Kapitulo 23
Si Ammon: Usa ka Bantugan nga Suluguon
Ang upat ka anak nga mga lalaki ni Mosiah mibiya sa Zarahemla aron sa pagtudlo sa mga Lamanite sa ebanghelyo. Matag usa kanila miadto sa nagkalainlain nga dakbayan.
Si Ammon miadto sa yuta sa Ishmael. Sa diha nga siya misulod sa dakbayan, ang mga Lamanite migapus kaniya ug midala kaniya ngadto sa ilang hari, si Lamoni.
Si Ammon misulti ni Haring Lamoni nga siya buot mopuyo uban sa mga Lamanite. Si Lamoni nahimuot ug gipabadbaran sa iyang mga tawo si Ammon.
Si Ammon miingon nga siya buot nga mahimong usa sa mga suluguon sa hari. Ang hari mipadala kaniya aron sa pagbantay sa iyang mga panon sa mananap.
Usa ka adlaw samtang si Ammon ug pipila sa ubang mga suluguon nagdala sa ilang mga panon sa mananap aron mukuha og tubig, ang mga tulisan nga Lamanite mipakatag sa mga mananap ug misulay sa pagkawat kanila.
Ang mga suluguon kinsa kauban ni Ammon nangahadlok. Si Haring Lamoni mipatay sa uban niya nga mga suluguon kinsa nakawala sa mga mananap ngadto niining mga tulisan.
Si Ammon nasayud nga kini mao ang iyang higayon sa paggamit sa gahum sa Ginoo aron sa pag-angkon sa mga kasingkasing sa mga Lamanite. Unya sila maminaw sa iyang mga pagtulun-an.
Si Ammon misulti sa mga suluguon nga kon sila mopundok sa nagkatag nga mga mananap, ang hari dili mopatay kanila.
Si Ammon ug ang ubang mga suluguon dali nga nakakita sa mga mananap ug giabog sila balik sa tubigan nga dapit.
Ang mga tulisan nga Lamanite mibalik. Si Ammon misulti sa uban nga mga suluguon sa pagbantay sa mga panon sa mananap samtang siya makig-away sa mga tulisan.
Ang mga tulisan nga Lamanite wala mahadlok ni Ammon. Sila naghunahuna nga sila sayon nga makapatay kaniya.
Ang gahum sa Dios nag-uban kang Ammon. Siya miigo ug mipatay sa pipila sa mga tulisan pinaagi sa mga bato, nga nakapasuko pag-ayo sa nahibilin nga mga tulisan.
Sila misulay sa pagpatay ni Ammon sa ilang mga bunal, apan sa matag higayon nga ang usa ka tulisan mosia sa bunal aron sa pag-igo ni Ammon, siya miputol sa bukton sa tulisan. Nangahadlok, ang mga tulisan midagan palayo.
Ang mga suluguon midala sa naputol nga mga bukton ngadto ni Haring Lamoni ug misulti kaniya unsa ang nabuhat ni Ammon.
Ang hari nahibulong sa dakong gahum ni Ammon. Siya buot makigkita ni Ammon apan nahadlok tungod kay siya naghunahuna nga si Ammon maoy usa ka Bantugang Espiritu.
Sa dihan nga si Ammon misulod aron sa pagpakigkita kaniya, si Haring Lamoni wala mahibalo kon unsay isulti. Siya wala makasulti sulod sa usa ka takna.
Ang Espiritu Santo mitabang kang Ammon nga masayran kon unsa ang gihunahuna sa hari. Si Ammon mipasabot nga siya dili mao ang Bantugang Espiritu. Siya usa ka tawo.
Ang hari mitanyag kang Ammon sa bisan unsa nga butang nga iyang gusto kon siya mosulti kaniya kon unsa nga gahum ang iyang gigamit aron sa pagbuntog sa mga tulisan ug sa pagkahibalo sa mga hunahuna sa hari.
Si Ammon miingon nga ang usa lang ka butang nga iyang gusto mao nga si Haring Lamoni motuo unsa ang iyang isulti. Ang hari miingon nga siya motuo sa tanang butang nga isulti ni Ammon kaniya.
Si Ammon nangutana ni Haring Lamoni kon siya motuo ba sa Dios. Ang hari miingon nga siya mituo sa usa ka Bantugang Espiritu.
Si Ammon miingon nga ang Bantugang Espiritu mao ang Dios, nga siya milalang sa tanang butang didto sa langit ug dinhi sa yuta, ug nga siya nasuyud sa mga hunahuna sa mga katawhan.
Si Ammon miingon nga ang mga katawhan gilalang diha sa hulagway sa Dios. Siya usab miingon nga ang Dios mitawag kaniya aron sa pagtudlo sa ebanghelyo ngadto ni Lamoni ug sa iyang mga tawo.
Gigamit ang mga kasulatan, si Ammon mitudlo ni Haring Lamoni mahitungod sa Paglalang, Adan, ug Jesukristo.
Si Haring Lamoni mituo kang Ammon ug nag-ampo aron mapasaylo sa iyang mga sala. Unya siya natumba sa yuta ug mora og patay nga tan-awon.
Ang mga suluguon midala sa hari ngadto sa iyang asawa ug gipahigda siya diha sa katre. Human sa duha ka mga adlaw ang mga suluguon mihunahuna nga siya namatay ug mihukom sa paglubong kaniya.
Ang reyna wala motuo nga ang iyang bana namatay. Nakadungog na sa bantugang gahum ni Ammon, siya mihangyo kaniya nga tabangan ang hari.
Si Ammon nasayud nga si Lamoni anaa ubos sa gahum sa Dios. Siya misulti sa reyna nga si Lamoni mimata na sa sunod adlaw.
Siya (reyna) mipabilin sa kang Lamoni nga kiliran sa tibuok gabii. Sa pagka sunod adlaw si Lamoni mibangon ug miingon nga siya nakakita ni Jesukristo. ang hari ug reyna napuno uban sa Espiritu Santo.
Si Lamoni mitudlo sa iyang mga katawhan mahitungod sa Dios ug ni Jesukristo. Kinsa kadtong mituo mihinulsol sa ilang mga sala ug gibunyagan.