Lēsoni 24 Naunau ʻa e Faiakó: Fehangahangai mo e Faingataʻaʻia Fakaeʻatamaí ʻi he ʻAmanaki Lelei mo e Manavaʻofa
“Lēsoni 24 Naunau ʻa e Faiakó: Fehangahangai mo e Faingataʻaʻia Fakaeʻatamaí ʻi he ʻAmanaki Lelei mo e Manavaʻofa,” Ko e Fāmili Taʻengatá - Naunau ʻa e Faiakó (2022)
“Lēsoni 24 Naunau ʻa e Faiakó,” Ko e Fāmili Taʻengatá - Naunau ʻa e Faiakó
Lēsoni 24 Naunau ʻa e Faiakó
Fehangahangai mo e Faingataʻaʻia Fakaeʻatamaí ʻi he ʻAmanaki Lelei mo e Manavaʻofa
ʻE lava ke hoko ʻa e faingataʻaʻia fakaeʻatamaí ko ha konga mahuʻinga ʻo ʻetau aʻusia fakamatelié. ʻE maʻu ʻe he kau akó ʻi he lēsoni ko ʻení, ʻa e faingamālie ke ʻiloʻi e founga te nau lava ai ʻo fakalakalaka ʻi heʻenau moʻui lelei fakaʻatamaí mo fakaelotó. ʻE toe fakakaukauʻi foki ʻe he kau akó ʻa e founga te nau lava ʻo fakafeangai ʻaki ha manavaʻofa lahi ange ki he kau mēmipa ʻo e fāmilí mo e niʻihi kehe ʻoku nau foua e faingataʻaʻia fakaeʻatamaí pe ʻi ha ngaahi tūkunga fekauʻaki mo e taonakitá.
Ngaahi Fokotuʻu ki Hono Akoʻí
ʻOku tau tāpuekina kitautolu mo hotau fāmilí ʻi heʻetau feinga ke pukepuke mo fakalakalaka ʻetau moʻui lelei fakaeʻatamaí.
Fakaʻaliʻali e ngaahi fakamoʻoni fakafolofola ko ʻení: Siope 6:1–3; 1 Nīfai 18:17–18; ʻAlamā 26:26–27. Fakaafeʻi e kau akó ke nau lau fakalongolongo ha taha ʻo e ngaahi potufolofolá ni pea kumi e ngaahi pole ki he tuʻunga lelei fakaʻatamai pe fakaeloto ʻo e niʻihi fakafoʻituituí. Kole ki he kau akó ke nau vahevahe ʻa e meʻa ʻoku nau ʻiló. ʻI heʻenau vahevahé, mahalo te ke fie hiki ʻenau talí ʻi he palakipoé.
Ko e hā mo ha toe faʻahinga faingataʻa pe tūkunga kehe te ne lava ʻo uesia ʻetau tuʻunga lelei fakaʻatamaí pe fakaelotó? (Hiki e tali ʻa e kau akó ʻi he palakipoé.)
Ko e hā ʻe ala tokoni ai ke tau ʻiloʻi ʻe lava ke hoko ʻetau fehangahangai mo e ngaahi faingataʻaʻia fakaʻatamai mo fakaelotó ko ha konga angamaheni ʻo ʻetau aʻusia fakamatelié?
Fakamanatu ange ki he kau akó ko Sīsū Kalaisí “ko e tangata ʻo e ngaahi mamahi, pea maheni ai mo e loto-mamahí” (ʻĪsaia 53:3). Fakaafeʻi e kau akó ke vahevahe e ngaahi aʻusia ne maʻu ʻe he Fakamoʻuí ʻoku fakatātaaʻi ai hono fakahoko e kikite ʻa ʻĪsaiá.
Fakaʻaliʻali e ngaahi fakamoʻoni fakafolofola ko ʻení: Mātiu 14:22–23; Maʻake 1:35; 6:31, 46; Luke 5:16. Fakaafeʻi e kau akó ke nau lau fakalongolongo ha potufolofola ʻe taha pe lahi ange mei heni pea kumi e ngaahi lēsoni te tau lava ʻo ako mei he ngaahi ngāue ʻa e ʻEikí. Kole ange ke nau vahevahe e meʻa ʻoku nau maʻú, pea tokoni ke nau fakatokangaʻi ʻa e moʻoni ko ʻení: ʻOku tau muimui ki he sīpinga ʻa Sīsū Kalaisí ʻi heʻetau tuku ha taimi ke mālōlō, kiʻi fakalongolongo, pea lotú.
Ko e hā ʻoku mahuʻinga ai ke tokangaʻi lelei hoʻo moʻui lelei fakaʻatamaí mo fakaelotó? (Fakakaukau ke lau e fakamatala ʻa Palesiteni M. Lāsolo Pālati ʻi he konga 1 ʻo e naunau teuteú.)
