Kapitulo 13
Si Zeniff
Sila nakakita ug mga Lamanite nga nagpuyo didto. Si Zeniff ug upat sa iyang mga tawo miadto ngadto sa dakbayan aron makigsulti sa hari. Sila nangutana ni Haring Laman kon sila makapuyo ba diha sa iyang yuta.
Si Haring Laman miingon nga sila makaangkon og duha sa iyang mga dakbayan. Ang hari buot mopapuyo kanila diha sa iyang yuta aron siya mohimo kanila nga iyang mga ulipon.
Ang mga katawhan ni Zeniff mitukod sa ilang mga panimalay ug miayo sa mga paril palibot sa ilang mga dakbayan. Sila mitanom og daghang mga matang sa lugas ug prutas. Sila usab adunay mga panon sa mga mananap.
Si Haring Laman misulti sa iyang mga katawhan nga ang mga Nephite nag-anam pagka labihan ka gamhanan. Sa wala madugay daghan nga mga Lamanite ang milakaw aron pagsulong sa mga Nephite ug mangawat sa ilang mga mananap ug mga tanom.
Ang mga Nephite midagan ngadto sa dakbayan sa Nephi. Didto si Zeniff misangkap sa mga katawhan og mga pana ug mga udyong, mga espada, mga bunal, ug mga saplong. Sila milakaw aron sa pagpakig-away sa mga Lamanite.
Sa wala pa sila makig-away, ang mga Nephite nag-ampo, nangayo sa Dios og panabang. Ang Dios mipanalangin sa mga Nephite og dugang kusog, ug ilang nabuntog ang mga Lamanite.
Human sa gubat si Zeniff mibutang og mga magbalantay palibot sa mga dabayan sa Nephite. Siya buot mopanalipod sa iyang mga katawhan ug sa ilang mga mananap gikan sa mga Lamanite.
Ang mga Nephite nagpuyo sa kalinaw sulod sa daghang mga tuig. Ang mga lalaki nagtrabaho diha sa mga umahan, ug ang mga babaye nagtuyok og hilo ug naghimog mga senina.
Si Haring Laman namatay ug ang iyang anak nga lalaki nahimong hari. Ang bag-ong hari mipadala sa iyang mga sundalo aron makig-away sa mga Nephite.
Ang mga Nephite sa gihapon nakadawat og kusog gikan sa Dios. Sila mipatay og daghang mga Lamanite, ug ang uban nangan palayo.