Mataupu 26

Alema 13–16

Folasaga

O lenei poloka mau ua aumai ai ni avanoa lelei e talanoaina ai le ata o le faaolataga. A o talanoaina e tamaiti le Alema 13, e mafai ona e fesoasoani ia i latou e mafaufau i lo latou muai olaga ma tiutetauave atonu ua latou saunia e maua i lenei olaga faaletino. A o latou talanoaina le Alema 14, e mafai ona e faamanatu atu i ai o le a latou feagai ma tofotofoga i le olaga nei ae o le a faamanuiaina sili i latou pe a latou tumau ai ma le faamaoni i a latou molimau. I le Alema 15, a o mafaufau tamaiti i le suiga na oo ia Seseroma, e mafai ona e faamamafaina atu le aoaoga faavae o le salamo ma le matafaioi tupito a Iesu Keriso i le fuafuaga a lo tatou Tama Faalelagi. O loo faaalia i le Alema 16 o le a tali atu e amioleaga i mea na latou faatinoina. Ua molimau faatasi mai nei mataupu i le faamasinoga tonu ma le alofa mutimutivale o le Atua, ua faamalosiauina ai i tatou ia faalagolago ia te Ia ma Lana fuafuaga mo lo tatou faaolataga.

O Nisi o Aoaoga Faavae ma Mataupu Faavae

Na saunia ma valaauina e le Atua ē umia le Perisitua Mekisateko mai lava i le faavaeina o le lalolagi (tagai i le Alema 13).
E faamanuia e le Atua i latou e faalagolago ia te Ia i o latou puapuaga (tagai i le Alema 14–15).
O i latou e teenaina le talalelei e puapuagatia faaleagaga ma o nisi taimi e faaletino (tagai i le Alema 16).

Fautuaga mo le Aoaoga

Alema 13. Na Saunia ma Valaauina e le Atua Ē Umia le Perisitua Mekisateko mai lava i le Faavaeina o le Lalolagi

Ina ia fesoasoani i tamaiti ia malamalama i le eseesega i le va o le muaifaauuina ma le faauuina, tusi upu nei i luga o le laupapa:

Muaifaauuina

Agavaa

Faauuina

Faamalamalama atu i le muai olaga, na muaifaauuina ai e le Atua le toatele o Ona atalii e maua le perisitua i le olaga nei e fesoasoani ai i le faaolataga o le aiga o le tagata. Faaopoopo atu i le laupapa:

Muai Olaga	Muai Olaga ma le Olaga i le Lalolagi	Olaga i le Lalolagi
Muaifaauuina	Agavaa	Faauuina
Alema 13:3	Alema 13:3–10	Alema 13:6–12
MFF 138:55–56
Aperaamo 3:22–23

Vaevae le vasega i ni vaega se tolu. Tofi le tasi vaega e suesue le leoa ia mau e uiga i le muaifaauuina, o le isi vaega e suesue le leoa ia mau e uiga i le agavaa, ma le vaega mulimuli e suesue le leoa ia mau e uiga i le faauuina (manatua o nisi fuaiupu e fesootai uma i le muaifaauuina ma le agavaa po o le agavaa foi ma le faauuina). Faatonu vaega ia saunia e tali fesili e uiga i a latou faitauga.

Pe a maea le taimi na tuu atu, valaaulia se tamaitiiti e faitau leotele le Alema 13:3. Fai i se tamaitiiti na suesue i le muaifaauuina e tali i le fesili lenei:

Na faapefea ona faailoa atu e alii i le muai olaga ua latou agavaa ina ia muaifaauuina e maua le Perisitua Mekisateko?

Tuu atu i se isi tamaitiiti e faitau leotele le MFF 138:55–56.

O le a le mea o aoao mai i lenei mau e uiga i le muai olaga ma le muaifaauuina?
E mafai faapefea e nei aoaoga e uiga i le muaifaauuina ona faatosinaina le auala e te auauna ai i valaauga ma lagolago ai ou taitai?

Valaaulia tamaiti e faitau le leoa le Alema 13:3–10. Fai atu i se tamaitiiti na suesue i le agavaa e tali fesili nei:

E tusa ma le Alema 13:10, o le a le mea e tatau i se alii ona faia e saunia ai e maua le Perisitua Mekisateko?
E faapefea ona saunia e le faatuatua ma le salamo se alii ia maua le Perisitua Mekisateko?

