Mataupu 56

Moronae 10

Folasaga

I le molimau faaiu a Moronae, na ia apoapoai mai ai ia i tatou ina ia gauai atu i mataupu faavae e tolu. Muamua, na ia tusi mai e uiga i le taua o lo tatou iloaina mo i tatou lava le moni a’ia’i o le Tusi a Mamona. A o e oo mai i le faaiuga o lenei vasega o le Tusi a Mamona, e mafai ona e fesoasoani i tamaiti ia tomanatu i a latou molimau i le Tusi a Mamona. Pe na latou tatalo ea e uiga i le moni a’ia’i o lenei tusi paia? Pe ua tuputupu ae ea a latou molimau?

Lona lua, na taulai atu Moronae i le sailiga o meaalofa faaleagaga na faaee atu e le Tama Faalelagi i luga o Ana fanau faamaoni. A o suesueina ma talanoaina e tamaiti lenei mataupu faavae, o le a mafai ona latou iloaina le eseese ma le tele o meaalofa faaleagaga ua avanoa mo i latou.

Ma le mea mulimuli, na apoapoai mai Moronae ia i tatou ia “o mai ia Keriso” ina ia mafai ai ona tatou “atoatoa … ia Keriso” ma ia “paia ma le le pona” (Moronae 10:32–33).

O Nisi o Aoaoga Faavae ma Mataupu Faavae

Pe a tatou ole atu i le faatuatua, e faailoa mai e le Atua le moni a’ia’i o le Tusi a Mamona ia i tatou i le mana o le Agaga Paia (tagai i le Moronae 10:1–7).
E tuu atu e le Alii meaalofa faaleagaga i ē faamaoni (tagai i le Moronae 10:8–30).
E faaatoatoaina e le Togiola i tatou a o tatou o mai ia Keriso (tagai i le Moronae 10:30–33).

Fautuaga mo le Aoaoga

Moronae 10:1–7. Pe a Tatou Ole atu i le Faatuatua, e Faailoa mai e le Atua le Moni A’ia’i o le Tusi a Mamona ia i Tatou i le Mana o le Agaga Paia

Faamatala atu o loo i ai i le Moronae 10 le savali faaiu a Moronae. O le vaega muamua o le savali o loo taulai atu i le mauaina o se molimau i le Tusi a Mamona. Fai atu i se tamaitiiti e faitau le Moronae 10:3–5 pe tauloto mai foi i le mafaufau.

E tusa ai ma nei fuaiupu, o le a se matafaioi a se tagata i le sailiga o se molimau?
O le a le uiga ia i ai se “loto faamaoni”? O le a le uiga ia i ai le “manatu tonu”?
O le a le matafaioi a le Agaga Paia i le fesoasoani ai ia i tatou ia maua se molimau?
O a nisi o auala e mafai ona molimau mai ai le Agaga ia i tatou?
E mafai faapefea ona faaauau pea ona faatatau le folafolaga a Moronae ia i tatou, e tusa lava pe o lea ua uma ona i ai sa tatou molimau i le Tusi a Mamona?

Faamatala mea na matau e Peresitene Boyd K. Packer e uiga i le auala e maua ai se molimau i le Tusi a Mamona (tagai i le itulau 424–425 i le tusi lesona a tagata o le vasega; tagai foi i le companion DVD A).

O le a le mea o loo aoao mai e le Moronae 10:3–5 e uiga i le mauaina po o le faamalosiaina o se molimau?
E tusa ai ma le saunoaga a Peresitene Packer, aisea e ono le atamai ai le faamoemoeina o se aafiaga faaleagaga ia vave oo mai pe a sailia se molimau?
Na aoao mai Peresitene Packer, “Afai e te tausia [se molimau], o le a tuputupu ae; ae afai e te le tausia, o le a magumagu” (i le Lipoti o le Konafesi, Ape. 2005, 7; po o le Liahona, Me 2005, 8). O le a sou manatu i le uiga o le tausia o se molimau? Aisea e magumagu ai se molimau pe a le tausiaina?

Ina ia talanoaina atili le auala e mafai ai ona tatou maua ma faamalosia se molimau e ala i le suesueina o le Tusi a Mamona, mafaufau e faasoa atu le saunoaga lenei a Elder Bruce R. McConkie o loo i itulau 425 i le tusi lesona a tagata o le vasega ma le saunoaga a Peresitene Gordon B. Hinckley o loo i le itulau 425. O loo maua foi le saunoaga a Elder McConkie i le companion DVD B.

Valaaulia tamaiti e faasoa mai mea na latou faia e maua ai se molimau i le Tusi a Mamona.

Moronae 10:8–30. E Tuu atu e le Alii Meaalofa Faaleagaga i Ē Faamaoni

Faamatala atu i lana molimau faaiu, na aoao mai ai e Moronae le taua o Meaalofa a le Agaga. Tusi mau faasino nei i luga o le laupapa:

Moronae 10:9–18

MFF 46:13–25

1 Korinito 12:8–11

Vaevae le vasega i ni vaega se tolu. Fai atu i vaega taitasi e suesue se tasi o poloka mau o loo lisiina i luga o le laupapa. Tuu atu i vaega taitasi e faailoa mai meaalofa a le Agaga ua lisiina i a latou poloka mau. Tofi se tamaitiiti mai vaega taitasi e tusi tali a vaega i luga o le laupapa.

