Inisitituti
Mataupu 28: Alema 23–29

Mataupu 28

Alema 23–29

Folasaga

A o talanoaina e tamaiti le Alema 23–29, e mafai ona latou iloa o le liua moni lava e tumau e tusa lava pe foliga mai e lofituina luitau o le olaga. E mafai ona latou aoao mai faataitaiga a tagata o Aneti-Nifae-Liae, ia na faailoaina o le a latou faamaoni i feagaiga na latou osia, e tusa lava pe maumau ai o latou ola. O le talaiga a Alema ma atalii o Mosaea ua faaalia ai e faapea, pe a tatou liua moni, ua tatou naunau e ola mo le talalelei faapea foi ma le naunau e oti ai. A tatou liua moni, tatou te maua le filemu lea e sau mai le mauaina o se molimau o le alofa o le Atua ma Lana fuafuaga mo i tatou. Tatou te iloaina foi le olioli sili a o tatou tuuina atu atoa i tatou lava i le galuega a le Alii ma faasoa atu a tatou molimau i isi.

O Nisi o Aoaoga Faavae ma Mataupu Faavae

  • O le liua e aofia ai le avea ma se soo tumau (tagai i le Alema 23–24).

  • E faamanuia e le Alii Ana auauna i a latou galuega faafaifeautalai (tagai i le Alema 26).

  • O le amiotonu e taitai atu ai i le fiafia e faavavau (tagai i le Alema 28).

  • O le folafolaina o le talalelei e aumai ai le olioli (tagai i le Alema 29).

Fautuaga mo le Aoaoga

Alema 23–24. O le Liua e Aofia ai le Avea ma se Soo Tumau

Faasoa atu le faamalamalamaga lenei mai le Taiala i Tusitusiga Paia:

“O le liua e aofia ai se faaiuga atamai e lafoaia ala na masani ai se tasi ma suia ina ia avea ma soo o Keriso.

“Salamo, papatisoga mo le faamagaloina o agasala, o le taliaina o le Agaga Paia e ala i le faee atu o lima, ma le faatuatua faifai pea i le Alii o Iesu Keriso e atoa ai le liua. O le a suia se tagata o le lalolagi i se tagata ua faapaiaina ma faamamaina, ua toe fanauina ia Keriso Iesu (2 Kor. 5:17; Mosaea 3:19)” (Guide to the Scriptures, “Conversion, Convert,” scriptures.lds.org). Manatua o le Mosaea 3:19 o se fuaiupu o le mau tauloto .

  • Aisea e avea ai le suiga patino o se vaega tatau o le liua?

  • E faapefea ona fesoasoani ia sauniga o le talalelei ia i tatou e faia ia suiga?

Valaaulia le afa o tamaiti e faitau le leoa le Alema 23. Valaaulia le isi afa e faitau le leoa le Alema 24:6–27. Fai atu ia i latou e saili mo suiga na tutupu i le au sa Lamana ma mafaufau pe o a mea o aoao mai e na suiga e uiga i le liua tumau.

  • O a mea na outou maua na faailoa ai na liua moni lava sa Lamana?

O tali e mafai ona aofia ai mea nei: o i latou o e na liuaina “ua le toe liliu ese lava” (Alema 23:6); na latou tauaveina i o latou luga se igoa ina ia “faailogaina ai i latou ai o latou uso” (tagai i le Alema 23:16–17); na latou lafoai “auupega o lo latou fouvale” ma tanumia “maulalō i le eleele” (tagai i le Alema 23:7–13; 24:15–18).

Valaaulia tamaiti e mafaufau i fesili nei:

  • O le a se mea e te faia e faaauau ai pea ona faalolotoina lou liua?

  • Mafaufau i le faataitaiga o le tanumiaina e Aneti-Nifae-Liae “o auupega o lo latou fouvale.” Pe i ai ea se isi mea i lou olaga e te manaomia ona “tanumia”? Afai e i ai, o le a sau mea o le a fai i ai?

Alema 26. E Faamanuia e le Alii Ana Auauna i a Latou Galuega Faafaifeautalai

Fai i tamaiti e ta’u mai ni taimi na latou vaaia ai ua faamanuia e le Alii tagata o loo faasoa atua Lana talalelei.

