Mwakoro 68
Kaotioti ae kaotaki rinanon Iotebwa Timiti te Burabeti, i Hiram, Ohio, n Nobembwa 1, 1831, ni kaekan te tataro bwa e na kaotaki nanon te Uea ni kaineti ma Orson Hyde, Luke S. Johnson, Lyman E. Johnson, ao William E. McLellin. E ngae ngke mwakoron te kaotioti aei e kaineti nakoia mwaane aika aman aikai, angina kanoana e kaineti nakon te Ekaretia ae bwanin. Te kaotioti aei e kaanauaki i an ana kairiri Iotebwa Timiti ngke e boretiaki ni bokin Reirei ao Berita aika Tabu n te 1835.
1–5, Aia taeka unimwaane ngke a rootaki n te Tamnei ae Raoiroi bon koroboki aika tabu; 6–12, A riai unimwaane n tataekinna ao ni bwabetito, ao kanikina a na iriiria taan kakoaua raoi; 13–24, Te karimoa n nati i buakoia natin Aaron mwaane a kona ni beku bwa te Bitiobi ae Tararua (are, taui kiingin te beretitentii bwa te bitiobi) i an ana kairiiri te Moan Beretitentii; 25–28, Kaaro a tuangaki bwa a na reiakina te euangkerio nakoia natiia; 29–35, Aomata aika Itiaki a riai n kawakina te Tabati, beku ma te botumwaaka, ao n tataro.
1 Au tia mwakuri, ae Orson Hyde, e weteaki man katabuana bwa e na katanoata te euangkerio ae akea tokina, mai iroun Tamnein te Atua ae maiu, man te botanaomata teuana nakon te botanaomata teuana, ao man te aba teuana nakon te aba teuana, n aia botaki naake a buakaka, i nanon aia auti n nebo, ni maroro ma ngaia ao ni kabwarabwarai koroboki aika tabu ni kabane nakoia.
2 Ao, nooria, ao taraia, aio te banna nakoia ni kabane naake a katabuaki nakon te nakoanibonga aei, are aia mition e rineaki ibukia bwa a na waki nako—
3 Ao aio te banna nakoia, bwa a na taetae ngke a kairaki iroun te Tamnei are Raoiroi.
4 Ao bwaai nako are a na taekinna ngkana a kairaki iroun te Tamnei are Raoiroi a na riki bwa koroboki aika tabu, ana kantaninga te Uea, ana iango te Uea, ana taeka te Uea, e na riki bwa bwanaan te Uea, ao mwaakan te Atua nakon te kamaiuaki.
5 Nooria, aio ana berita te Uea nakoimi, O ngkami au taan mwakuri.
6 Mangaia are, kukurei, ao tai maaku, bwa Ngai te Uea I mena iroumi, ao n tei ibukimi; ao kam na kaota koauau, are Iesu Kristo, bwa Ngai Natin te Atua ae maiu, bwa Ngai ngkoa, bwa Ngai ngkai, ao bwa Ngai ae e na roko.
7 Aio ana taeka te Uea nakoim, au tia mwakuri ae Orson Hyde, ao nakoim naba au tia mwakuri ae Luke Johnson, ao nakoim naba au tia mwakuri ae Lyman Johnson, ao nakoim au tia mwakuri ae William E. McLellin, ao nakoimi ni kabane unimwaane aika kakaonimaki n au ekaretia—
8 Naako ngkami ni kabuta te aonaba, n tataekina te euangkerio nakoia aomata ni kabane, ni mwakuri n te kariaia are I a tia n anganingkami, ni bwabetito n aran te Tama, ao te Nati, ao te Tamnei ae Raoiroi.
9 Ao ane e kakoaua ao ni bwabetitoaki e na kamaiuaki, ao ane e aki kakoaua e na kabuakakaaki.
10 Ao ane e kakoaua e na kakabwaiaki ma kanikina aika a na iriiria, n aron ae e koreaki.
11 Ao nakoimi e na kaotaki bwa kam na atai kanikinaean taian tai, ao kanikinaean rokon Natin te Aomata;
12 Ao ni kabane are e na kakoaua te Tama ibukiia, kam na anganaki te mwaaka ni kabaeia nakon te maiu ae akea tokina. Amen.
13 Ao ngkai, ni kaineti ma bwaai irarikin te berita aika tabu ma tua, ae ngaia aikai—
14 Iai tabeman bitiobi ae a na kaokoroaki nakon te ekaretia n taai aika a na roko, n oin ana tai te Uea, bwa a na ibuobuoki n aron are te moan;
15 Mangaia are a na riki bwa ibonga aika rietata ake a tau, ao a na rineaki iroun te Moan Beretitentii n te Nakoanibonga ae te Merekitereka, ma tii ngkana bon kanoan raoi Aaron.
