo 46
Si Jesukristo Nagtudlo ug Nag-ampo uban sa mga Nephite
Ang mga Nephite kinsa nakakita ni Jesukristo misulti sa ilang mga higala nga siya mobalik pagkasunod adlaw. Daghan nga mga tawo ang mitrabaho pag-ayo aron makaadto ngadto diin si Jesus motunga.
Pagkasunod buntag si Nephi ug ang uban nga mga tinun-an mitudlo sa pundok nga nagkatigum. Ang mga tinun-an dayon miampo nga sila makadawat sa Espiritu Santo.
Si Nephi miadto sa tubig ug gibunyagan. Unya iyang gibunyagan ang ubang mga tinun-an.
Human sila mabunyagi, ang mga tinun-an nakadawat sa Espiritu Santo. Ang kalayo ingon og milibot kanila, ug mga anghel mikanaog gikan sa langit ug nangalagad nganha kanila.
Samtang ang mga anghel anaa uban sa mga tinun-an, si Jesus miabot ug mibarog taliwala kanila.
Si Kristo misulti sa tanan nga mga Nephite sa pagluhod diha sa yuta. Iyang gisultihan ang iyang mga tinun-an sa pag-ampo.
Samtang sila nag-ampo, si Jesus milakaw pagpalayo og diyutay gikan sa mga tawo ug miluhod ug mag-ampo ngadto sa Langitnong Amahan.
Si Jesus mipasalamat sa Langitnong Amahan tungod sa paghatag sa Espiritu Santo ngadto sa iyang mga tinun-an. Unya siya mihangyo alang sa Espiritu Santo nga ihatag ngadto ni bisan kinsa nga motuo sa mga pulong sa mga tinun-an.
Si Jesus mipanalangin sa iyang mga tinun-an samtang sila nag-ampo. Siya mipahiyom diha kanila, ug sila nahimong ingon kaputi sa iyang dagway ug pamisti.
Si Jesus nag-ampo pag-usab alang sa iyang mga tinun-an. Siya nahimuot sa ilang dako nga hugot nga pagtuo.
Si Kristo misulti sa mga katawhan sa paghunong sa pag-ampo apan magpadayon sa pag-ampo diha sa ilang mga kasingkasing. Unya siya mihatag kanila sa sakramento.
Walay usa nga nagdala og pan o bino, apan ang Manluluwas misangkap niini sa usa ka milagroso nga paagi.
Si Jesukristo misulti sa mga Nephite nga ang iyang ebanghelyo pagadad-on og balik sa yuta diha sa katapusang mga adlaw.
Siya misulti kanila sa pagtuon sa mga kasulatan, ug iyang gipasulat kang Nephi diha sa mga talaan ang katumanan sa nahabilin pang mga panagna ni Samuel ang Lamanite.
Unya si Jesus mitudlo sa mga katawhan gikan sa mga kasulatan. Siya misulti kanila sa pagtudlo sa usag usa sa mga butang nga iyang gitudlo kanila.
Si Jesus mibalik ngadto sa langit, ug ang iyang mga tinun-an nagtudlo sa mga katawhan. Kinsa kadtong mituo gibunyagan ug makadawat sa Espiritu Santo.
Ang mga Nephite misugod sa pagsunod sa tanan nga mga sugo.