O a mea e tutusa ai ua e vaaia i le va o lisi e tolu? O a mea e eseese ai ua e vaaia?

Faamatala e sili atu le tele o meaalofa faaleagaga nai lo meaalofa o loo ta’ua i nei mataupu. Fai atu i se tamaitiiti e faitau le saunoaga a Elder Marvin J. Ashton o loo i le itulau 426 i le tusi lesona a tagata o le vasega.

E tusa ai ma le Moronae 10:8 ma le Mataupu Faavae ma Feagaiga 46:8–12, aisea ua faasoa mai ai e le Alii nei meaalofa?

Valaaulia tamaiti e tau mai ni taimi na latou vaaia ai tagata ua faamanuiaina mai soo se meaalofa o nei meaalofa?

Atonu e te manao e faasino atu na aoao mai e Moronae e faapea e oo mai meaalofa faaleagaga i tagata taitoatasi e tusa ai ma manaoga o lena tagata (tagai i le Moronae 10:17). E pei lava o faamanuiaga uma, e oo mai foi faamanuiaga faaleagaga e tusa ma le finagalo o le Alii (tagai i le 3 Nifae 18:20; Moronae 7:33). Na faaali mai e le Alii e tatau ona tatou sailia nei meaalofa ma le naunautai (tagai i le MFF 46:8).

Aisea e tatau ai ona sailia meaalofa a le Agaga? O le a se mea e te manatu e manaomia ona tatou faia ina ia sailia ai na meaalofa?

Tuu atu i tamaiti e faitau le Moronae 10:19–20, 24 ma faailoa mai mafuaaga e ala ai ona aveesea mai meaalofa a le Agaga mai tagata i nisi taimi.

Afai e i ai ni fesili a tamaiti e uiga i meaalofa faaleagaga atonu ua faasoa mai e le Alii ia i latou, uunaia i latou e faitau le itulau 425–27 i le tusi lesona a tagata o le vasega.

Moronae 10:30–33. E Faaatoatoaina e le Togiola i Tatou a o Tatou O Mai ia Keriso

Tusi i luga o le laupapa le O le mea e tupu i se taimi e tasi ma le Faagasologa o le olaga atoa.

O le a le uiga o le “o mai ia Keriso”?

Tatai atu le gauai a tamaiti i upu ua e tusia i luga o le laupapa, ma valaaulia tamaiti e mafaufau loloto i lenei fesili:

Pe o le o mai ia Keriso o se mea e tupu i se taimi e tasi po o se faagasologa o le olaga atoa?

Tusi igoa nei i luga o le laupapa (pe tusi igoa o isi tagata o le Tusi a Mamona pe a e manao i ai):

Enosa
Nuu o le Tupu o Peniamina
Alema le Itiiti
Tupu o Lamonae
Tama o le Tupu o Lamonae
Sa Soramā

O a ni mea na tutupu i se taimi e tasi na fesoasoani i nei tagata taitoatasi po o vaega ia o mai ia Keriso?
O a ni faamaoniga o e vaaia na oo i ai tagata taitasi nei po o vaega i se faagasologa o le olaga atoa o le o mai ia Keriso?

Fai atu i tamaiti e faitau le Moronae10:30, 32–33.

O le a le mea na apoapoai mai ai Moronae ia i tatou e fai ina ia tatou “atoatoa ia Keriso”?
O a fuaitau i le fuaiupu 33 o loo faamatalaina mai ai i latou ua faaatoatoaina ia Keriso? (E aofia i tali le “faapaiaina ia Keriso,” “faamagaloga o a outou agasala,” ma le “paia ma le le pona.”)
E mafai faapefea ona tatou manatuaina mea faaleagaga na tutupu i o tatou olaga na taitaia i tatou i le “o mai ia Keriso, ina ia faaatoatoaina e ia”?

Valaaulia tamaiti e faasoa mai ni faataitaiga o le auala na fesoasoani ai le Tusi a Mamona ia i latou e latalata atu ai i le Faaola ma saili ai le “faaatoatoaina e ia.”

Moronae 10:27, 34. Molimau Faaiu a Moronae

Tuu atu i tamaiti e faitau le Moronae 10:27, 34.

O a ni auala e oo mai ai upu a Moronae e pei lava o loo ia saunoa mai le efuefu?

Tuu atu i tamaiti e faitau le 2 Nifae 3:18–20 ma faatusatusa i le Moronae 10:27.

Afai e te tusia lau molimau i le Tusi a Mamona i tagata o o tatou taimi, o le a se mea o le a e tau atu?

Uunaia tamaiti taitasi e tusi sana molimau o le Tusi a Mamona i le pito i tua o le tusi lesona a tagata o le vasega po o totonu o se api talaaga. Atonu foi e te uunaia tamaiti e tuu atu se molimau i le Tusi a Mamona i la latou sauniga anapogi ma molimau e sosoo ai. Ma le mea mulimuli, ia avea lenei avanoa e faasoa atu ai lau lava molimau i le Tusi a Mamona. Uunaia tamaiti ia avea le suesueina o le Tusi a Mamona o se taumafaiga i le olaga atoa.