Lēsoni 9 Naunau ʻa e Faiakó

Ko Hono Fakatahaʻi ʻo e Ngaahi Fāmilí ke Taʻengatá

ʻI hono maʻu e ngaahi ouau ʻo e temipalé maʻatautolu mo hotau ngaahi kui kuo pekiá, ʻoku fakamālohia mo tokoniʻi ai kitautolu ke tau faʻu hotau fāmili taʻengatá. ʻOku mahuʻinga foki e hisitōlia fakafāmilí mo e ngāue fakatemipalé ʻi he tokoni ki heʻetau Tamai Hēvaní ke fakatahaʻi Hono fāmilí. ʻE malava ʻa e kau akó ʻo fakamatalaʻi ha niʻihi ʻo e ngaahi tāpuaki te tau lava ʻo maʻu ʻo fakafou ʻi he ngāue fakatemipalé mo e hisitōlia fakafāmilí, ko ha ola ʻo e lēsoni ko ʻení. ʻE fakaafeʻi foki e kau akó ke nau fakapapauʻi e ngaahi founga te nau lava ai ʻo kamata pe hokohoko atu ʻenau feinga ke ʻiloʻi ʻenau ngaahi kui kuo pekiá pea fakahoko e ngaahi ouaú maʻanautolu ʻi he temipalé.

Ngaahi Fokotuʻu ki Hono Akoʻí

ʻOku finangalo ʻa e Tamai Hēvaní ke foaki ʻa e mālohí mo e iví ki Heʻene fānaú.

Fakakaukau ke kamata e lēsoní ʻaki hono fakaʻaliʻali e fehuʻi ko ʻení pea fakaafeʻi e kau akó ke hiki ʻenau ngaahi talí ʻi he palakipoé:

ʻI hoʻomou hoko ko e kakai lalahi kei talavou ʻi he māmaní he ʻaho ní, ko e hā ha mālohi fakalaumālie pe ngaahi tāpuaki ʻoku tautautefito homou fie maʻú pea ko e hā hono ʻuhingá?

Fakaafeʻi ha tokotaha ako ke ne lau leʻolahi e palakalafi hono tolu ʻo e fanongonongo ki he fāmilí (vakai, “Ko e Fāmilí: Ko ha Fanongonongo ki Māmani,” ChurchofJesusChrist.org). Kole ki he kau akó ke fakamatalaʻi e meʻa ʻoku nau ʻilo fekauʻaki mo e fatongia ʻo e ngaahi fuakavá mo e ngaahi ouaú ʻi he palani ʻa e ʻOtuá.

ʻOange ki he kau akó ha taimi feʻunga ke vakaiʻi fakalelei ai e fakamatala ʻa Palesiteni Lāsolo M. Nalesoni ‘i he konga 1 ʻo e naunau teuteú. Fakaafeʻi kinautolu ke vahevahe e meʻa ne nau ako meia Palesiteni Nalesoni fekauʻaki mo e ngaahi ouau mo e ngaahi fuakava ʻo e lakanga fakataulaʻeikí. ʻI he vahevahe ʻa e kau akó, tokoni ke nau ʻiloʻi ʻa e ngaahi moʻoni hangē ko ʻení: ʻE lava ʻo fakamālohia ʻetau nofo-malí mo e fāmilí ʻi hono maʻu e ngaahi ouaú mo e ngaahi fuakavá. ʻI heʻetau maʻu mo tauhi pau e ngaahi ouau mo e ngaahi fuakava ʻo e lakanga fakataulaʻeikí, ʻoku tāpuekina kitautolu ʻe he ʻOtuá ʻaki Hono mālohí (vakai foki, Tokāteline mo e Ngaahi Fuakava 109:22).

• Ko e hā ha ngaahi founga kuo fakamālohia pe fakaivia ai koe mo ho fāmilí ʻe he ngaahi ouau mo e ngaahi fuakava ʻo e lakanga fakataulaʻeikí? (Naʻe fakaafeʻi e kau akó ke nau fakalaulauloto ki he fehuʻi ko ʻení ʻi he naunau teuteú.)

Mahalo te ke fie fakamoʻoni ki ha taha pe lahi ange ʻi he ngaahi tāpuakí ni ʻi hoʻo moʻuí mo e fāmilí. Poupouʻi e kau akó ke nau ngāue ki hono maʻu ʻo e ngaahi ouau fakatemipalé kapau ʻoku teʻeki ai ke nau maʻu kinautolu pea ke tauhi e ngaahi fuakava kuo nau fakahokó.

ʻOku finangalo ʻetau Tamai Hēvaní ke maʻu ʻa e fakamoʻuí ʻe Hono fāmilí kotoa.

Fakakaukau ke vahevahe ʻa e kau akó ki ha fanga kiʻi kulupu iiki ke fakahoko ʻa e ʻekitivitī ko ʻení. ʻOange ki he kulupu takitaha ha tatau ʻo e laʻipepa tufa ko ʻení. (Pe te ke lava ʻo teuteuʻi ha meʻa tatau mo iá kapau ʻokú ke fie liliu ʻa e tūkungá ke felāveʻi ange mo e ngaahi tūkunga hoʻo kau akó.) Fakaafeʻi e ngaahi kulupú ke nau muimui ki he ngaahi fakahinohino ʻi he laʻipepa tufá.

