Lēsoni 20 Naunau ʻa e Faiakó

Ko e Ngaahi Fatongia Toputapu ʻo e Ngaahi Tamaí

Kuo tuku ʻe he Tamai Hēvaní ki Hono ngaahi fohá, ʻa e fatongia toputapu ke maluʻi honau ngaahi fāmilí. ʻI he lēsoni ko ʻení, ʻe fakamatalaʻi ai ʻe he kau akó ʻa e ngaahi founga ʻe lava ke fakahoko ai ʻe he houʻeiki tangatá ʻa e fatongia ko ʻení. Te nau aleaʻi ʻa e founga ʻoku fakatātaaʻi haohaoa ai ʻe he Tamai Hēvaní mo Sīsū Kalaisi ʻa e fatongia ʻoku maʻu ʻe he ngaahi tamaí ke maluʻi honau ngaahi fāmilí. ʻE fakalaulauloto foki mo palani ʻe he kau akó ʻa e founga te nau lava ai ʻo falala ki he tokoni mei he langí, ʻi heʻenau vahevahe ʻa e fatongia toputapu ko ʻení mo honau ngaahi malí.

Fakatokangaʻi ange: Naʻe aleaʻi ʻi he ngaahi lēsoni kimuʻá ʻa e ngaahi fatongia ʻo e houʻeiki tangatá ke pule mo tokonaki maʻa honau ngaahi fāmilí.

Ngaahi Fokotuʻu ki Hono Akoʻí

Ko e ʻOtuá ʻa e sīpinga haohaoa ki he tuʻunga fakaetamaí.

Fakakaukau ke hivaʻi ʻa e himi “ʻE Tamai ʻi Hēvani ē” (Ngaahi Himi, fika 185) pe ko ha himi kehe ʻoku fekauʻaki mo ʻetau Tamai Hēvaní, ko ha konga ʻo e polokalama lotu ki he lēsoni ko ʻení.

ʻE lava ke ke kamata e lēsoní ʻaki hano fakaʻaliʻali ha fakatātā ʻo ha tamai mo hono fāmilí pea ʻeke ki he houʻeiki tangata ʻi he kalasí ʻa e fehuʻi ko ʻení:

• Ko e hā ha ngaahi fakakaukau, ongo, pe hohaʻa ʻokú ke maʻu fekauʻaki mo e hoko ko ha tamaí?

Ka hili ia pea fehuʻi ange ki he kalasí:

• ʻOkú ke pehē ko e hā ha niʻihi ʻo e ngaahi faingataʻa lahi taha ki he hoko ko ha tamai angatonu ʻi hotau kuongá? (Fakakaukau ke fakaafeʻi e kau akó ke nau toe vakaiʻi ʻa e fakamatala ʻa Palesiteni Linitā K. Peatoni ʻi he konga 1 ʻo e naunau teuteú.)

• Ko e hā ha ngaahi meʻa makehe mei he anga e vakai ʻa ha kakai ʻe niʻihi mo e ʻOtuá ki he tuʻunga fakaetamaí?

Fakamanatu ki he kau akó, lolotonga hono ako e naunau teuteú, ne nau ʻiloʻi ko e Tamai Hēvaní ʻa e sīpinga haohaoa ʻo e tuʻunga tamai angatonú (vakai, fakamatala ʻa ʻEletā D. Toti Kulisitofasoni ʻi he konga 1 ʻo e naunau teuteú).

Ko Hono Fakatupulaki ʻEtau Founga Akoʻí mo e Akó

Fakamamafaʻi ʻa e ngaahi sīpinga ʻo e Tamai Hēvaní mo Sīsū Kalaisí. Naʻe fakahinohinoʻi ʻe he Fakamoʻuí ʻEne kau ākongá ke nau hangē ko Iá (vakai 3 Nīfai 27:27). Fekumi ki ha ngaahi founga ke fakamamafaʻi ai ʻEne ngaahi sīpinga haohaoa mo e Tamai Hēvaní ʻi hoʻomou aleaʻi e ngaahi moʻoní ʻi he kalasí.