16 Ao ngkana bon kanoan raoi Aaron iai irouia te kariaia nakon te bitiobiriki, ngkana ngaia tenaan karimoa n nati i buakoia natin Aaron;
17 Bwa te karimoa n nati e taua te kariaia n tararua n te beretitentii i aon te nakoanibonga aei, ao taian kiing ke te kariaia n te nakoanibonga aei.
18 Akea te aomata ae iai irouna te kariaia nakon te nakoa aei, n taui kiingin te nakoanibonga aei, ma tii ngkana kanoan raoi ao te karimoa n nati mai iroun Aaron.
19 Ma ibukina te ibonga ae rietata n te Nakoanibonga ae te Merekitereka iai irouna te kariaia ni karaoi mwakuri ni kabane n tenaan nakoa ake a rinano e kona ni karaoi mwakuri n te nakoa ae te bitiobi ngkana a aki kona ni kuneaki kanoan raoi Aaron, ngkana e weteaki ao ni kaokoroaki ao ni katabuaki nakon te mwaaka aei, i aan baia te Moan Beretitentii n te Nakoanibonga ae te Merekitereka.
20 Ao kanoan raoi Aaron, a riai naba n rineaki mai iroun te Beretitentii aei, ao ni kuneaki n tau, ao ni kabiraki, ao ni katabuaki i aan baia kaain te Beretitentii aei, ngkana a aki ao bon akea te kariaia irouia ni karaoi mwakuri n te nakoanibonga are irouia.
21 Ma, ngkana e boto i aon te kariaia ibukin inaomataia n te nakoanibonga are man te karo nakon natina te mwaane, a kona ni bubuti kabirakiia n te tai are a kona ni kaota koauan rikiia, ke ni kakoaua man te kaotioti mai iroun te Uea i aan baia te Beretitentii are atongaki i eta.
22 Ao teuana riki, akea te bitiobi ke te ibonga ae rietata ae e na kaokoroaki ibukin te mwakuri ni ibuobuoki aei ae e na kabowiiaki ke ni kabuakakaki ibukin bure nako, ma tii i matan te Moan Beretitentii n te ekaretia;
23 Ao ngkana e teimatoa ni kuneaki bwa e bure i matan te Beretitentii aei, man te kakoaua ae e aki kona ni kuneaki kairuana, e na bon kabuakakaaki;
24 Ao ngkana e raira nanona e na kabwaraaki ana bure, ni kaineti ma te berita ae tabu ao tuan te ekaretia.
25 Ao teuana riki, ngkana a teimatoa kaaro ni karikia natiia i Tion, ke n ana titeiki ake a tia ni kateaki, ae a aki reireiniia bwa a na oota n te reirei ibukin te rairannano, te onimaki iroun Kristo ae Natin te Atua ae maiu, ao te bwabetito ao te bwaintituaraoi ae te Tamnei ae Raoiroi man te katoka bai, ngkana ai waniua aia ririki, te bure e na bon mena i aon atuuia kaaro.
26 Bwa aio e na riki bwa te tua nakoia kaain Tion, ke n ana titeiki ake a tia ni kateaki.
27 Ao natiia a na bwabetitoaki ibukin kamaunaan aia bure ngkana waniua aia ririki, ao ni karekea te katoka bai.
28 Ao a na reireiniia naba natiia n tataro, ao n eti raoi n nakonako i matan te Uea.
29 Ao kaain Tion a na karinea naba te bong ae te Tabati ao n tabuia.
30 Ao kaain Tion a na uringa naba aia mwakuri, ngkana a teimatoa n rineaki bwa a na mwakuri, ni kakaonimaki nakon aia kabane ni konaa; bwa te aomata ae taningaroti e na bon uringaki i matan te Uea.
31 Ngkai, Ngai, te Uea, I aki kukurei ma kaain Tion, bwa iai aomata aika taningaroti i buakoia; ao natiia a rikirake naba i nanon te buakaka; a aki naba ukoukora te kaubwai ae akea tokina ma nanoia ni koaua ma a bon onrake mataia n te mataai.
32 A aki riai bwaai aikai, ao n riai ni bua mai i buakoia; mangaia are, e riai au tia mwakuri ae Oliver Cowdery n uoti taeka aikai nakon aban Tion.
33 Ao te tua ae I anganiia—bwa ane e aki karaoa ana tataro imatan te Uea ni bon taina, e riai n uringaki imatan aia tia moti au aomata.
34 Taeka aikai a bon koaua ao ni kakaonimaki; mangaia are, tai urui, ke ni kamaunai taeka mai iai.
35 Nooria, Ngai te Arebwa ao te Omeka, ao e tawe rokou. Amen.