Lēsoni 15 Naunau ʻa e Faiakó

Ko e Fekau ke Fanafanau mo Fakatokolahi ʻa e Māmaní

Kuo fakahā ʻe he kau palōfitá ʻoku kei tuʻu maʻu pē he ʻahó ni ʻa e fekau ko ia ʻa e Tamai Hēvaní ke fakatokolahi mo fakakakai ʻa e māmaní. ʻI he lēsoni ko ʻení, ʻe aleaʻi ʻe he kau akó ʻa e mahuʻinga mo e fakafiefia ʻo e maʻu ha fānaú. Te nau toe aleaʻi foki mo e founga ke fai ai ha ngaahi fili ʻoku makatuʻunga ʻi he tuí fekauʻaki mo e taimi ke maʻu ai ha fānaú pea mo e tokolahi ʻo e fānau ke maʻú. ʻE maʻu ʻe he kau akó ʻa e faingamālie ke vakaiʻi ʻenau tui ki he ʻOtuá pea mo ʻenau fenāpasi mo Hono finangaló fekauʻaki mo e fekau ko ʻení.

Fakatokangaʻi ange: Fakakaukau ke fakaafeʻi e kau akó ke nau fakahū mai haʻanau ngaahi fehuʻi fekauʻaki mo e tefito ʻo e lēsoni ko ʻení ʻi he text, ʻīmeili, savea ʻi he ʻinitanetí, pe ko ha founga kehe, kimuʻa ʻi he kalasí. Fakaʻaongaʻi e ngaahi fehuʻi ʻa e kau akó mo e fakahinohino ʻa e Laumālié ke fakapapauʻi e meʻa ke tokanga taha ki ai ʻi he lēsoni ko ʻení. Fakakaukau ki ha ngaahi founga te ke lava ʻo ʻomi ai e ngaahi fehuʻi ʻa e kau akó ki heʻenau aʻusia fakaakó. Hangē ko ʻení, mahalo te ke lava ʻo fetongi ha niʻihi ʻo e ngaahi fehuʻi ʻoku fakaʻaongaʻi ʻi he fealeaʻaki fakakulupú (vakai ki he laʻipepa tufa ʻi laló) ʻaki ha ngaahi fehuʻi tatau naʻe ʻomi ʻe hoʻo kau akó.

Ngaahi Fokotuʻu ki Hono Akoʻí

ʻOku kei tuʻu maʻu pē he ʻahó ni ʻa e fekau ko ia ke fakatokolahi mo fakakakai ʻa e māmaní.

Fakakaukau ke fakaʻaliʻali ha fakatātā ʻo ha pēpē valevale. Kole ki he kau akó ke nau lea ʻaki ha foʻi lea ʻe taha ʻe ala fakaʻaongaʻi ʻe ha taha ke fakamatalaʻi ʻaki ʻa e ongo ʻoku maʻu ʻe he kakaí ki he fanga kiʻi pēpeé, pea hiki ʻi he palakipoé ʻa e ngaahi lea ʻoku talaatu ʻe he kau akó. (Pe, ko ha tukupā ke tānaki atu, fakakaukau ke fakaafeʻi e kau akó ke nau tohi e ngaahi lea fakamatalá ki he lahi taha te nau lava ʻi ha sekoni ʻe 30 pea kole ki ha kau ako ʻe niʻihi ke vahevahe ʻenau ngaahi lisí mo e kalasí.) Fakaafeʻi ha niʻihi ʻo e kau akó ke vahevahe ʻa e ngaahi fakakaukau ki he ngaahi lea ʻoku nau lave ki aí.

• Ko e hā ha ngaahi meʻa ʻoku fakamuʻomuʻa ʻe ha ngaahi hoa mali ʻe niʻihi ʻi he maʻu fānaú? (ʻO ka fie maʻu, fakakaukau ke fakaafeʻi ha tokotaha ako ke ne lau leʻo lahi ʻa e fuofua fakamatala ʻa ʻEletā Niila L. ʻEnitaseni ʻi he konga ʻuluaki ʻo e naunau teuteú.)

