Kapitulo 14
Si Abinadi ug si Haring Noah
Si Zeniff usa ka matarong nga hari sa usa ka pundok sa mga Nephite. Sa diha nga siya natigulang, ang iyang anak nga lalaki nga si Noah nahimong hari.
Si Noah dili maayong hari nga sama sa iyang amahan. Sila dautan ug dili mosunod sa mga kasugoan sa Dios.
Siya mipugos sa iyang mga katawhan sa paghatag kaniya og bahin sa ilang lugas, mga mananap, bulawan, ug pilak.
Si Haring Noah mibuhat niini tungod kay siya tapulan. Siya mipahimo sa mga Nephite sa paghatag kaniya sa tanan nga iyang gikinahanglan aron mabuhi.
Siya miilis sa maayong mga pari nga gitawag sa iyang amahan sa dautan nga mga pari. Kining dautan nga mga pari mitudlo sa mga katawhan sa pagpakasala.
Si Haring Noah adunay daghan ng maanindot nga mga gambalay nga gipahimo, naglakip sa usa ka palasyo nga adunay usa ka trono. Ang mga gambalay gidayandayanan og bulawan, pilak, ug mahalon nga kahoy.
Si Haring Noah nahigugma sa mga katigayunan nga iyang gikuha gikan sa iyang mga katawhan. Siya ug ang iyang mga pari miusik sa ilang panahon sa pag-inom og bino ug sa pagkadautan.
Ang Diyos mipadala og usa ka propeta nga ginganlan og Abinadi ngadto sa mga katawhan ni Noah. Si Abinadi mipahimangno kanila nga kon sila dili maghinulsol, sila mahimong mga ulipon sa mga Lamanite.
Sa diha nga si Haring Noah nakadungog kon unsa ang gisulti ni Abinadi, siya nasuko. Siya mipadala og lalaki aron dad-on si Abinadi sa palasyo aron iya nga mapatay.
Si Abinadi gidala ngadto sa hari. Si haring Noah ug ang iyang mga pari nangutana kaniya og daghang mga pangutana. Sila misulay sa paglingla kaniya sa pagsulti og usa ka butang nga sayop.
Si Abinadi wala mahadlok sa pagtubang sa ilang mga pangutana. Siya nasayud nga ang Dios motabang kaniya. Ang mga pari nahibulong sa mga tubag ni Abinadi.
Si Haring Noah nasuko ug mimando sa iyang mga pari sa pagpatay kang Abinadi. Si Abinadi miingon kon sila mohikap kaniya, ang Dios mopatay kanila.
Ang Espiritu Santo nanalipod kang Abinadi aron siya makahuman sa pagsulti kon unsa ang buot ipasulti sa Ginoo kaniya. Ang nawong ni Abinadi migilak. Ang mga pari nahadlok sa paghikap kaniya.
Namulong uban sa gahum gikan sa Dios, si Abinadi misulti sa mga katawhan mahitungod sa ilang kadautan. Iyang gibasa ang mga sugo sa Dios ngadto kanila.
Siya misulti kanila nga si Jesukristo matawo dinhi sa yuta. Si Jesus mohimo niini nga kalagmitan alang sa mga katawhan sa paghinulsol, mabanhaw, ug magpuyo uban sa Dios.
Si Abinadi misulti sa mga katawhan sa paghinulsol ug sa pagtuo ni Jesukristo o sila dili maluwas.
Si Haring Noah ug ang tanan gawas sa usa sa iyang mga pari midumili sa pagtuo kang Abinadi. Si Noah misulti sa iyang mga pari sa pagpatay kang Abinadi. Sila migapus kaniya ug milabay kaniya sa bilanggoan.
Ang usa ka pari kinsa mituo kang Abinadi mao ang ginganlan og Alma. Siya mihangyo kang Haring Noah sa pagbuhi kang Abinadi.
Ang hari nasuko kang Alma ug siya gipalabay ngadto sa gawas. Unya iyang gipadala ang iyang mga suluguon aron sa pagpatay kaniya. Si Alma midagan ug mitago, ug ang mga suluguon wala gayud makakita kaniya.
Human mipuyo ug tulo ka mga adlaw sa bilanggoan, si Abinadi gidala pag-usad sa atubangan ni Haring Noah. Ang hari misulti kang Abinadi sa pagbakwi sa iyang gisulti batok kaniya ug sa iyang mga katawhan.
Si Haring Noah misulti kang Abinadi nga kon dili niya ilimod ang tanan nga iyang nasulti, siya pagapatyon.
Si Abinadi nasayud nga siya nagsulti sa kamatuoran. Siya andam nga mamatay kaysa bakwion kon unsa ang gipadala sa Dios kaniya nga isulti.
Si Haring Noah mimando sa iyang mga pari sa pagpatay kang Abinadi. Sila migapus kaniya, milatus kaniya, ug misunog kaniya ngadto sa kamatayon. Sa wala pa siya namatay, si Abinadi miingon nga si Haring Noah usab mamatay pinaagi sa kalayo.
Pipila sa mga Nephite mibatok kang Haring Noah ug misulay sa pagpatay kaniya. Ang kasundalohan nga Lamanite miabut usab aron sa pagpakig-away sa hari ug sa iyang mga sumusunod.
Ang hari ug ang iyang mga sumusunod nanagan gikan sa mga Lamanite, apan ang mga Lamanite nakadakop ug misugod pagpamatay kanila. Ang hari misulti sa iyang kalalakihan sa pagbiya sa ilang mga banay ug mopadayon sa pagdagan.
Daghan sa mga kalalakihan dili mobiya. Sila nadakpan sa mga Lamanite.
Kadaghanan sa mga kalalakihan kinsa midagan og palayo uban kang Haring Noah nasubo. Sila buot mobalik ug motabang sa ilang mga asawa ug mga anak ug sa ilang mga katawhan.
Si Haring Noah dili buot nga ang kalalakihan mobalik ngadto sa ilang mga banay. Siya mimando kanila sa pagpabilin uban kaniya.
Ang mga kalalakihan nasuko kang Haring Noah. Sila misunog kaniya ngadto sa kamatayon, ingon sa napanagna ni Abinadi. Unya sila mibalik sa ilang mga banay.