Pe a uma ona tuu atu i tamaiti le taimi e tali ai fesili, vaevae tutusa lelei le Alema 26:1–31 ia i latou. Valaaulia tamaiti e faitau le leoa a latou fuaiupu atofaina, ma saili mo faamanuiaga na maua e Amona ma ona uso i le taimi o la latou misiona i sa Lamana. A maea ona faitau tamaiti, uunaia i latou e faasoa atu mea na latou maua.

  • E faapefea ona tutusa aafiaga o loo faamatalaina i le Alema 26:29–30 ma na aafiaga o faifeautalai o ona po nei?

  • E mafai faapefea e fetalaiga a le Alii i le Alema 26:27–28 ona fesoasoani i faifeautalai e aloese ai mai lagona o le lotovaivai?

Valaaulia tamaiti e sue i le MFF 84:87–88. Tuu atu i se tamaitiiti e faitau nei fuaiupu.

  • Aisea tatou te tau le mautonu ai i nisi taimi e faasoa atu le talalelei? E mafai faapefea e nei fuaiupu, faatasi ai ma le molimau a Amona, ona maua ai lo tatou malosi ma le lototoa e faasoa atu le talalelei i isi?

Fai atu i se tamaitiiti e faitau le Alema 26:37.

  • E tusa ai ma lenei fuaiupu, e faapefea ona avea le galuega faafaifeautalai ma faamaoniga o le alofa o le Atua mo Ana fanau?

Valaaulia tamaiti e faasoa mai a latou molimau o le galuega faafaifeautalai ma faamanuiaga e oo mai ia i latou e galulue mo le faaolataga o isi.

Alema 28. O Le Amiotonu e Taitai atu ai i le Fiafia e Faavavau

Faitau le Alema 28:1–6 faatasi ma tamaiti.

  • O le a le mea na tupu ia sa Nifae ma sa Lamana na tupu ai le “tagi tele”?

  • Aisea e te manatu ai e anapogi ma tatalo tagata pe a maliu se tagata o le aiga?

  • O le a se mea na e faia pe na fai foi e ni tagata e te iloaina e maua ai le malosi faaleagaga pe a maliu sē e pele?

Tusi i luga o le laupapa le “Ma ua faapea ona tatou iloa .” Faamalamalama atu e masani lava ona faaaogaina e Mamona lenei fuaitau a o lei faasoaina atu ni lesona tatou te aoaoina mai tala o le Tusi a Mamona. Valaaulia tamaiti e faitau le leoa le Alema 28:10–12. Fai atu i ai e mafaufau i nei fuaiupu ma iloa pe o le a faapefea ona latou faamaeaina le fuaiupu o loo i luga o le laupapa. Valaaulia tamaiti e faasoa mai o latou manatu.

Pe a maea ona faasoa mai tamaiti, faitau le Alema 28:13–14 e iloa ai pe o faapefea ona faamaea e Mamona le fuaiupu.

Faasoa atu le saunoaga lenei a Elder Russell M. Nelson o le Korama a Aposetolo e Toasefululua. O loo maua foi i le companion DVD A. (Afai ua e tuu atu i tamaiti e faitauina, mafaufau e tuu i luga o se masini o ata manino po o luga o se pepa e tufa atu mo i latou e suesue i ai.)

“Tatou te ola ina ia oti ma tatou te oti foi ina ia ola—i se isi lalolagi. Afai tatou te saunia lelei, e le aumaia e le oti se atuatuvale. Mai se vaaiga i le faavavau, e na o i latou lava e lei saunia e fetaiai ma le Atua, e manatu ua vave tele mai le oti,

“O le taimi lenei e sauniuni ai. Ma a oo mai le oti, ua mafai ona tatou sii atu i le mamalu selesitila ua saunia e le Tama Faalelagi mo Ana fanau faamaoni. O le taimi nei, mo i latou e pele ua tuua … ua faamafanafanaina mai le tui o le oti ona o le mausali ia Keriso, o se faamoemoe lelei, o se alofa i le Atua ma tagata uma, ma se naunautai loloto e auauna atu ia te i latou” (i le Lipoti o le Konafesi, Ape. 2005, 18; po o le Liahona, Me 2005, 18).

  • E tusa ai ma le saunoaga a Elder Nelson, o le a le mea e aveesea le fefe i le oti?