Lau fakataha ʻa e Sēnesi 1:27–28 pea fakaafeʻi ʻa e kau akó ke nau fakakaukau ke fakaʻilongaʻi ʻa e fuofua fekau naʻe ʻoange ʻe he Tamai Hēvaní kia ʻĀtama mo ʻIví. Lau fakataha leva ʻa e palakalafi hono fā ʻo e “Ko e Fāmilí: Ko ha Fanongonongo ki Māmani” (ChurchofJesusChrist.org), pea fakamahinoʻi ʻa e kaunga e ʻuluaki fekau ko ʻení kiate kitautolu he kuongá ni.

• Te ke fakamatalaʻi fēfē ʻa e ngaahi taumuʻa ʻoku fakahoko ʻi he palani ʻa e Tamai Hēvaní, ʻe hono maʻu ʻe he ngaahi husepānití mo e ngaahi uaifí ha fānaú? (ʻO ka fie maʻu, fakaafeʻi ʻa e kau akó ke nau toe vakaiʻi ʻa e fakamatala hono ua ʻa ʻEletā ʻEnitasení pea mo e fakamatala ʻa Palesiteni M. Lāsolo Pālati ʻi he konga 1 ʻo e naunau teuteú. Fakamamafaʻi ʻa e moʻoni ko ʻení, ko ha konga ʻo e fealeaʻakí: ʻI he taimi ʻoku ʻomi ai ʻe ha husepāniti mo ha uaifi ha fānau ki he māmaní, ʻokú na fakahoko ʻa e konga ʻo e palani ʻo e fiefia ʻa e Tamai Hēvaní.)

Te ke lava ʻo fakamanatu ki he kau akó ʻa e fealeaʻaki ne fakaafeʻi ke nau fakahoko mo ha tokotaha ʻoku ʻi ai haʻane fānaú (vakai konga 1 ʻo e naunau teuteú). Kole ki ha kau ako ʻe niʻihi ke vahevahe e meʻa ne nau akó. (Mahalo te ke fie fetuʻutaki ki ha toko taha pe toko ua ʻo e kau akó ʻi ha ngaahi ʻaho siʻi kimuʻa he kalasí ke fakaafeʻi kinautolu ke nau haʻu mateuteu ke vahevahe ʻenau ngaahi fakakaukaú ki he kalasí.)

Vahevahe ʻa e kau akó ki ha ngaahi kulupu iiki, pea fili ha taki ki he kulupu takitaha. ʻOange ki he kulupu takitaha ha tatau ʻo e laʻipepa tufa ko ʻení, pea fakaafeʻi e kau akó ke nau muimui ki he ngaahi fakahinohino ʻi he laʻipepa tufá.

Ko Hono Fai ha Ngaahi Fili ʻOku Makatuʻunga ʻi he Tuí fekauʻaki mo e Maʻu Fānaú

Ko e Fāmili Taʻengatá – Naunau ʻa e Faiakó—Lēsoni 15

Lau ʻa e ngaahi hohaʻa ko ʻeni kuo fakahaaʻi ʻe ha kakai lalahi kei talavou ʻ e niʻihi:

1. ʻI heʻeku feitama fakaʻosí, ne u aʻusia ha ngaahi palopalema fakafaitoʻo ʻa ia ʻe lava ke toe hoko pē ʻo kapau te u toe feitama. Ko ia ne u fakakaukau mo hoku husepānití ke taʻofi haʻama toe fanau. ʻOku ou ongoʻi halaia koeʻuhí ʻoku toko ua pē ʻema fānaú ka ʻoku maʻu ʻe hoku ngaahi tokouá mo e tuofāfiné kotoa ha fāmili tokolahi ange.

2. ʻOku ou palani mo hoku uaifí ke ma fanau, ka ʻokú ma fie folau mo maʻu ha ngaahi aʻusia kehe kimuʻa peá ma toki fakahoko iá. ʻOku lelei pē nai ke ma tatali?