Fakamatalaʻi ange te tau lava foki ʻo ako e ngaahi tefitoʻi moʻoni ʻo e tuʻunga ʻo e tamai angatonú mei hono ako e sīpinga ʻa Sīsū Kalaisí. Toe vakaiʻi fakataha ʻa e Sione 10:11–15 pea aleaʻi ʻa e meʻa naʻe ako ʻe he kau akó fekauʻaki mo e tuʻunga ʻo e tamai angatonú mei he fatongia ʻo e Fakamoʻuí ko hotau Tauhi Sipi Leleí.

• Ko e hā ha meʻa ʻe fie maʻu ke “tuku hifo” (veesi 15), pe tukuange, ʻe he houʻeiki tangatá kae lava ke fakakakato honau fatongia toputapu ko e ngaahi tamaí? (Fakakaukau ke vahevahe ʻa e fakamatala ko ʻeni naʻe fai ʻe ʻEletā Kulisitofasoní, ko ha konga ʻo e fealēleaʻakí: “Tau liʻaki [houʻeiki tangata] e moʻui fakatāutahá mo e tōʻonga tauʻatāina ʻoku talaki ʻe he kuonga ní ka tau tomuʻa fakakaukauʻi e fiefia mo e lelei ʻa e niʻihi kehé” [“Ngaahi Tamai,” Liahona, Mē 2016, 96].)

Ke tokoni ke ʻiloʻi ʻe he kau akó ha ngaahi tefitoʻi moʻoni lahi ange ʻo e tuʻunga fakaetamaí mei he ngaahi sīpinga ʻa e Tamai Hēvaní mo Sīsū Kalaisí, fokotuʻutuʻu e kau akó ki ha fanga kiʻi kulupu iiki pea vahe ha taki ki he kulupu takitaha. Fakaafeʻi e kau akó ke nau talanoa fekauʻaki mo ʻenau ngāue ʻi he ʻekitivitī “Lekooti Hoʻo Ngaahi Fakakaukaú” ʻi he konga 1 ʻo e naunau teuteú, ko e konga ʻo ʻenau fealēleaʻakí.

Hili ha taimi feʻunga, fakaafeʻi ha kau ako ʻe niʻihi ke nau vahevahe mo e kalasí e ngaahi tefitoʻi moʻoni naʻa nau aleaʻi ʻi heʻenau kulupú. ʻE lava ke ke fakaafeʻi ha tokotaha ako faitaipe pea lisi e ngaahi tefitoʻi moʻoni ko ʻení ʻi he palakipoé.

ʻOku ʻi ai ha fatongia toputapu ʻo e ngaahi tamaí ke maluʻi honau ngaahi fāmilí.

Fakaafeʻi e kau akó ke nau ngāue ʻi he fanga kiʻi kulupu iiki tatau, ki he ʻekitivitī ko ʻení. ʻOange ki he vaheua ʻe taha ʻo e kau taki ʻo e kulupú ha tatau ʻo e “Laʻipepa Tufa Fakakulupu A” pea ko e vaheua ʻe tahá ko ha tatau ʻo e “Laʻipepa Tufa Fakakulupu E.” Fakaafeʻi e kau akó ke nau muimui ki he ngaahi fakahinohino ʻi he laʻipepa tufá.

Laʻipepa Tufa Fakakulupu A—Ko e Ivi Maluʻi ʻo ha Tamai ʻOfa mo Feohi Kakato

Ko e Fāmili Taʻengatá - Naunau ʻa e Faiakó—Lēsoni 20

Fakaafeʻi ha mēmipa ʻo e kulupú ke ne lau leʻo lahi ʻa e fakamatala ʻa Palesiteni M. Lāsolo Pālati ʻi he konga 2 ʻo e naunau teuteú. Fehuʻi ange leva ki hoʻo kulupú:

• Ko e hā ha ngaahi founga ʻe lava ke fakahoko ai ʻe ha tamai hono fatongia toputapu ke maluʻi hono fāmilí?

