Lēsoni 2 Naunau ʻa e Faiakó

Ko e Fatongia ʻo e Kau Palōfitá ʻi Hono Fakahā e Tokāteline ʻo e Fāmili Taʻengatá

ʻOku kamata e Ko e Fāmilí: Ko Ha Fanongonongo Ki Mamani” ʻaki e fakaleá ni: “Ko kimautolu, ko e Kau Palesitenisī ʻUluaki pea mo e Fakataha Alēlea ʻo e Kau ʻAposetolo ʻe Toko Hongofulu Mā Ua ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku mau fakahā heni ʻi he loto māluʻia …” (ChurchofJesusChrist.org). ʻE tokoni e lēsoni ko ʻení ke mahino ki he kau akó ʻa e fatongia toputapu ʻo e kau palōfitá ʻi heʻenau hoko ko e kau tangata leʻó ke fakahā e finangalo ʻo e ʻEikí pea fakatokanga ki he ngaahi fakamanamana ki hotau tuʻunga lelei fakalaumālié. ʻE maʻu ʻe he kau akó ha faingamālie ke fakapapauʻi ʻa e founga te nau lava ai ʻo fakaʻaongaʻi ha kātaki mo ha tui lahi ange ki he ʻEikí ʻi heʻenau feinga ke fakafanongo ki he ngaahi akonaki ʻa ʻEne kau palōfita moʻuí fekauʻaki mo e nofomalí mo e fāmilí.

Ngaahi Fokotuʻu ki Hono Akoʻí

ʻOku uiuiʻi ʻe he ʻEikí ʻa e kau palōfitá ke nau hoko ko ha kau tangata leʻo ʻi he tauá.

Fakaʻaliʻali e fehuʻi ko ʻení kimuʻa he kalasí:

• Ko e hā ka fili ai ʻa e kau palōfitá ke nau lea kau ki he ngaahi tefito faingataʻá mo fakafepakiʻi ʻa e ngaahi tōʻonga ʻoku tali ʻe he sosaietí, ʻi heʻenau ʻiloʻi ʻe fakaʻitaʻi ha kakai ʻe niʻihi ʻi heʻenau leá?

Kamata e kalasí ʻaki hano ʻeke ange ki he kau akó ʻenau ngaahi fakakaukau fekauʻaki mo e fehuʻí. ʻE lava ke ke lau mo e kau akó e fakamatala ʻa Palesiteni Lāsolo M. Nalesoni mei he konga 1 ʻo e naunau teuteú ko ha konga ʻo hoʻomou fealeaʻakí.

• Te ke fakamatalaʻi fakanounou fēfē ʻa e meʻa naʻe akoʻi ʻe Palesiteni Nalesoní? (Tokoni ke ʻiloʻi ʻe he kau akó ha ngaahi moʻoni hangē ko ʻení: ʻOku fakahaaʻi ʻe he ʻOtuá ʻEne ʻofá ʻaki hono uiuiʻi e kau palōfitá ke fakatokanga mo maluʻi kitautolu. ʻOku fakahaaʻi ʻe he kau palōfitá ʻoku nau tokanga ki he kakai kotoa pē ʻaki hono akoʻi e moʻoní.)

• Kuó ke ongoʻi fēfē e ʻofa ʻa e ʻOtuá ʻo fakafou ʻi he ngaahi fakatokanga, fakatonutonu, mo e faleʻi ʻa e kau palōfita moʻuí? (Fakakaukau ke vahevahe foki hoʻo fakamoʻoni fekauʻaki mo ʻení.)

Fakaʻaliʻali ha taha ʻo e ngaahi fakatātā ʻo ha tangata leʻo ʻoku maʻu ʻi he naunau teuteú, pea ʻoange ha taimi ki he kau akó ke nau toe vakaiʻi ai ʻa e ʻIsikeli 3:17–19.

• ʻOku founga fēfē hangē ʻa e kau palōfitá ko e kau tangata leʻo ʻi he tauá?