ʻOange ki he kau akó ha ngaahi miniti siʻi ke nau fakakaukau mo lekooti ai ha founga ʻe taha te nau lava ai ʻo fakamālohia ʻenau moʻui lelei fakaʻatamaí mo fakaelotó pea faʻu ha palani faingofua ki hono fakahoko iá. Fakakaukau ke taki e kau akó ki he ngaahi fehuʻi ʻi he konga 1 ʻo e naunau teuteú ke maʻu ha ngaahi fakakaukau.
Te tau lava ʻo tali ʻaki e ʻofa faka-Kalaisí mo e manavaʻofa ki he niʻihi fakafoʻituitui ʻoku nau fokoutua ʻi he ngaahi faingataʻaʻia fakaeʻatamaí.
Fakaʻaliʻali pea lau ʻa e ngaahi fakamatala ko ʻeni ʻo ha niʻihi fakafoʻituitui kuo nau aʻusia e ngaahi faingataʻaʻia fakaeʻatamaí, ʻo hangē ko ia naʻe vahevahe ʻe Sisitā Leina I. ʻApetó. Pe kapau ʻokú ke saiʻia ange ke huluʻi e konga ʻuluaki ʻo e vitiō “Hangē ha Ipu Kuo Maumaú” (time code 0:00–3:16, ChurchofJesusChrist.org). Fakaafeʻi e kau akó ke nau fakakaukau ki he ongo ʻoku nau maʻú ʻi heʻenau fanongo ki he ngaahi fakamatalá ni.
ʻĪmisi
Sisitā Reyna I. Aburto
Naʻe tuʻo taha ha tohi mai hoku ʻofefiné: “Naʻe ʻi ai ha taimi … [ne u] fuʻu loto-mamahi ai, ʻi he taimi kotoa pē. Ne u faʻa fakakaukau maʻu pē ko e loto-mamahí ko ha meʻa ia ke te mā ai, pea ko ha fakaʻilonga ia ʻo hoto vaivaiʻangá. Ko ia ne u tukulotoʻi pē ʻeku lotomamahí. … Naʻá ku ongoʻi taʻemahuʻinga ʻaupito” [Hermana Elena Aburto blog, hermanaelenaaburto.blogspot.com/2015/08].
Naʻe fakamatalaʻi ia ʻe haku kaungāmeʻa ʻo pehē: “Talu mei heʻeku kei siʻí, kuó u fehangahangai maʻu pē mo e ngaahi ongo ʻo e siva e ʻamanakí, puputuʻú, ongoʻi tuenoá, ilifiá mo e ongoʻi kuó u taʻeʻaonga pe ʻikai mahuʻingá. Ne u fai e meʻa kotoa pē ke fakapuliki ʻeku mamahí pea ke ʻoua naʻá ku ʻoatu ha fakaʻilonga ʻoku hoko ha meʻa ka ko e tupulaki pē mo e mālohi” [fetohiʻaki fakataautaha]. (“[Lolotonga e Ngaahi Faingataʻá, ʻEiki Ta Feʻao Pē]!,” Liahona, Nōvema 2019, 57)
Ko e hā ha ngaahi fakakaukau mo e ngaahi ongo naʻá ke maʻu ʻi hoʻo fanongo ki he ngaahi fakamatalá ni?
ʻOange ki he tokotaha ako takitaha ha tatau ʻo e laʻipepa tufa ʻoku ʻoatú, pe fakaʻaliʻali e ngaahi fehuʻí ke sio ki ai e tokotaha kotoa. Fakaafeʻi e kau akó ke lau pea fakalaulauloto ki he ngaahi fehuʻí ʻiate kinautolu pē. Hili ha taimi feʻunga, fokotuʻutuʻu e kau akó ki ha fanga kiʻi kulupu iiki pea kole ki he kau akó ke vahevahe ʻenau ngaahi fakakaukau fekauʻaki mo ha fehuʻi ʻe taha pe ua naʻe kaunga kiate kinautolu.
Ngaahi Faingataʻaʻia Fakaeʻatamaí
Ko e Fāmili Taʻengatá - Naunau ʻa e Faiakó—Lēsoni 24
ʻE tāpuekina fēfē ʻa e niʻihi fakafoʻituitui ʻoku nau fokoutua ʻi he faingataʻaʻia fakaeʻatamaí ʻi hono ʻiloʻi pea talanoa ki ai mo kinautolú? Ko e hā nai ʻe mahuʻinga ai ki he niʻihi fakafoʻituituí ni ke nau kumi tokoni mei ha taki ʻo e Siasí pe ha tokotaha taukei fakafaitoʻo fakapalofesinale?