Vahevahe mo hoʻo kulupú ʻa e fakamatala ko ʻeni ʻa ʻEletā D. Toti Kulisitofasoní: “Ko e tuʻunga fakaetamaí ʻoku makehe pea ʻikai lava ke tongia” (“Ngaahi Tamai,” Liahona, Mē 2016, 93). Fehuʻi ange leva ki hoʻo kulupú:

• Ko e hā ha ngaahi founga ʻoku “makehe pea ʻikai lava ke tongia” ai ʻa e ngaahi tamaí? (Te ke lava ʻo fokotuʻu ange ke vakaiʻi ʻe hoʻo kulupú ʻa e ngaahi akonaki ʻi he konga 2 ʻo e naunau teuteú lolotonga ʻenau aleaʻi e fehuʻi ko ʻení.)

• Ko e hā ha ngaahi founga kuo tāpuekina mo maluʻi ai koe ʻe he ʻofa mo e feohi ʻa ha tamai angatonu pe tangata ʻoku ngāue fakaetamai kiate koe, ʻi hoʻo moʻuí?

© 2022 ʻe he Intellectual Reserve, Inc. All rights reserved.

Laʻipepa Tufa Fakakulupu A—Ko e Ivi Maluʻi ʻo ha Tamai ʻOfa mo Feohi Kakato

laʻipepa tufa A ʻa e faiakó

Laʻipepa Tufa Fakakulupu E—Ko Hono Maluʻi ʻo e Ngaahi Fāmilí ʻo makatuʻunga ʻi he Fakahā Fakaʻotuá mo e Mālohi ʻo e Lakanga Fakataulaʻeikí.

Ko e Fāmili Taʻengatá - Naunau ʻa e Faiakó—Lēsoni 20

Toe vakaiʻi fakataha ʻa e Mātiu 2:13–15, ʻo kumi ki he founga ne maluʻi ʻaki ʻe Siosefa ʻa Mele mo Sīsuú.

• Ko e hā te tau lava ʻo ako mei he talanoa ko ʻení fekauʻaki mo e feituʻu ʻe lava ke maʻu ai ʻe he ngaahi tamaí ha tokoni ke tataki mo maluʻi honau ngaahi fāmilí? ʻOku tokoniʻi fēfē nai ʻe he fakahaá ʻa e ngaahi tamai ʻi hotau kuongá?

Fakaafeʻi ha mēmipa ʻo e kulupú ke lau leʻo lahi ʻa e fakamatala ʻa Palesiteni Poiti K. Peeka mo Palesiteni Lāsolo M. Nalesoni ʻi he konga 3 ʻo e naunau teuteú. Fehuʻi ange leva ki hoʻo kulupú:

• Ko e hā ha meʻa ne mahuʻinga kiate koe ʻi he ongo fakamatalá ni, pea ko e hā hono ʻuhingá?

• Ko e hā ha ngaahi founga kuo maluʻi ai koe ʻe he fakahā fakalangi pe mālohi ʻo e lakanga fakataulaʻeiki ʻa ha tamai pe tokotaha ngāue fakaetamai angatonu ʻi hoʻo moʻuí?

© 2022 ʻe he Intellectual Reserve, Inc. All rights reserved.