Te ke lava ʻo puke hake ha tatau ʻo e fanongonongo ki he fāmilí pea fehuʻi ange:

• ʻOku fakatātaaʻi fēfē ʻe hono tuku mai ʻo e fanongonongo ki he fāmilí ʻa e ngaahi fatongia ʻo e kau palōfitá ʻi heʻenau hoko ko e kau tangata leʻo ʻi he tauá? (Te ke lava ʻo fakaafeʻi e kau akó ke nau toe vakaiʻi e fakamatala ʻa Palesiteni Kōtoni B. Hingikelī mo e konga naʻe toʻo mei he piokālafi ʻo Palesiteni Lāsolo M. Nalesoní ʻi he konga 2 ʻo e naunau teuteú.)

ʻOku fekauʻi kitautolu ʻe he ʻEikí ke tau muimui ki he kau palōfitá ʻi he faʻa kātaki mo e tui.

Te ke lava ʻo fakaafeʻi e kau akó ke nau hiki ha ngaahi ʻuhinga naʻe fili ai e kakai ʻi he kuonga muʻá ke ʻoua te nau tali e fakatokanga ʻa ha tangata leʻo.

Fakakaukau ke vahevahe ʻa e tūkunga ko ʻení (pe faʻu ha meʻa ʻoku felāveʻi ange ki hoʻo kau akó) pea fakaafeʻi e kau akó ke nau tali e ngaahi fehuʻi ʻoku hoko maí:

Kuo akoʻi kia Siaosi ʻa e tokāteline ʻoku ʻi he fanongonongo ʻo e fāmilí talu mei heʻene kei siʻí. Ka ʻoku tui hono kāinga ofí mo ha niʻihi ʻo hono ngaahi kaungāmeʻá ʻoku fakapalataha e ngaahi akonakí pea ʻikai tokaʻi ha ngaahi fili ʻe niʻihi ki he tōʻonga moʻuí. ʻOku ʻuhingamālie kia Siaosi ha niʻihi ʻo e ngaahi meʻa ʻoku nau lea ʻakí. ʻOkú ne fifili pe kuo ʻikai toe ʻaonga e fanongonongó.

• Ko e hā hoʻo ngaahi fakakaukau fekauʻaki mo e tūkunga ʻo Siaosí?

• Ko e hā ha ngaahi ivi tākiekina te ne lava ʻo ʻai ke faingataʻa ki he kakaí ke nau tali ha niʻihi ʻo e ngaahi akonaki ʻi he fanongonongo ki he fāmilí?

Fakaafeʻi ha kau ako ke nau lau pe toe vakaiʻi ʻa e Tokāteline mo e Ngaahi Fuakava 21:4–6. Fakamanatu ange kiate kinautolu ʻoku ʻuhinga ʻa e ngaahi veesi ko ʻení ki he Palōfita ko Siosefa Sāmitá, pea ʻe lava ʻo fakalahi ke fakaʻaongaʻi ki he Palesiteni lolotonga ʻo e Siasi ʻo e ʻEikí.

• ʻOkú ke pehē ʻoku ʻuhinga ki he hā ke tali e ngaahi lea ʻa e palōfitá “ʻi he kātaki mo e tui kotoa pē” (veesi 5)?

• Te ke fakamatalaʻi fakanounou fēfē ʻa e ngaahi talaʻofa ʻa e ʻEikí kiate kinautolu ʻoku nau tali mo tokanga ki he ngaahi lea ʻa ʻEne palōfitá ʻi he kātaki mo e tuí? (Te ke lava ʻo tokoni ki he kau akó ke nau ʻiloʻi ha tefitoʻi moʻoni hangē ko ʻení: Kapau te tau tokanga ki he ngaahi lea ʻa e palōfitá, ʻe tāpuakiʻi kitautolu ʻe he ʻEikí mo tekeʻi e ngaahi mālohi ʻo e fakapoʻulí.)

Ko Hono Fakatupulaki ʻEtau Founga Akoʻí mo e Akó

Tokoni ke aʻusia ʻe he kau akó ha ako lahi ange. ʻI hoʻo faiakó, tokanga taha ki he meʻa kuo pau ke aʻusia mo fakahoko ʻe he kau akó ke fakaafeʻi ai ʻa e fakahā fakatāutahá mo fakaloloto ʻa e uluí. Te ke tokoniʻi fēfē kinautolu ke nau langa ʻi he meʻa kuo nau ʻosi ʻiló? Te ke tokoniʻi fēfē kinautolu ke nau hoko ko ha kau ako longomoʻui mo tokoni ki he ako ʻa e niʻihi kehé? Te ke ʻoange fēfē ha ngaahi faingamālie ke nau ʻiloʻi ai e ngaahi ueʻi mei he Laumālie Māʻoniʻoní?

