Kapitulo 38
Ang Pagbuno sa Labaw nga Maghuhukom
Dautan nga mga tawo nahimong mga maghuhukom ibabaw sa mga Nephite. Sila misilot sa matarong nga mga tawo apan dili ang dautan nga mga tawo.
Si Nephi nasubo sa pagkakita sa hilabihan ka dautan taliwala sa mga katawhan.
Usa ka adlaw siya nag-ampo didto ibabaw sa tore sa iyang tanaman. Ang iyang tanaman nahimutang duol sa dakong dalan nga nagpingon ngadto sa tiyangihan sa Zarahemla.
Ang mga tawo nga milabay sa dakong dalan nakadungog kang Nephi nga nag-ampo. Usa ka dako nga pundok nagtapok, nahibulong ngano nga siya masulub-on kaayo.
Sa diha nga si Nephi nakakita sa mga tawo, siya misulti kanila nga siya nasubo tungod sa ilang pagkadautan. siya misulti kanila sa paghinulsol.
Siya mipahimangno kanila nga kon sila dili maghinulsol, ang ilang mga kaaway moagaw sa ilang mga pinuy-anan ug mga dakbayan ug ang Ginoo dili motabang kanila sa pagpakig-away sa ilang mga kaaway.
Si Nephi miingon nga ang mga Nephite mas dautan kay sa mga Lamanite tungod kay ang mga Nephite natudloan sa mga sugo apan wala magsunod niini.
Siya miingon nga kon ang mga Nephite dili maghinulsol, sila pagalaglagon.
Pipila sa dautan mga maghuhukom anaa didto. Sila buot nga ang mga tawo mosilot kang Nephi tungod sa pagsulti batok kanila ug sa ilang balaod.
Pipila sa mga tawo miuyon sa dautan nga mga maghuhukom. Ang uban mituo kang Nephi; sila nasayud nga siya usa ka propeta ug nagsulti sa tinuod.
Si Nephi misulti sa mga katawhan nga sila misupak batok sa Dios ug sa dili madugay pagasilotan kon sila dili maghinulsol.
Si Nephi misulti sa mga katawhan sa paglakaw og pangitaon ang ilang labaw nga maghuhukom. Siya naghigda sa iyang kaugalingon nga dugo, gibuno sa usa niya ka igsoon nga lalaki kinsa nagtinguha sa iyang katungdanan,
Lima ka mga lalaki gikan sa pundok midagan aron pagtan-aw sa labaw nga maghuhukom. Sila dili motuo nga si Nephi usa ka propeta sa Dios.
Sa diha nga sila nakakita ni Seezoram, ang labaw nga maghuhukom, naghigda diha sa iyang dugo, sila natumba sa yuta sa kahadlok. Karon sila nasayud nga si Nephi usa ka propeta.
Ang mga suluguon ni Seezoram nakakita na sa labaw nga maghuhukom ug midagan aron sa pagsulti sa mga katawhan. Sila mibalik ug nakakita sa lima ka mga lalaki nga naghigda didto.
Ang mga tawo naghunahuna nga ang lima ka lalaki maoy mibuno kang Seezoram.
Sila mibalhog sa lima ka mga lalaki sulod sa bilanggoan ug unya mipadala ug pulong sa tibuok dakbayan nga ang labaw nga maghuhukom gipatay ug nga ang mga mamumuno anaa na sa bilanggoan.
Pagka sunod adlaw ang mga tawo miadto ngadto diin ang labaw nga maghuhukom ilubong. Ang mga maghuhukom kinsa didto sa tanaman ni Nephi nangutana kon hain na ang lima ka mga tawo.
Ang mga maghuhukom mihangyo nga motan-aw sa sinumbong nga mga mamumuno.
Ang sinumbong nga mga mamumuno mao ang lima ka mga lalaki kinsa midagan gikan sa tanaman mi Nephi ngadto sa labaw nga maghuhukom.
Ang lima ka mga lalaki miingon nga ilang nakit-an ang labaw nga maghuhukom nga naghigda sa dugo, sama sa giingon ni Nephi. Og unya ang mga maghuhukom mipasangil kang Nephi nga nagpadala ug usa ka tawo aron sa pagbuno ni Seezoram.
Nasayud nga si Nephi usa ka propeta, ang lima ka mga lalaki milantugi sa mga maghuhukom, apan sila dili maminaw. Ilang gipagapus si Nephi.
Ang mga maghuhukom mitanyag kang Nephi og salapi ug sa iyang kinabuhi kon siya moingon nga siya milaraw sa pagpatay sa labaw nga maghuhukom.
Si Nephi misulti sa mga maghuhukom sa paghinulsol sa ilang pagkadautan. Unya siya misulti kanila sa pag-adto ngadto kang Seantum, igsoon nga lalaki ni Seezoram.
Si Nephi misulti kanila sa pagpangutana kang Seantum kon siya ug si Nephi naglaraw ba sa pagbuno ni Seezoram. Si Nephi miingon nga si Seantum miingon nga “wala.”
Unya ang mga maghuhukom mangutana ni Seantum kon siya ba ang mipatay sa iyang igsoon nga lalaki. Si Seantum moingon nga “dili,” apan ang mga maghuhukom makakita og dugo diha sa iyang kupo.
Si Nephi miingon nga si Seantum unya mangurog ug mangluspad ug sa katapusan mosulti sa pagpatay sa iyang igsoon nga lalaki.
Ang mga maghuhukom miadto sa balay ni Seantum, ug ang tanan nahitabo sama sa gipanulti ni Nephi. Si Nephi ug ang lima ka mga lalaki gibuhian.
Samtang ang mga tawo milakaw palayo ni Nephi, ang uban miingon nga siya usa ka propeta; ang uban miingon nga siya usa ka dios. Si Nephi mipauli sa panimalay, sa gihapon nagsubo sa ilang pagkadautan.