Isahluko 49
UMormoni neeMfundiso Zakhe
Ekugqibeleni phantse bonke abantu baba ngaboni, amaNifayithi namaLeymenayithi.
Indoda enobulungisa, u-Amaroni, waye neembali ezingcwele. UMoya Oyingcwele wamxelela ukuba makazifihle ukuze zikhuseleke.
U-Amaroni waxelela uMormoni, inkwenkwe eneminyaka elishumi, ukuba iimbali ezingcwele zazifihlwe phi. U-Amaroni wayeyazi ukuba angamthemba uMormon.
Xa enama-24, uMormon wayemele ukuba ayokuthabatha amacwecwe kaNifayi aze abhale kuwo ngabantu bakhe.
Xa uMormoni wayeneminyaka eli-11, kwaqala imfazwe phakathi kwamaNifayithi namaLeymenayithi. AmaNifayithi aphumelela kwakho uxolo kwakhona.
Kodwa amaNifayithi ayesona yade iNkosi yathatha abafundi bayo abathathu, kwaze kwaphela imimangaliso nokuphilisa. UMoya Oyingcwele waze wayeka ukukhokela abantu.
Xa uMormoni wayene-15, watyelelwa nguYesu Krestu. UMormoni wafunda okuninzi ngoMsindisi nokulunga kwakhe.
UMormoni wayefuna ukushumayela ebantwini, kodwa uYesu akazange ayivume loo nto ngoba abantu babekhohlakele kakhulu. Iintliziyo zabo zazichasene noThixo.
Kungekudala yaqala enye imfazwe. UMormoni wayemkhulu kwaye omelele, kwaye amaNifayithi akhetha yena ukuba makakhokele umkhosi wawo.
AmaNifayithi alwa namaLeymenayithi iminyaka emininzi. UMormoni wazama ukukhuthaza abantu bakhe ukuba balwele iintsapho namakhaya abo.
AmaNifayithi ayekhohlakele kangangokuba iNkosi yayingabancedisi.
UMormoni waxelela amaNifayithi ayezakusinda kuphela xa ayenokuguquka kwaye abhaptizwe. Kodwa abantu abavuma.
Baqhayisa ngamandla abo, besithi bangawabulala onke amaLeymenayithi. Ngenxa yenkohlakalo yamaNifayithi, uMormon wala ukuwakhokela.
AmaLeymenayithi aqalisa ukoyisa amaNifayithi kuyo yonke imilo. UMormoni wenza isigqibo sokukhokela umkhosi wamaNifayithi kwakhona.
Wayeyazi ukuba amaNifayithi akhohlakeleyo akasoze ayiphumelele imfazwe. Akazange aguquke okanye athandazele uncedo awayeluswele.
UMormoni wawathatha onke amacwecwe kwinduli apho u-Amaroni wayewafihle khona waze wabhalela abantu ababezakuthi ngenye imini bazifunde ezi mbali.
Wayefuna wonke umntu, kuquka namaYuda, ukuba azi ngoYesu Krestu, aguquke kwaye abhaptizwe, kwaye aphile ivangeli kwaye asikelelwe.
UMoya Oyingcwele waphembelela uMormoni ukuba afake amacwecwe amancini kaNifayi, awayequlathe iziprofetho malunga nokuza kukaKrestu, kunye namacwecwe kaMormoni.
UMormoni wawakhokela amaNifayithi ukuya kumhlaba waseKhumora, apho azilungiselela ukulwa namaLeymenayithi kwakhona.
UMormoni wayesaluphala. Wayeyazi ukuba le yayiyimfazwe yokugqibela. Wayengafuni ukuba amaLeymenayithi azifumane iimbali ezingcwele azitshabalalise.
Wanikeza ngamacwecwe kaMormoni kunyana wakhe, uMoronayi, wafihla amanye amacwecwe kwinduli yaseKhumora.
AmaLeymenayithi ahlasela kwaye abalula onke amaNifayithi ngaphandle kwangama-24. UMormoni wayenzakele.
UMormoni wayekhathazekile ngenxa yokuba amaNifayithi amaninzi ayeswelekile, kodwa wayeyazi ukuba ayeswelekile ngenxa yokwala uYesu.
UMormoni wayezamile ukufundisa amaNifayithi inyaniso. Wayewaxelele ukuba kubaluleke kangakanani na ukuba nokholo kuYesu Krestu.
Wayezamile ukubafundisa ukuba babenethemba ngenxa yeNtlawulelo kaYesu Krestu babe nothando lokwenene, olo iluthando olumsulwa lukaKrestu.
Kwaye uMormoni wayebhale iincwadi eziya kunyana wakhe, uMoronayi, owayefundise amaNifayithi ivangeli.
UMormoni wabhala ngenkohlakalo egqithiseleyo yamaNifayithi. Waxelela uMoronayi ukuba ahlale ethembekile kuYesu Krestu.
AmaLeymenayithi ambulala uMormoni kunye nawo onke amaNifayithi ngaphandle koMoronayi, owagqibezela iimbali.