3. ʻOku ou loto mo hoku husepānití ke ma kamata maʻu ha fānau. ʻOku ʻikai pē ke ma ʻilo pe ʻokú ma mateuteu. ʻOku ʻikai ke ma ongoʻi faingamālie fakapaʻanga he taimí ni. Ko e hā e founga te ma ʻiloʻi ai ʻa e taimi totonú?

Fili ha taha ʻo e ngaahi hohaʻa ko ʻení ke tokanga taha ki ai ʻa e kulupú, pea aleaʻi ʻa e ngaahi fehuʻi ko ʻení:

• Ko e hā ha ngaahi founga ʻoku moʻoni ai ʻa e hohaʻa ko ʻení?

• Te ke ngāue ʻaki fēfē nai ʻa e meʻa kuó ke ako mei he konga 2 ʻo e naunau teuteú ke tokoniʻi ha taha ʻokú ne maʻu e hohaʻá ni?

• Ko e hā ha ngaahi talanoa kehe mei he folofolá pe ngaahi akonaki mei he kau taki ʻo e Siasí ʻe lava ʻo tokoni ki ha taha ʻoku hohaʻa ki he meʻá ni ʻi heʻene feinga ke laka ki muʻa ʻi he tui ki he ʻOtuá?

© 2022 ʻe he Intellectual Reserve, Inc. All rights reserved.

Ko Hono Fai ha Ngaahi Fili ʻOku Makatuʻunga ʻi he Tuí ki hono Maʻu ha Fānaú

laʻipepa tufa ʻa e faiakó

Hili ha taimi feʻunga, fakaafeʻi ha toko taha pe toko ua ʻi he kau akó ke vahevahe ʻa e meʻa ne nau ako ʻi he fealeaʻaki ʻenau kulupú. Kapau he ʻikai tala atu ʻe he kau akó, fakamanatu kiate kinautolu ʻa e faleʻi naʻe ʻomai ʻi he ʻAlamā 37:37, pea fakaʻaliʻali ange ʻa e tefitoʻi moʻoni ko ʻení: ʻI he fealeaʻaki e ngaahi husepānití mo e ngaahi uaifí mo e ʻEikí pea ngāue ʻi he tui kiate Ia, te Ne tataki kinaua ʻi heʻena fili ke maʻu ha fānaú.

Fakakaukau ke fakaafeʻi e kau akó ke nau fai ha ngaahi fehuʻi ʻoku nau maʻu fekauʻaki mo e fekau ke maʻu ha fānaú. (Mahalo naʻá ke ʻosi tānaki ha niʻihi ʻo e ngaahi fehuʻi ʻa e kau akó kimuʻa he kalasí ʻa ia te ke lava ʻo fakaʻilongaʻi mo aleaʻi ai heni.) Te ke lava foki ʻo fili ha taha ʻo e ngaahi fehuʻi ko ʻení ʻa ia ʻokú ke ongoʻi ʻe tokoni ki hoʻo kau akó ke fakaloloto ʻenau mahino ki he tefito ko ʻení pea aleaʻi fakakalasi kinautolu:

• Ko e hā ʻoku mahuʻinga ai ki he husepānití mo e uaifí ke fealeaʻaki mo e Tamai Hēvaní fekauʻaki mo e taimi ke maʻu ai ha fānaú mo e tokolahi ʻo e fānaú?

• Ko e hā ha ngaahi founga kuó ke mamata ai ki ha kakai ʻokú ke ʻiloʻi ʻoku nau laka atu ki muʻa ʻi he tui, ʻi he taimi ne nau ʻiloʻi ai he ʻikai ke nau lava ʻo maʻu ha fānaú (pe maʻu ha fānau tokolahi fakatatau ki heʻenau fie maʻú)?