Ko e Tokāteline ʻo e Huhuʻi ʻo e Kau Pekiá

Ko e Fāmili Taʻengatá - Naunau ʻa e Faiakó—Lēsoni 9

Lau fakakulupu ʻa e tūkunga ko ʻení, pea aleaʻi ʻa e ngaahi fehuʻi ʻoku ʻoatu fakataha mo iá.

Naʻe toki ʻalu ha kaungāmeʻa ʻokú ne kau ki ha tui fakalotu kehe ki ha ʻoupeni hausi ʻa e temipalé. Naʻá ne fanongo ai ki he talanoa ʻa e kakaí ki hono fakahoko e ngaahi ouau maʻa ʻetau ngaahi kui kuo pekiá. Hili ha ngaahi ʻaho siʻi mei ai, ʻokú ne fehuʻi atu, “Ko e hā ʻoku fakahoko ai ʻe homou siasí ʻa e ngaahi ouau maʻá e kau pekiá?”

• Te ke tali fēfē ʻa e fehuʻi ho kaungāmeʻá? (Hili hoʻomou aleaʻi e fehuʻi ko ʻení, ʻe lava ke toe vakaiʻi ʻe hoʻomou kulupú ʻa e fakamatala ʻa Palesiteni Siosefa F. Sāmita ʻi he konga 1 ʻo e naunau teuteú. Te mou lava foki ʻo toe vakaiʻi fakataha ʻa e 1 Kolinitō 15:29.)

• Ko e hā ʻe lava ke akoʻi mai ʻe he tokāteline ʻo e huhuʻi ʻo e kau pekiá fekauʻaki mo e ʻulungaanga, finangalo, mo e malava ʻa e Tamai Hēvaní mo Sīsū Kalaisí ʻo tokoni ki he tokotaha kotoa pē?

© 2022 ʻe he Intellectual Reserve, Inc. All rights reserved.

Ko e Tokāteline ʻo e Huhuʻi ʻo e Kau Pekiá

laʻipepa tufa ʻa e faiakó

Hili ha taimi feʻunga, fakaafeʻi ha toko taha pe toko ua ʻi he kau akó ke vahevahe ʻa e meʻa ne nau ako ʻi he fealeaʻaki ʻenau kulupú.

Toe vakaiʻi fakataha ʻa e Tokāteline mo e Ngaahi Fuakava 128:15, pea aleaʻi ʻa e ngaahi fehuʻi ko ʻení:

• Fakatatau ki he veesi ko ʻení, ko e hā ʻoku mahuʻinga ai ke tau maʻu ʻa e ngaahi ouau ʻo e temipalé maʻa ʻetau ngaahi kui kuo pekiá? (ʻI hono fakaʻaongaʻi e ngaahi lea ʻa e kau akó, hiki ʻi he palakipoé ha moʻoni hangē ko ʻení: ʻOku fie maʻu mo mahuʻinga ʻa e fakamoʻui ʻo ʻetau ngaahi kui kuo pekiá ki hotau fakamoʻuí mo e haohaoá.)

• ʻOkú ke pehē ko e hā ʻoku mahuʻinga ai e fakamoʻui hotau ngaahi kuí ki hotau fakamoʻuí mo e haohaoá?

• ʻOku founga fēfē ʻetau hoko ʻo tatau ange mo e Fakamoʻuí ʻi heʻetau ʻiloʻi ʻetau ngaahi kui kuo pekiá mo maʻu e ngaahi ouaú maʻanautolu ʻi he temipalé? (Mahalo te ke fie fakaafeʻi e kau akó ke toe vakaiʻi ʻa e fakamatala ʻa Palesiteni Kōtoni B. Hingikelī ʻi he konga 2 ʻo e naunau teuteú.)

Fakaafeʻi e kau akó ke nau fakakaukau ki he ongo ʻoku nau maʻu ki he Fakamoʻuí ʻi Heʻene feinga ke fakahoko e meʻa ʻoku ʻikai ke nau lava ʻo fai maʻanautolú. Fakaafeʻi leva kinautolu ke fakakaukau ki he ongo ʻoku maʻu ʻe heʻetau ngaahi kui kuo pekiá ʻi heʻetau maʻu maʻanautolu ʻa e ngaahi ouau fakamoʻuí ʻa ia ʻoku ʻikai ke nau lava ʻo maʻu maʻanautolú.

ʻOku tāpuekina ʻe he ʻEikí ʻa kinautolu ʻoku nau fakahoko e ngāue fakatemipalé mo e hisitōlia fakafāmilí.

