Kapitulo 27
Si Korihor
Usa ka tawo nga ginganlan og Korihor miabot sa Zarahemla. Siya dili motuo ni Jesukristo ug misangyaw nga unsa ang gisulti sa mga propeta mahitungod sa Manluluwas dili tinuod.
Si Korihor misulti sa mga tawo nga sila mga buang sa pagtuo nga si Jesus moanhi dinhi sa yuta ug moantus alang sa ilang mga kasal-anan.
Siya miingon nga ang mga tawo dili masilotan alang sa ilang mga sala tungod kay wala may kinabuhi human sa kamatayon. Daghan nga mga tawo ang mituo ni Korihor. Sila nahimong mga dautan.
Si Korihor misulay sa pagsangyaw ngadto sa mga tawo ni Ammon, apan sila dili maminaw. Sila migapos kaniya ug gidala ngadto ni Ammon, kinsa mipugos kaniya pagpagawas sa dakbayan.
Si Korihor miadto sa yuta ni Gideon, apan ang mga tawo didto dili usab maminaw kaniya. Ang punuan nga maghuhukom mipadala kaniya ngadto kang Alma.
Si Alma nangutana kang Korihor kon siya motuo ba sa Dios. Si Korihor miingon siya wala. Si Alma mipamatuod nga adunay Dios ug nga si Kristo moabot.
Si Korihor buot nga si Alma mohimo og usa ka milagro aron sa pagpamatuod nga adunay usa ka Dios. Si Korihor miingon siya motuo sa Dios kon siya makakita og usa ka timailhan sa gahum sa Dios.
Si Alma misulti kang Korihor nga siya nakakita na og daghang mga timailhan sa gahum sa Dios pinaagi sa mga kasulatan ug sa mga pagpamatuod sa tanang mga propeta.
Si Alma miingon ang kalibutan ug ang tanan nga mga butang niini ug ang kalihokan sa mga planeta diha sa langit mao usab ang mga timailhan nga adunay usa ka Dios.
Si Korihor sa gihapon midumili sa pagtuo. Si Alma nasubo tungod sa kang Korihor nga kadautan ug mipahimangno kaniya nga ang iyang kalag mahimo nga laglagon.
Si Korihor sa gihapon gusto og usa ka timailhan aron sa pagpamatuod nga adunay usa ka Dios. Si Alma miingon nga ang timailhan gikan sa Dios mao nga si Korihor dili na makahimo sa pagsulti.
Human si Alma nakaingon niini, si Korihor dili na makasulti.
Si Korihor misulat nga siya nasayud nga kini timailhan gikan sa Dios ug nga siya sa kanunay nakahibalo nga adunay usa ka Dios. Siya mihangyo kang Alma sa pagampo ug pagtangtang sa tunglo.
Si Alma nasayud nga kon si Korihor makasulti siya mamakak na usab ngadto sa mga tawo. Si Alma miingon nga ang Ginoo ang mohukom kon si Korihor makasulti pag-usab.
Ang Ginoo wala mohatag ni Korihor pagbalik sa iyang tingog. Si Korihor miadto gikan sa balay ngadto sa laing balay, nagpakilooy og pagkaon.
Ang labaw nga maghuhukom mipadala og sulat sa tibuok yuta nagsulti kon unsa ang nahitabo kang Korihor. Siya misulti niadtong kinsa mituo ni Korihor sa paghinulsol. Ang mga tawo naghinulsol.
Si Korihor milakaw aron pagpuyo uban sa mga Zoramite. Us ka adlaw samtang siya nagpakilimos, siya giyatakan hangtud namatay.