• Ko e hā ʻoku mahuʻinga ai ke ʻoua naʻa tau fakamāuʻi ʻa e niʻihi kehé ʻi heʻenau ngaahi fili fekauʻaki mo e taimi ke maʻu ai ha fānaú pea mo e tokolahi ʻo e fānaú?

Te ke lava ʻo fakaʻaliʻali e ngaahi fehuʻi ko ʻení pea ʻoange ha taimi ki he kau akó ke lekooti ai ʻenau ngaahi fakakaukau fekauʻaki mo haʻanau fili ʻe taha pe ua:

• Ko e hā ʻeku ngaahi tui mo e ongo fakataautaha fekauʻaki mo hono maʻu ʻo ha fānaú?

• Ko e hā ha ngaahi liliu, kapau ʻoku ʻi ai, ʻe fie maʻu ke u fai ke fakafenāpasi kakato ange ai hoku lotó mo e fakakaukau ʻa e ʻEikí fekauʻaki mo e maʻu ha fānaú?

• Te u maluʻi fēfē ʻa e mahuʻinga ke maʻu ha fānaú?

• Te u fakatupulaki fēfē ʻeku falala ʻe poupouʻi au mo hoku malí ʻe he ʻEikí ʻi hono fakahoko e fekau ke maʻu ha fānau ʻo fakatatau ki Hono finangaló?

Fakakaukau ke fakaafeʻi ha kau ako ʻe niʻihi ʻoku nau fiemālie ke vahevahe ʻa e meʻa ne nau hikí.

Kuo fakapapauʻi mai ʻe he ʻEikí ʻa e toputapu ʻo e moʻuí.

Fakaafeʻi ha tokotaha ako ke lau leʻo lahi ʻa e fakamatala mei he fanongonongo ʻo e fāmilí ʻi he kamataʻanga ʻo e konga 3 ʻo e naunau teuteú.

• Ko e hā ʻoku akoʻi mai ʻe he fakamatala ko ʻení fekauʻaki mo ʻetau Tamai Hēvaní mo e meʻa ʻokú Ne finangalo maʻa ʻEne fānaú? (Te ke lava ʻo poupouʻi e kau akó ke nau fakakaukau ki he founga ʻoku kaunga ai ʻenau holi ki heʻenau fānaú, ʻi hono ʻilo e ngaahi moʻoni ko ʻení.)

Fakamanatu ki he kau akó ʻoku fakafepakiʻi ʻe he fanongonongo ko ʻeni mei he fanongonongo ki he fāmilí, ha niʻihi ʻo e ngaahi founga ʻoku tali lahi he kuongá ni, hangē ko e fakatōtamá.

• Te ke fakaʻaongaʻi fēfē ʻa e meʻa ʻokú ke ʻilo fekauʻaki mo e palani ʻa e ʻOtuá ke fakamatalaʻi e ʻuhinga ʻoku fehangahangai ai ʻa e “fili ke fakatōtama koeʻuhí ko ha faingamālie fakataautaha pe fakasōsialé”, ki he finangalo ʻo e ʻOtuá? (Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 38.6.1, ChurchofJesusChrist.org).

Fakaafeʻi e kau akó ke nau fakakaukau ki he meʻa te nau lava ʻo fai ke poupouʻi mo maluʻi ai e toputapu ʻo e moʻui ʻa e tangatá.

Mahalo te ke loto ke fakaʻosi ʻaki hono vahevahe hoʻo fakamoʻoni ki he ngaahi moʻoni naʻe maʻu ʻe he kau akó ʻi he lēsoni ko ʻení.

Ki he Kalasi Hokó

Kole ki he kau akó ke nau fakalaulauloto ki he fehuʻi ko ʻení: Ko e hā ha ngaahi akonaki ʻa Sīsū Kalaisi kuó ne ʻomi ai ʻa e fiefia lahi tahá ki hoʻo moʻuí?

Poupouʻi e kau akó ke nau ako ʻa e naunau teuteu ki he kalasi hokó ʻaki ʻa e fehuʻi ko ʻení.