Kapitulo 32
Si Kapitan Moroni ug ang Bandila sa Kalingkawasan
Usa ka dautan nga tawo nga ginganlan og Amalickiah buot nga mahimong hari sa mga Nephite. Daghan nga mga Nephite ang mibiya sa Simbahan aron sa pagsunod kaniya.
Kon si Amalickiah mahimo nga hari, siya musulay sa pagpagpag sa Simbahan sa Dios ug wagtangon ang kalingkawasan sa mga katawhan.
Sa diha nga si Kapitan Moroni, ang pangulo sa Nephite nga mga kasundalohan, nakadungog sa laraw ni Amalickiah nga mahimong hari, siya nasuko.
Si Moroni migisi sa iyang kupo aron himoon nga bandila. Ibabaw niini siya misulat ug usa ka mensahe aron sa pagpahinumdom sa mga tawo sa pagpanalipod sa ilang relehiyon, kagawasan, ug kalinaw.
Si Moroni mibutang sa bandila ibabaw sa usa ka tukon ug gitawag kini og ang bandila sa kalingkawasan. Unya nagsul-ob sa iyang kalasag, siya miluhod aron mag-ampo.
Siya nangayo sa Dios nga panalipdan kadtong kinsa mituo ni Jesukristo ug nag-ampo alang sa kagawasan diha sa yuta, nagtawag niini og yuta sa kagawasan.
Si Moroni milakaw taliwa sa mga tawo. Nagwagayway sa bandila sa kalingkawasan, siya mitawag kanila sa pagduol ug pagtabang sa pagpanalipod sa ilang kagawasan.
Ang tawo miabot gikan sa tibuok kayutaan. Sila misaad sa pagsunod sa mga sugo sa Dios ug makig-away alang sa kagawasan.
Sa diha nga si Amalickiah nakakita kon unsa kadaghan sa mga Nephite ang nagpasakop kang Moroni, siya nahadlok. Siya ug ang iyang mga sumusunod mibiya aron sa pagpasakop sa mga Lamanite.
Si Moroni ug ang iyang mga sundalo misulay sa pagsanta kanila, apan si Amalickiah ug ang pipila sa iyang mga tawo nakaikyas.
Si Moroni mibutang og bandila sa kalingkawasan ibabaw sa matag tore sa Nephite nga yuta. Ang mga Nephite mibantay sa ilang kagawasan ug usab adunay kalinaw.