Valaaulia se tamaitiiti e faitau le Alema 13:11–12. Fai atu i se tamaitiiti na suesue i le faauuina e tali fesili nei:

Pe a maea ona faauuina se alii i se tofi i le Perisitua Mekisateko, o le a se mea e manoamia ona ia faia e tumau ai le agavaa e auauna atu?
O le a le mea na tupu o se taunuuga o le amiotonu o ē umia le perisitua o loo faamatala mai i le Alema 13:11–12?

Faamatala o tamaitai faamaoni i le muai olaga na saunia foi mo avanoa e auauna ai i le lalolagi. Valaaulia tagata o le vasega e faitau le saunoaga a Peresitene Spencer W. Kimball ma Elder Neal A. Maxwell o loo i itulau 200 i le tusi lesona a tagata o le vasega. O loo maua foi le saunoaga a Elder Maxwell i le companion DVD A.

Alema 13:6, 17–18. O Ē Umia le Perisitua Mekisateko e Tatau ona Faalauiloaina le Amiotonu

Faamalamalama atu o e umia le Perisitua Mekisateko e tatau ona saili e talai atu i isi e pei ona aoao mai Alema. Valaaulia tamaiti e faitau le Alema 13:6, 17–18.

E tusa ai ma le Alema 13:6, pe a maea ona maua e se alii le Perisitua Mekisateko, o le a se tasi o ona tiute?
E tusa ai ma le Alema 13:17–18, o le a le mea na fai e Mekisateko e faailoa atu ai le amiotonu?
E mafai faapefea e sē umia le perisitua i nei aso ona faailoa atu le amiotonu e pei ona faia e Mekisateko?

Atonu e te manao e faasino atu e foliga mai o loo aoao mai le Tusi Paia e faapea o le tagata e igoa ia Mekisateko “e leai sona tama, e leai sona tina, e leai ni ona tupuga, e leai se amataga i ona aso, po o se gataaga i lona soifua” (Eperu 7:3). Alema 13:8–9 ma o le Faaliliuga a Iosefa Samita o le Eperu 7:3 (i le Bible appendix) ua faamanino ai lenei mau. Ua faamalamalama ai o le perisitua ae le o le tagata, lea “e leai se amataga o aso po o le gataaga o tausaga” (Alema 13:7, 9).

Alema 13–15. E Faamanuia e le Atua i Latou e Faalagolago ia te Ia i o Latou Puapuaga

Fai i tamaiti e faasoa mai ni faataitaiga mai tusitusiga paia o ni tagata amiotonu na faasalaina ona o a latou molimau o le talalelei. Pe a maea ona tuuina mai e tamaiti ni nai faataitaiga, faitau le Alema 14:7–11 ma le 60:13.

O a mafuaaga ua tuuina mai i nei fuaiupu i le pogai e faatagaina ai i nisi taimi ona puapuagatia e amiotonu i lima o e amioleaga?

Faasoa atu le saunoaga lenei a Peresitene James E. Faust (1920–2007) o le Au Peresitene Sili:

“O lenei puapuaga uma e mafai ona moni e le fetaui pe ana fai e muta mea uma i le oti, ae leai. O le olaga e le pei o se tala e tasi le vaega. E tolu ona vaega. Sa i ai la tatou vaega ua mavae atu a o tatou i ai i le muai olaga; ma o loo tatou i ai nei i le vaega o loo faatinoina, o le olaga faaletino lea; ma o le a i ai foi se tatou vaega faatino i le lumanai, pe a tatou toe foi atu i le Atua. … Na auina mai i tatou i le olaga faaletino ina ia suesueina ma tofotofoina ai [tagai i le Aperaamo 3:25]. …

“O o tatou puapuaga i le taimi ua tuanai ma le taimi nei, e le mafai, e pei ona fai mai Paulo, ‘ona faatusaina … ma le manuia atali e faaalia mai ia te i tatou’ [Roma 8:18] i le faavavau. ‘Aua e oo mai faamanuiaga pe a mavae atu puapuaga e tele. O lea o le a oo mai le aso e faapaleina ai outou i le mamalu.’ [MFF 58:4.] O lea, o puapuaga e aoga i le lagona faapea e fesoasoani ai ina ia oo atu ai i le malo selesitila” (i le Lipoti o le Konafesi, Oke. 2004, 19; po o le Liahona, Nov. 2004, 19).

E mafai faapefea e le mauaina o se molimau o le ata o le faaolataga, e aofia ai le muai olaga ma le olaga a sau, ona faamāmāina puapuaga tatou te oo i ai i le olaga faaletino?
O a ni auala ua faamanuiaina ai e amiotonu i o latou puapuaga?
I taimi o puapuaga, e mafai faapefea ona tatou faaalia o loo tatou faalagolago i le Atua?

