Kapitulo 21
Ang mga Amlicite
Ang matarong nga mga Nephite dili buot ni Amlici nga mahimong nila nga hari. Sila nasayud nga siya buot molaglag sa Simbahan sa Dios.
Ang mga Nephite nagtigum diha sa managlain nga mga pundok aron sa paghukom kon si Amlici ba ang himoon nga hari. Kadaghanan sa mga katawhan mipili batok kang Amlici, ug siya wala mahimong hari.
Si Amlici ug ang iyang mga sumusunod nangasuko. Sila mibiya sa mga Nephite, mihimo kang Amlici nga ilang hari, ug mitawag sa ilang mga kaugalingon nga mga Amlicite. Si Amlici mimando kanila sa pagpakig-away sa mga Nephite.
Ang matarong nga mga Nephite nangandam aron sa pagpanalipod sa ilang mga kaugalingon pinaagi sa mga pana ug mga udyong, mga espada, ug uban mga hinagiban.
Ang mga Amlicite misulong, ug ang mga Nephite, kinsa gipangulohan ni Alma ug gilig-on sa Ginoo, mipatay og daghan kanila. Ang nahibilin sa mga Amlicite nanagan palayo.
Si Alma mipadala og mga tigpaniid aron sa pagbantay sa mga Amlicite. Ang mga tigpaniid nakakita kanila nga mipasakop sa usa ka dakong kasundalohan sa mga Lamanite ug misulong sa mga Nephite nga nagpuyo duol sa Zarahemla.
Ang mga Nephite miampo, ug ang Dios mitabang kanila pag-usab. Sila nakapatay og daghan nga mga sundalo sa kasundalohan sa mga Lamanite-Amlicite.
Si Alma ug si Amlici nagsangka sa usag usa pinaagi sa mga espada. Si Alma nag-ampo nga ang iyang kinabuhi maluwas, ug ang Dios mihatag kaniya sa kusog aron sa pagpatay ni Amlici.
Ang mga Nephite migukod sa mga Lamanite ug mga Amlicite ngadto sa kamingawan. Daghan sa mga samaran nangmatay didto ug gipanga-on sa ihalas nga mga mananap.
Sama sa mga Lamanite, ang mga Amlicite nagmarka sa ilang mga kaugalingon ug pula, diin natuman ang usa ka panagna. Ang mga Amlicite mipahimulag sa ilang mga kaugalingon gikan sa mga panalangin sa ebanghelyo.