  • O le a le mea e faamāmāina le tui o le oti mo i latou ua tuua?

Molimau atu o le ola amiotonu ma le faatuatua ia Keriso e saunia ai i tatou mo se faavavau o le fiafia.

Alema 29. Folafolaina atu o le Talalelei e Aumai ai le Olioli

Valaaulia tamaiti e faasoa mai mea latou te momoo i ai.

  • Aisea ia ua e momoo ai i na mea?

Tau atu i tamaiti o loo faamauina i le Alema 29 le moomooga o se faifeautalai maoae. Valaaulia se tamaitiiti e faitau le Alema 29:1–2.

  • O le a le moomooga o Alema?

  • E tusa ai ma nei fuaiupu, aisea na manao ai Alema e avea ma se agelu?

Fai i tamaiti e faitau le leoa le Alema 29:3–8, ma saili mo mafuaaga i le pogai na iloa ai e Alema e na te le manaomiaina le mea na momoo i ai. Pe a maea le taimi na tuu atu, valaaulia tamaiti e faasoa mai a latou tali, ia e mafai ona aofia ai mea nei:

  • Na ia iloaina e tatau ona faamalieina o ia i faamanuiaga ua ia maua (tagai i le fuaiupu 3).

  • Na ia iloa e tuuina mai e le Alii “i tagata e tusa ma o latou manao, … e tusa ma o latou loto” (fuaiupu 4).

  • Na ia iloaina e na o le pau lava lona tiutetauave o le “faia o le galuega ua valaauina ai o [ia]” (fuaiupu 6).

  • Na ia iloa o le a faia e le Alii se ala mo malo uma e maua ai “mea uma ua silafia e ia ua tatau ia te i latou” (fuaiupu 8).

Fesoasoani i tamaiti ia iloa le maoae tele o Alema. O lona moomooga ina ia lelei atili lana auaunaga i le Atua, ae na ia iloa ma le lotomaualalo e tatau foi ona ia talia tulaga ua tuuina i ai o ia e le Atua.

Valaaulia tamaiti e faitau le Alema 29:9–17, ma saili mo mea na oo ai ia Alema le olioli. (E mafai ona e tuu atu i tamaiti e faitau lenei mau taitoalua.)

  • O le a le mea na olioli ai Alema?

  • Na faapefea ona talitutusa le olioli o Alema ma le olioli o Amona? (Tagai i le Alema 26:11–13, 35–37.)

  • E tusa ai ma le Alema 29:10, e mafai faapefea e galuega faafaifeautalai ona faamanatu mai ia i tatou le alofa mutimutivale o le Alii?

Faasoa atu le saunoaga lenei a Elder Richard G. Scott o le Korama a Aposetolo e Toasefululua (o loo maua foi i le companion DVD B):

“E i ai ni mea i le olaga tatou te maua ai le olioli pe a tatou fesoasoani atu i se tasi ina ia faaleleia lona olaga. E faateleina lena olioli pe afai e fesoasoani na taumafaiga i se tasi ia malamalama ai i aoaoga a le Faaola, ma filifili ai lena tagata e usiusitai i ai; ma liliu mai ma auai i Lana Ekalesia. O iina e mulimuli mai ai le fiafia sili a o faamalosia le tagata faatoa liliu mai i le suiga mo se olaga fou, ua maua se molimau mauai o le upumoni, ma mauaina uma sauniga o le malumalu faatasi ma le folafolaga o faamanuiaga uma o le ola e faavavu” (i le Lipoti o le Konafesi, Oke. 1997, 45–46; po o le Liahona, Ian. 1998, 40).

  • Na faailoaina mai e Elder Scott tulaga e tolu o le faateleina o le olioli a o tatou faasoa atu le talalelei. O a nei tulaga e tolu?

  • E mafai faapefea i le faatumauina o lenei saunoaga i le mafaufau ona fesoasoani ia i tatou ia manatuaina le faamoemoega o le galuega faafaifeautalai?

Valaaulia tamaiti e molimau atu i le olioli latou te lagonaina a o latou ola ai i le talalelei ma faasoa atu i isi. Uunaia i latou e sue se ala e lagona ai le olioli i le vaiaso a sau e pei o le olioli o Amona ma Alema.