Tuu atu i tamaiti e faatusatusa le fesili na fesiligia e Alema i le Alema 14:26 ma le fesili na fesiligia e Iosefa Samita i le Mataupu Faavae ma Feagaiga 121:3.

E tusa ai ma le Alema 14:26, na mafai faapefea ona faatoilaloina e Alema ma Amoleka o la puapuaga?
Ina ua faafalepuipuiina ma le le tonu le Perofeta o Iosefa Samita i Misuri, na ia fesiligia le fesili o loo faamauina i le Mataupu Faavae ma Feagaiga 121:3. E le pei la o Alema ma Amoleka, e lei laveaiina faavave o ia mai le falepuipui. O a mea e mafai ona tatou aoao mai le tali a le Atua i lana tatalo? (Tagai i le MFF 121:7–9; 122:4–9.)
E faapefea ona fesoasoani le Alii ia te oe pe a e oo i tofotofoga?

Sa faalagolago uma ia Seseroma ma Amoleka i le Atua i o la puapuaga. Faatonu le afa o le vasega e faitau le Alema 15:5–12, saili mo faamatalaga e uiga ia Seseroma. Faatonu le isi afa e suesue le Alema 15:16, 18, saili mo faamatalaga e uiga ia Amoleka.

Fai atu le fesili lenei i tamaiti na faitau e uiga ia Seseroma:

E faapefea ona faaalia i le tala o loo i le Alema 15 le tuputupu ae pea o le faalagolago o Seseroma i le Alii?

Fai atu fesili nei i tamaiti na faitau e uiga ia Amoleka:

O le a le mea na lafoaia e Amoleka e ala i le filifili e ola i le talalelei ma auauna atu o se faifeautalai? O le a le mea o faaalia mai ai e uiga ia Amoleka?
O a ni faamanuiaga ua e maua a o e ositaulaga e ola i le talalelei ma faalagolago i le Alii?

Alema 16. O i Latou e Teenaina le Talalelei e Puapuagatia Faaleagaga ma o Nisi Taimi e Faaletino

Tusi le faamatalaga lenei i luga o le laupapa:

O tagata i le taimi o Noa

O tagata o Sotoma ma Komora

O tagata o Ierusalema i le taimi o Liae

O tagata o Amonaea

Faitau le Alema 16:9. Ona ia taulai atu lea o le gauai o tamaiti i vaega e fa ua e tusia i luga o le laupapa.

O a mea e tutusa ai nei vaega e fa?
O a nisi o taunuuga faaletino ma faaleagaga e mafai ona oo i ai pe a teenaina e tagata le talalelei?

Fesoasoani i tamaiti ia iloa pe a “tutumau [tagata] i a [latou] amioleaga” (Alema 9:18), latou te puapuaga i faafanoga faaleagaga, e tusa lava pe latou te aloese mai faafanoga faaletino.

Fai atu i se tamaitiiti e faitau le saunoaga lenei a Peresitene Uilifoti Uitilafi (1807–98), le Peresitene lona fa o le Ekalesia:

“Afai e pa’ū’ū ese atu le isi afa o tagata o lenei Ekalesia, o le a le faaumatia ai lava faamoemoega o le Alii. Pe a mafaufau ia i tatou lava, o se isi lea itu. E toatele tagata na latou talia le talalelei, ma faaee atu i o latou luga le Agaga Paia, ua pa’ū’ū ese atu, ae i le faia o lena mea ua latou faasalaina ai i latou lava, ua latou faaumatia i latou lava. … Atonu e pa’ū’ū tagata, ae o le a le mafai lava ona pa’ū le malo o le Atua, e le mafai” (i le Conference Report, Apr. 1880, 10).

O a ni puipuiga e mafai ona fesoasoani ia i tatou e aloese ai mai mala o tagata o Amonaea?

Faamatala e muai lapataia e le aunoa e le Alii ia tagata, a o lei oo mai faafanoga faapena (tagai i le Alema 9:18–19; tagai foi i le 2 Nifae 25:9).

Alema 16:16–21. E Tatau ona Tatou Saunia mo le Afio Mai Faalua

Valaaulia tamaiti e faitau le Alema 16:16–21 ma saili pe na faapefea ona saunia e le Alii ia tagata mo Lona afio mai.

E mafai faapefea e nei fuaiupu ona fesoasoani ia i tatou e saunia ai i tatou lava ma isi mo le Afio Mai Faalua o Iesu Keriso?