Kapitulo 34
Si Helaman ug ang 2,000 nga Batan-on nga mga Mangugubat
Sa diha nga ang mga kaaway sa mga katawhan ni Ammon misulong sa mga Nephite, ang mga katawhan ni Ammon buot moputol sa ilang saad ug motabang sa mga Nephite sa pagpakig-away.
Si Helaman ug ang ubang nga mga pangulo sa mga Nephite dili buot nga ang mga katawhan ni Ammon nga moputol sa ilang saad ngadto sa Dios.
Ang batan-on nga anak nga mga lalaki sa mga katawhan ni Ammon wala makahimo sa saad. Sila buot motabang sa mga sundalo nga mga Nephite sa pagpakig-away alang sa kagawasan.
Duha ka libo niining batan-on nga mga lalaki mipili sa pagpanalipod sa ilang nasud. Sili mihangyo kang Helaman nga mahimo nilang pangulo.
Kining batan-on nga mga lalaki maoy bangiitan, isog, ug kusgan. Sila usab matinud-anon ug kasaligan, ug sila nagtuman sa mga sugo sa Dios.
Si Helaman nangulo sa iyang 2,000 nga batan-ong mga mangugubat paingon sa gubat. Siya mitawag kanila nga iyang mga anak, ug sila mitawag kaniya nga ilang amahan.
Bisan tuod ang anak nga mga lalaki ni Helaman wala pa gayud makaaway, sila wala mahadlok. Ang ilang mga inahan mitudlo kanila sa pagbaton og hugot nga pagtuo sa Dios ug sa pagkahibalo nga siya motabang kanila.
Si Helaman ug ang iyang mga sundalo nakig-away og pipila ka mga gubat batok sa mga Lamanite. Kining batan-on nga mga lalaki misunod sa tanang mga mando ni Helaman.
Sila nakig-away nga maisugon ug mitabang sa pag-aabog sa mga kaaway. Human sa gubat nakita ni Helaman nga ang tanan niyang anak nga mga lalaki nasakitan apan walay usa nga namatay.
Usa kadto ka milagro. Si Helaman nalipay pag-ayo. Siya nasayud nga kining batan-on nga mga lalaki gipanalipdan tungod sa ilang dakong hugot nga pagtuo sa Diyos.