Ke tokoni ki he kau akó ke nau fakakaukau ki he ngaahi sīpinga ʻo e tefitoʻi moʻoni ko ʻení, ʻoange ha ngaahi miniti siʻi ke nau lau pe toe vakaiʻi ai e fakamatala fakafolofola ne nau fili mei he konga 3 ʻo e naunau teuteú. Te ke lava ʻo vahevahe e kalasí ki ha fanga kiʻi kulupu iiki pea fakaafeʻi e kau akó ke nau aleaʻi ʻenau tali ki he ngaahi fehuʻi ʻi he ʻekitivitī “Lekooti Hoʻo Ngaahi Fakakaukaú” ʻi he konga 3. Ka ʻikai, fakaafeʻi e kau akó ke nau aleaʻi mo e kalasí ʻenau ngaahi talí.

Te ke lava foki ʻo fakaafeʻi e ngaahi kulupú ke nau talanoa fekauʻaki mo e kotoa pe niʻihi ʻo e ngaahi fehuʻi ko ʻení (pe te mou aleaʻi ia mo e kalasí):

• Ko e hā kuó ne tokoniʻi koe ʻi hoʻo moʻuí ke ke tokanga ki he ngaahi lea ʻa e kau palōfita ʻa e ʻEikí ʻi he faʻa kātaki mo e tuí? Ko e hā ʻokú ke ʻilo fekauʻaki mo e ʻEikí ʻe lava ʻo tokoni atu ke ke tali ʻi he foungá ni ki he ngaahi lea ʻa ʻEne kau palōfitá?

• Ko e fē ha taimi kuó ke ongoʻi ai kuo tāpuekina koe pe mole atu ʻa e fakapoʻulí koeʻuhí ko hoʻo kātaki mo e tui ʻi he tokanga ki he ngaahi lea ʻa e kau palōfitá?

• Ko e hā ha faleʻi kuo fakahoko mai ʻe he ʻEikí kimuí ni mai ʻo fakafou ʻi Heʻene kau palōfitá ʻe ala fie maʻu ki ai ha kātaki mo ha tui ke tali mo tokanga ki ai?

Fakaʻaliʻali ʻa e ngaahi fehuʻi ko ʻení, pea ʻoange ha taimi feʻunga ki he kau akó ke nau fakakaukau ai ki he meʻa ʻoku ʻaonga taha kiate kinautolú. Poupouʻi e kau akó ke nau lekooti pea ngāue ʻo fakatatau mo ha faʻahinga ueʻi pē te nau maʻu.

• Kapau ʻoku ʻi ai ha meʻa kuo akoʻi ʻe ha palōfita fekauʻaki mo e malí pe fāmilí ʻoku faingataʻa ke u tali, te u tali fēfē ki ai? Ko e hā ʻoku finangalo ʻa e ʻEikí ke u fakahoko ʻi he tūkunga ko ʻení?

• ʻOku fēfē nai ʻeku tokanga mo feinga maʻu pē ke tokanga ki he faleʻi ʻa e kau palōfita ʻa e ʻEikí fekauʻaki mo e nofomalí mo e fāmilí? Ko e hā nai e founga ʻoku finangalo e ʻEikí ke u fakalakalaka aí?

Fakamoʻoni ki he ngaahi moʻoni ne akoʻi ʻi he lēsoni ko ʻení. Fakapapauʻi ange ki he kau akó ʻoku finangalo lelei ʻa e ʻEikí ke tokoniʻi kinautolu ʻi heʻenau feinga ke tokanga ki he ngaahi lea ʻa e kau palōfitá ʻi he kātaki mo e tui kotoa pē.

Ki he Kalasi Hokó

Te ke lava ʻo fakaafeʻi e kau akó ke nau fakakaukau pe kuo nau fifili pe ko e hā e tuʻunga te nau aʻusia ʻi ha ʻaho pe ko e meʻa naʻe totonu ke nau fakahoko ʻi he moʻuí ni. Poupouʻi e kau akó ke nau ako ʻi he faʻa lotu e naunau teuteu ki he kalasi hokó mo fakakaukau ki he meʻá ni.