Kapau ʻoku vahevahe atu ʻe ha mēmipa ʻo e fāmilí pe kaungāmeʻa ʻokú ne foua ha faingataʻaʻia fakaeʻatamai, ko e hā e meʻa (pe ngaahi meʻa) mahuʻinga taha te ke lava ʻo lea ʻaki pe fakahokó? (Fakakaukau ke toe vakaiʻi e fakamatala ʻa Sisitā Leina I. ʻApeto ʻi he konga 2 ʻo e naunau teuteú.) Ko e hā ha ngaahi meʻa he ʻikai ʻaonga ke lea ʻaki pe fakahoko? Ko e fē ha taimi kuó ke mamata ai ki ha tali ʻa ha taha ʻi ha founga faka-Kalaisi ki ha faingataʻaʻia fakaeʻatamai ʻa ha taha kehe?
Fakakaukau ki he meʻa ʻoku mahino kia Sīsū Kalaisi fekauʻaki mo ʻetau ngaahi faingataʻaʻia fakaeʻatamaí. (Mahalo te ke fie lau ʻa e ʻAlamā 7:11–12.) Te ke fekumi fēfē ki Heʻene tokoní kapau ʻokú ke fokoutua ʻi ha faingataʻaʻia fakaeʻatamai pe ʻokú ke tokoniʻi ha taha pehē?
Hili ha taimi feʻunga, fakaafeʻi ha kau ako ʻe niʻihi ke vahevahe ʻa e meʻa ne nau ako ʻi heʻenau kulupú.
Te tau lava ʻo tokoni ke taʻofi ʻa e taonakitá mo tokoniʻi ʻa kinautolu kuo mole honau ʻofaʻangá ʻi he taonakitá.
Fakamanatu ange ki he kau akó ʻe lava ke tuʻu fakatuʻutāmaki e faingataʻaʻia fakaeʻatamai lalahí ki he taonakitá. Fakaafeʻi e kau akó ke toe vakaiʻi e Mōsaia 18:8–9 pea vahevahe e founga ʻe lava ai ʻe he ngaahi akonaki ʻi he potufolofolá ni ʻo tataki kitautolu ʻi hono tokoniʻi ʻa kinautolu ʻoku fefaʻuhi mo e ngaahi fakakaukau taonakitá. (ʻI he vahevahe ʻa e kau akó, mahalo te nau ʻiloʻi ha moʻoni tatau mo ʻení: ʻI heʻetau hoko ko e kau ākonga ʻo Sīsū Kalaisí, ʻoku uiuiʻi kitautolu ke fefuaʻaki ʻetau ngaahi kavengá pea tangi mo kinautolu ʻoku tangí.)
Ko e hā ha ngaahi founga kuó ke mamata ai ki he fakahoko e tefitoʻi moʻoni ko ʻení? Ko e hā ha ngaahi ngāue pau kehe te ke lava ʻo fai ʻi hoʻo hoko ko e ākonga ʻa Sīsū Kalaisí ke tokoni ke taʻofi e taonakitá?
ʻE tokoniʻi fēfē ʻe he Tamai Hēvaní mo Sīsū Kalaisi ʻa kinautolu ʻoku fefaʻuhi mo e ngaahi fakakaukau taonakitá? Te Na tokoniʻi fēfē ʻa e niʻihi fakafoʻituitui kuo mole ha taha ʻoku nau ʻofa ai ʻi he taonakitá?
ʻOange ki he kau akó ha ngaahi miniti siʻi ke lekooti e meʻa te nau lava ʻo fai ke tali ʻaki ʻi he ʻofa faka-Kalaisi mo e manavaʻofa ki ha faingataʻaʻia fakaeʻatamai ʻa ha taha kehe pe ʻi ha ngaahi tūkunga felāveʻi mo e taonakitá.
Ki he Kalasi Hokó
Fakakaukau ke fai ʻa e ngaahi fehuʻi ko ʻení ʻi he fakaʻosinga ʻo e kalasí pe ʻi ha pōpoaki he lolotonga ʻo e uiké. Fakaafeʻi e kau akó ke nau ako e naunau teuteu ki he kalasi hokó pea fakakaukau ki he ngaahi fehuʻi ko ʻení.
Ko e hā ha ngaahi founga ʻe lava ke kaunga ai hoʻo fakatomalá ki he tuʻunga lelei ho fāmilí?
Te ke maʻu fēfē ha tokoni ke fakamolemoleʻi ha mēmipa ʻo e fāmilí kuó ne fakaʻitaʻi pe fakamamahiʻi koe?