Ko Hono Fakatupulaki ʻEtau Founga Akoʻí mo e Akó

Fai ha ngaahi fakaafe ʻoku poupouʻi ai ʻa hono fakahokó. ʻOku fakaloloto ʻe he kau akó ʻenau ako e ongoongoleleí ʻi heʻenau fakaʻaongaʻi e ngaahi tefitoʻi moʻoni moʻoní mo e ngaahi moʻoni fakatokāteliné. ʻOku tokoni ʻa e ngāue ʻi he tuí ke nau ului ai ki he Fakamoʻuí pea maʻu ʻa e ngaahi tāpuaki ʻokú Ne talaʻofa kiate kinautolu ʻoku talangofuá. ʻI hoʻo teuteu ke tokoniʻi e kau ako ʻi he kalasí, fakamuʻomuʻa e ngaahi fehuʻi mo e ngaahi ʻekitivitī ʻoku poupouʻi ai ʻa hono fakahokó.

Fakakaukau ke fakaafeʻi e kau ako ʻoku nau lava ʻo fakaʻaongaʻi ʻenau meʻangāue fakaʻilekitulōniká ke vakai ki he FamilySearch.org pe ki he polokalama FamilySearch Family Tree. (Te ke lava foki ʻo fakaʻaliʻali ʻa e uepisaití pe ko e polokalamá ki he kalasí pe fokotuʻu ange ke vahevahe ʻe he kau ako ʻoku ʻikai ha meʻangāue fakaʻilekitulōniká mo ha kaungāako ʻoku ʻi ai haʻanau meʻa pehē.) Vakaiʻi fakataha ha niʻihi ʻo e ngaahi fōtunga ʻo e uepisaití pe polokalamá.   Fakakaukau pe ko e fē ʻi he ngaahi fehuʻi ko ʻení ʻe ʻaonga ke aleaʻí:

• Ko e hā hoʻo aʻusia ʻi hono fakahoko ʻo e hisitōlia fakafāmilí?

• Ko e hā ʻokú ne taʻofi pe kuó ne taʻofi koe ʻi he kuohilí mei hono fakahoko ʻo e hisitōlia fakafāmilí? Kuó ke ikunaʻi fēfē ʻa e faʻahinga fakafeʻātungia ko ʻení? ʻE tokoniʻi fēfē koe ʻe he Eikí ʻi hoʻo ngaahi feingá?

• Kapau kuó ke maʻu e ngaahi ouau ʻo e temipalé maʻa hoʻo ngaahi kuí, ko e hā ha ngaahi ongo naʻá ke maʻu he taimi ko iá?

  .

Fakakaukau ke kole ki he kau akó ke nau hiki ha niʻihi ʻo e ngaahi tāpuaki kuo talaʻofa ʻe he ʻEikí mo e kau taki ʻo Hono Siasí kiate kinautolu ʻoku kau ʻi he ngāue fakatemipalé mo e hisitōlia fakafāmilí.

Fakaafeʻi e kau akó ke nau fakakaukau ki he mālohi fakalaumālie pe ngaahi tāpuaki ʻoku tautautefito ʻenau fie maʻu ʻi he taimi ko ʻení (fakaafeʻi kinautolu ke toe vakaiʻi e lisi ʻi he palakipoé mei he kamataʻanga ʻo e lēsoní). Kole ki he kau akó ke vahevahe pe fakamoʻoni ki ha taimi kuo nau aʻusia ai e ngaahi tāpuaki ko ʻení ʻi heʻenau kau atu ki he ngāue fakatemipalé mo e hisitōlia fakafāmilí.

ʻOange ki he kau akó ha ngaahi miniti siʻi ke lekooti e founga te nau lava ai ʻo fakaʻaongaʻi e meʻa kuo nau ako ʻi he lēsoni ko ʻení. Poupouʻi kinautolu ke fokotuʻu ha taumuʻa ʻoku nau ongoʻi te nau lava ʻo fakahoko ke kau maʻu pē ʻi he ngāue fakatemipalé mo e hisitōlia fakafāmilí. Te nau lava foki ʻo lekooti e ngaahi tāpuaki ʻoku nau ʻamanaki ke maʻu mei hono fakahoko iá.

Fakatokangaʻi ange: Kumi ha ngaahi faingamālie ʻi hoʻo fakataha mo hoʻo kalasí ʻi he kahaʻú ke vakaiʻi pe ʻoku fēfē e ngaahi taumuʻa ʻa e kau akó ki he ngāue fakatemipalé mo e hisitōlia fakafāmilí.

Ki he Kalasi Hokó

ʻI he fakaʻosinga ʻo e kalasí pe lolotonga e uiké, te ke lava ʻo fakaafeʻi e kau akó ke nau ʻinitaviu ha ongo meʻa mali kuó na sila ʻi he temipalé. Fakaafeʻi e kau akó ke nau fehuʻi ki he ongo meʻa malí pe kuo fēfē ʻena nofo-malí ʻi heʻena fakahoko e ngaahi fuakava ʻi he taimi naʻe silaʻi ai kinauá pea mo e founga ʻokú na feinga fakataha ai ke toe ofi ange ki he ʻOtuá.