Laʻipepa Tufa Fakakulupu E—Ko Hono Maluʻi ʻo e Ngaahi Fāmilí ʻo makatuʻunga ʻi he Fakahā Fakaʻotuá mo e Mālohi ʻo e Lakanga Fakataulaʻeikí.

laʻipepa tufa A ʻa e faiakó

Hili ha taimi feʻunga, fakaafeʻi ha tokotaha ako naʻe ako ʻe heʻene kulupú ʻa e “Laʻipepa Tufa Fakakulupu A” mo e tokotaha ako ʻe taha naʻe ako ʻe heʻenau kulupú ʻa e “Laʻipepa Tufa ʻo e Kulupú E” ke vahevahe mo e kalasí e meʻa ne nau ako mei heʻenau fealēleaʻakí. Fakakaukau ke vahevahe ha sīpinga ʻo e founga kuo tāpuekina mo maluʻi ai koe ʻe he ʻofá, feohí, fakahā fakalangí, pe mālohi ʻo e lakanga fakataulaʻeiki ʻa ha tamai pe tokotaha ngāue fakaetamai angatonu ʻi hoʻo moʻuí, ke tānaki atu ki he ako ʻa e kau akó. (Pe, te ke lava ʻo vahevahe ha sīpinga mei he moʻui ʻa ʻEletā Keuli E. Sitīvenisoni o e Kōlomu ʻo e Kau ʻAposetolo ʻe Toko Hongofulu Mā Uá. Naʻe maʻu ʻe he tamai ʻa ʻEletā Sitīvenisoní ha fakatokanga mei he Laumālié, naʻá ne maluʻi ʻa ʻEletā Sitīvenisoni mei ha ngata ʻi heʻene kei siʻí [vakai Robert D. Hales, “ʻEletā Gary E. Stevenson: Ko ha Loto Mahino,” Ensign, Sune 2016, 26].)

Mahalo te ke fie fakamatalaʻi ange, ʻi he hoko ko e ongo hoa ngāue tuʻunga tatau ʻi he nofo-malí, ʻoku ʻinasi ai ʻa e uaifí mo e faʻeé ʻi he fatongia ke maluʻi hona fāmilí. ʻOku totonu ke ngāue mo fealēleaʻaki fakataha ʻa e husepānití mo e uaifí, ʻi heʻena fakahoko ʻa e fatongia toputapu ko ʻení.

ʻOange ha taimi ki he kau akó ke nau fakalaulauloto ai ki he ngaahi fehuʻi ko ʻení pea lekooti ha faʻahinga ongo ʻoku nau maʻu (mahalo te ke fie fakaʻasi ʻa e ngaahi fehuʻí):

• Ko e hā te ke lava ʻo fai he taimí ni ke ʻofa mo maluʻi lelei ange ai ho fāmilí mo e niʻihi kehé?

• Te ke poupouʻi fēfē ʻa e houʻeiki tangata ʻi hoʻo moʻuí ke nau hoko ko ha maluʻi moʻui taau ʻo honau ngaahi fāmilí mo e niʻihi kehé?

• ʻE tokoniʻi fēfē koe ʻe he Eikí ʻi he ngaahi feinga ko ʻení?

Ke fakaʻosi ʻaki ʻa e lēsoní, ʻe lava ke ke fakahoko pe ko ha tokotaha ako, ha fakamoʻoni ki hono mahuʻinga ʻo e ngaahi tamaí mo e fie maʻu ke nau muimui ʻi he ngaahi sīpinga ʻa e Tamai Hēvaní mo Sīsū Kalaisi, ʻi hono fakahoko honau ngaahi fatongia toputapu ʻi he fāmilí.

Ki he Kalasi Hokó

Fakakaukau ke poupouʻi ʻa e kau akó ke nau fakakaukau ki heʻenau fānau lolotongá pe fānau ʻi he kahaʻú, ʻi heʻenau ako ʻa e naunau teuteu ki he kalasi hokó. Te ke lava foki ʻo kole ki he kau akó ke nau manatuʻi ha ngaahi taimi ʻi heʻenau kei siʻí, naʻa nau ongoʻi ai naʻe ʻofaʻi, fie maʻu ke mapuleʻi, pe ako ke tokoniʻi e niʻihi kehé.